Katakin Ajiri ro Nejõm bwe Ren Erom Dri Kwalok Nan ro im Dri Karejaran Anij
1. Ta eo book in Sam 148:12, 13 ej rejañ dri Kristian ro ewor nejier bwe ren kõmmane?
1 Jeova ekõnan bwe ajiri im jodrikdrik ro ren nebar e. (Sam 148:12, 13) Kin men in, dri Kristian ro jemeir im jineir rejjab baj katakin wõt ajiri ro nejier kin katak ko remol im kien ko an Anij, ak rej bareinwõt katakin ir bwe ren erom dri kwalok nan ro kin nuuj eo emmõn. Ewi wãwen remaroñ kõmmane men in ilo juõn wãwen ekeie?
2. Ewi wãwen joñok ko an ro jemen im jinen remaroñ jelet ajiri ro nejiir?
2 Juõn Joñok Emmõn: Gideon ear jiroñ lõmaro 300 dron: “Komin kab kalimjek iõ, im kõmmõne men eo ij kõmmõne.” (Ekaj. 7:17, UBS) Ekkã an ajiri ro lale men ko jemeir im jineir rej kõmmane inem kajeoñwe ir. Ñan wanjoñok, juõn jemen ear jerbal aolepen boñin eo, bõtab ke ear roltok ilo jibboñin Jãdede, ear jab ilok im kakije meñe emõk ak ear bõk ajiri ro nejin ñan kwalok nan. Meñe ejjab ba ilo nan, ak ikijen joñok in an, ej katakin ajiri ro bwe kwalok nan elukkun aurõk. (Matu 6:33) Ajiri ro nejõm rej ke kile bwe kwoj mõnõnõ im kaurõk kõtan eo am iben Anij ilo am riiti Baibel, jar, uak ilo kwelok, im kwalok nan? Meñe ejjab aolep ien enaj jejjet men eo kwoj kõmmane, ak ajiri ro nejõm enaj laplok air jerbali men ko kwoj katakin ir kin Jeova elañe rej lo am kijejeto im jerbal ñan Jeova.—Dut. 6:6, 7; Rom 2:21, 22.
3. Ta mejenkajik ko ro jemen im jinen rej aikwij jibañ ajiri ro bwe ren tõbari?
3 Mejenkajik: Ritto ro elap air kate ir ñan katakin ro nejiir bwe ren jelã etetal, jelã kennan, make kõnõk nuknuk ko air, im men ko eierlok wõt. Elañe ajiri ro renaj katak im jelã men kein, jemeir im jineir renaj wõnmanlok wõt im katakin ir bar men ko jet. Dri Kristian ro rej bareinwõt jibañ ajiri ro nejier bwe ren kõmman air mejenkajik ikijen kõtan eo air ibben Anij ekkar ñan joñan maroñ ko air im drettair. (1 Kor. 9:26) Kwoj ke katakin ajiri ro nejõm bwe ren uak ilo nan ko air make, im make kapoje katak ko air ilo Jikuul in Kwalok Nan eo an Kristian? (Sam 35:18) Kwoj ke katakin ajiri ro nejõm kilen em ñan em, kõmman dri katak ro, ak wãwen ko jet ilo jerbal in kwalok nan? Kwoj ke jibañ ir ñan kõmman air mejenkajik kin baptais, im jerbal in kwalok nan full time? Kwoj ke jibañ ir bwe ren kõmao ibben dri kwalok nan ro rekijejeto im remaroñ kõketak ir?—Ken. 13:20.
4. Ewi wãwen an ajiri ro bõk tokjen elañe jemeir im jineir rej jino katakin ir jen ke rej drik wõt?
4 Dri jeje sam ear ba: “Kwar katakin iõ jen ke iar drik, im ñõn kiõ ij kwalok kõmmõn ko am rekabwilõñlõñ.” (Sam 71:17, UBS) Kwon katakini ajiri ro nejõm ilo ien eo rej drik wõt bwe ren erom dri kwalok nan ro im dri karejar ro an Anij. Men ko kwoj katakin ir renaj jibañ ir ilo air naj rittolok.—Ken. 22:6.