Katakin Ajiri Ro Nejõm ñan Nebar Jehovah
1 Sam 148:12,13 ej rejañ ladik im ledik ro ñan “nebar etan Jeova.” Ilo jeje ko ilo Bible elõñ wanjoñok ko kin ajiri ro redik bwe rar kõmman eindein. Ñan wanjoñok, ‘Samuel e ar korijer iman Jeova, ke ear ajiri wõt.’ (1 Sam. 2:18) Ear wõr “juõn ledrik” eo ear ba ñan lio belen Naaman bwe ri kanan eo an Jehovah ilo Israel emaroñ kemour Naaman jen nañinmij in leper eo an. (2 Ki. 5:1-3) Ke Jesus ear deloñ iloan temple eo im kõmman men in bwilõñ ko relap, ‘ladik ro’ rar lamõj: “Hosana ñõn Nejin David!” (Mat. 21:15) Ewi wãwen jemeir im jineir rar katakin ajiri ro nejiir ñan nebar Jehovah?
2 Wanjoñok: Mokta jen air maroñ kanuij katakin ajiri ro nejiir bwe mol eo en bed ilo burueir, Ri Israel ro jemeir rar bõk nan in jiroñ bwe ren yokwe Jehovah im likite kien ko an moktata ilo burueir make. (Dut. 6:5-9) Elañe kwoj konono ilo juõn wãwen kõketak kin jerbal in kwalok nan im kõmman bwe ej mõttan jerbal eo ilo lajrak eo am kajjojo week, ajiri ro nejõm renaj watõke bwe jerbal in kwalok nan ej aorõk im juburu.
3 Juõn jeid im jatid kõrã ej mõnõnõ in kememej: “Ke iar rittolok, lajrak in family eo ear koba am bõk kunam ilo jerbal in kwalok nan aolep jemlokin week. Imaroñ lo bwe jema im jinõ rar lukkun mõnõnõ in kwalok nan. Kimar rittolok wõt im watõk bwe jerbal in kwalok nan ej juõn men ekamõnõnõ.” Kõrã in jeid im jatid ear erom juõn ri kwalok nan eo ejañin baptais ke ear jiljilimjuõn wõt yiõ dettan im kiõ ej bed ilo yiõ eo kein kajilñoul jilu in an jerbal in full time.
4 Katakin Ir Jidik kin Jidik: Kõmman bwe ajiri ro nejõm rej bõk kunair ñe komij jerbal in kwalok nan. Bõlen remaroñ kallallal wõt, lelok juõn tract ñan ri mweo, ak konono juõn eon. Men in enaj kalaplok mõnõnõ eo air im jibañ ir ñan kalaplok air liki kin maroñ eo air ñan kwalok kin ennan in Ailiñ eo. Ñe rej rittolok, joñan air bok kunair ilo jerbal in kwalok nan enaj laplok wõt. Inem, jibañ ir bwe ren wõnmanlok jidik kin jidik im lemnak kake kin mejenkajjik ko ilo jitõb.
5 Konono ibben elder ro ilo mõkaj ñe kwoj eñjake bwe ajiri ro nejõm rej tellokiir ñan erom ri kwalok eo ejañin baptaise im rej kalikar ilo nan ak kõmman bwe rekõnan kõmman eindein. Ñe rej erom juõn ri kwalok, enaj katakin ir bwe ewõr air make eddo ñan kaibujuij Jehovah. Jej kememej wõt bwe juõn ajiri ej jab aikwij jelã kin katak ko joñan wõt eo eritto im emwij an baptais, mokta jen an maroñ jino kwalok nan. Ajiri eo nejõm emelele ke irinekatak ko ilo Bible? Ej bokake ke kien ko ilo Bible kin mwil erreo im emõn? Ekõnan ke bõk kunan ilo jerbal in kwalok nan im kõmman bwe armij ro ren jelã kajjen einwõt juõn ian Ri Kennan ro an Jehovah? Elañe aet, elder ro remaroñ bebe bwe ej tellokin ri kwalok nan eo ejañin baptais.—Lale Organized to Do Jehovah’s Will (Bojak ñan Kõmanman Ankil an Jehovah) pp. 79-82.
6 Katakin ajiri ro ñan nebar Jehovah jen burueir ejjab juõn jerbal ebidodo. Bõtab, eiet men ko rej kalaplok lañliñ an ro jemen im jinen jen air lo an ajiri ro nejiir kõmman wõnmanlok ilo men ko lor jitõb. Elaplok an aorõk, Jehovah ej mõnõnõ ñe ajiri ro rej konono kin jerbal ko an raibujuij.
[Kajitõk Ko Ñan Katak]
1. Ajiri ro redik remaroñ ke nebar Jehovah?
2. Etke eaorõk bwe ro jemen im jinen ren likit juõn wanjoñok emõn ñan ajiri ro nejiir?
3. Ewi wãwen juõn jeid im jatid kõrã ear bõk tokjen jen joñok eo an jemen im jinen?
4. Ta melelen ñan katakin ajiri ro nejid jidik kin jidik?
5. Ta men in aikwij eo kin juõn ajiri ñan an tellokin ri kwalok nan eo ejañin baptais?
6. Etke ewõr tokjen ñan ro jemen im jinen bwe ren katakin ajiri ro nejiir?