Ro Jemen im Jinen—Katakin Ajiri ro Nejimi ñõn Kwalok Nan
1 Congregation ko ad rej jerammõn kin elõñ ajiri ro me ewor juõn kõnan emol ñõn karejar ñõn Anij. (Ekl. 12:1) Rej koba ibben ro Jehovah ej kirtok ir ñõn bõk kwunair ilo nebar e. (Sam 148:12-14) Kin men in, kaminene eo jen ran ñõn ran me ro jemen im jinen rej lelok ñõn ro nejiir en koba nan in kamelele ko kin ewi wãwen remaroñ jaketo-jaketak tõmak eo air ibben ro jet ilo jerbal in kwalok nan kin Ailiñ eo.—Dut. 6:6, 7.
2 Katakin Ajiri ro ilo Buñten Ne ko Rej Wõnmanlok: Ajiri ro rej aikwij kamineneik ir ñe rej dik wõt ñõn etal ibben ro jemeir im jineir ilo kwalok nan. Mokta jen rej etal ilo jerbal in kwalok nan, kaboj ro nejim ñõn bõk kwunair ilo juõn wãwen ewor tokjen. Bebe lok iman kin ta eo kwoj kõtmene ñõn air kõmmõne ilo kejem eo. Ro rej lukkun dik remaroñ lelok tract im handbill ko im kirtok armij ñõn Kingdom Hall eo. Ro redik me emõn air read jemaroñ kajitõk ibbeir ñõn konono juõn eon. Remaroñ lelok magazine ko, ilo air kajerbal juõn ennan ekadu. Ñe rej bõk kaminene, katakin ir ñõn kajerbal Bible eo ñe rej kwalok nan. Elõñ ri kwalok ro redik rar jino magazine route (kõmmõn karõk ñõn bar jeblak kin magazine ko rekãl) im ekeini air kõmmõn bar jeblak ko. Emõn lok elañe ajiri eo ej jerbal ibben juõn eo eritto jen ibben bar juõn ajiri. Eo eritto emaroñ kameleleik ri mweo bwe ej kamineneik eo edik ilo jerbal in kwalok nan.
3 Juõn ledik edik ear kajitõk ibben elder ro kin jibañ eo air bwe en maroñ tellokin erom juõn ri kwalok kin Ailiñ eo. Meñe ear lalim wõt an yiõ ilo ien eo im ejañin kar jela read, ear maroñ kwalok kin Ailiñ eo ilo bolemen ilo kejem ko. Ear jela tu-ia ebed eon ko ie, eliklok ñõn peij eo ilo book eo ijo eon ko rej bed ie, im kajitõk ibben ri mweo bwe en readi, inem ear kamelele kake.
4 Ro jemen im jinen rej aikwij bareinwõt katakin ajiri ro ikijen wanjoñok eo air kin aorõkin juõn schedule emõn ñõn keini air bõk kwunair ilo kwalok nan. Ro jemen im jinen rej aikwij kajutak juõn manit kin kwalok nan kajjojo week im eddeb ñõn karõk eo, bwe ajiri ro ren jela ien otemjej ñãt eo ilo week eo ej ñõn jerbal in kwalok nan.
5 Ñe rej katakin ajiri ro jen ke rej dik ñõn yokwe im lõñliñ kin jerbal in kwalok nan, renaj emmakit ñõn jibadõklok jerammõn ko relaplok ilo ran ko renaj itok, bõlen ekoba jerbal in pioneer. (1 Kor. 15:58) Kij aolep jej aikwij rejañ ajiri ro ibwiljid ñõn kõmmõn wõnmanlok ko remõn einwõt ri nebar ro an Jehovah.