Bõprae Am Jibadõk “Men ko Ejelok Tokjeir”
1 Juõn wãwen communicate ebuñbuñ rainin ej E-mail. Meñe ñan kwalok experience im lemnak ko am ibben family eo im ro mõttam ikijen ial in communicate in emaroñ ekkar, ta “men ko ejelok tokjeir” emaroñ koba ñe ele jen joñan am kajerbal E-mail?—Ken. 12:11.
2 Nan in Kakkõl ko Ikijen E-Mail: Jet rej ba bwe rej eñjake air ebakelok dolul eo an Jehovah ñe rej bõk ikijen E-mail men eo rej watõke einwõt kamelele ko rekãl. Men in emaroñ kitibuj air bõk experience ko, note ko kin men in walok ko ilo Bethel, report kin jorrãn ko ak matõrtõr, im bareinwõt kamelele ko rittino rej kejelã kaki ilo Kingdom Ministry School ko. Ro jet ej lap air kijerjer ñan jilkinlok ennan rot kein, ilo air kejatdikdik bwe en ir eo moktata ñan kwalok kin kamelele eo ñan ro mõttair.
3 Jet ien, kar ikũri ak kalaplap melele im experience kein. Ak bõlen ilo air kõnan kabwilõñ armij, jet rar kwalok juõn lemnak ewan. Ro rej kijerjer ñan kwalok men rot kein ekkã an jab wõr ibbeir aolep kamelele ko. (Ken. 29:20) Ilo jet case ko, meñe juõn bwebwenato ele jen ad maroñ tõmake, rej jaketo-jaketak kake einwõt juõn men in kaitoktoklimo. Report rot kein rejjab mol ak rej telbilo rej “bwebwenato rewan im jakkar,” me rejjab kowõnmanlok tiljek eo ekwojarjar.—1 Tim. 4:6, 7.
4 Elañe kwoj jilkinlok kamelele ko me rej kamol air jab jimwe, ewõr juõn eddo eo kwoj bõke kin buromõj im bwok eo emaroñ walok jen men in. Ke David ear bõk juõn report ear kalaplap bwe rar mõn aolep lõmaro nejin, ear “kekel nuknuk ko an” ilo buromõj. Bõtab, ilo mol, juõn wõt ian ro nejin maan ear mij. Men in ear bwe an kaburomõjmõj, ak kalaplap in report eo ear kalaplok an David buromõj. (2 Sam. 13:30-33) Emol jejjab kõnan kõmman jabdewõt men eo enaj telbiloik ak kabwer jabdewõt ian ro jeid im jatid.
5 Ial eo Ijjitõñ in Anij: Kememej bwe Jemed ilañ ewõr juõn an ial in communicate, “dri korijer e tiljek im meletlet.” “Dri korijer” in ewõr eddo eo ñan bebe kin kain kamelele rot eo enaj lelok ñan ri tõmak ro, im bareinwõt “ien emõn” ñan an walok. Ekan ko ilo jitõb rej bellok wõt ikijen dolul eo an Anij. Ien otemjej jen reilok ñan ial eo ijjitõñ in Anij ñan bõk melele ko remol, im jab ñan juõn kumi in ro rej kajerbal Internet eo.—Mat. 24:45.
6 Internet Web Site ko: Ewõr juõn Internet Web site kimij kajerbal: www.watchtower.org. Web site in ebwe ñan kwalok kamelele ko ñan armij. Ejelok aikwij bwe jabdewõt armij, committee, ak congregation en keboj bar juõn Web peij kin Ri Kennan ro an Jehovah. Jet rar je kobban book ko ad koba aolep eon ko im reference ko im rar bareinwõt tilmake copy in katak ko an convention eo ion bedbed in jabawõt ko. Meñe ewõr orlok in jen ak jab, manit in kõmman copy ko im jaketo-jaketak publication ko an Watchtower ilo juõn electronic document ej nae kien ko kin copyright. Meñe jet rar watõk men in einwõt juõn wãwen air jibañ brother ro, ejjab juõn karõk kar kowãppene im aikwij bõjrak air kõmmane.
7 Kwalok lolokjen im kõmmanwa ñe jej communicate ikijen kajerbal computer naj kõmman bwe lemnak ko ad en obrak kin “mweiuk otemjej re aurõk im remõn.”—Ken. 24:4.