Jen Kijejeto ilo Men ko Remõn!

¹ Ke jej ebakelok ien Kwojkwoj in Kememej eo ilo 2003, elõñ un ko ñan ad “kijejeto ilo men ko remõn.” (1 Pit. 3:13) Eo elaptata ian un kein ej kin katok in binmour eo an Jesus Christ. (Mat. 20:28; Jon 3:16) Ikijen men in, ri jilek Peter ear je: “Bwe kom jela ar jab binmour ñõn kom kin men in ijurwewe ko, kin silver im gold, jen ami mour bata . . . A kin bõtõktõk e aurõk, einwõt an lam ejelok notan im ekwojarjar, aet eo an Kraist.” (1 Pit. 1:18, 19) Kamolol kin wãwen in ekabwilõñlõñ ñan kwalok yokwe ej kamakit kij ñan ad boub in kõmman emõn, ilo ad kile bwe Jesus “E ar mõke lelok E kin kij, bwe En lomoren kij jen jerawiwi otemjej, im kokwojarjar ñõn E armij ro bwe ren An, ro rej kijejeto ilo jerbal ko remõn.”​—Taitõs 2:14; 2 Kor. 5:14, 15.

² Ñe jej kõmmane ta eo Anij ej buñburuen kake, jej lañliñ kin juõn kõtan emõn ibben im bed iumin lale eo an eyokwe. Peter ear bareinwõt ba: “Eo e konan yokwe mour, im lo ran ko remõn, . . . en illok jen nana im en kõmõn emõn; en kabukot ainemõn im lor e. Bwe mejen Iroij rej lale ro remõn, im lojiliñin rej ñõn jar ko air.” (1 Pit. 3:10-12) Ilo ien kein rekauwatata, ej juõn jerammõn elap ñan jelã bwe Jehovah ej lale kij im ebojak in emmakit ilo etad, im “kejbãrok [kij] einwõt iju in mejen.”​—Dut. 32:10; 2 Kron. 16:9.

³ Meñe rar jelmaik melejoñ ko, Ri Christian ro jinoin ro Peter ear jeje ñan ir rar obrak kin kijejeto eo rar jab maroñ kune, im rar keañ kin news eo emõn ilo joñan eo elaptata air maroñ. (1 Pit. 1:6; 4:12) Eindein an mol bareinwõt ibben armij ro an Anij rainin. Meñe jej jokwe ilo “ien ko renana,” kamolol kin emõn eo an Anij ej kamakit kij ñan ad kijejeto in kõmanman ankil an. (2 Tim. 3:1; Sam 145:7) Jen lemnak kin jet ian jerbal ko remõn jenaj boub kaki ilo ien Kwojkwoj in Kememej eo.

⁴ Kirtok Ro Jet ñan Kwojkwoj in Kememej eo: Juõn wãwen jemaroñ kwalok ad kamolol kin men in letok eo ekabwilõñlõñ kin binmour eo ej ilo ad bed ilo ien kememe mij eo an Jesus kajjojo yiõ, eo jenaj kememe ilo yiõ in ilo Wednesday, April 16, elikin tulok in al. (Luk 22:19, 20) Yiõ eo lok, ke 94,600 congregation ko rar kwalok tõbrak ko air ibelakin lal, ekar wõr juõn oran elap in 15,597,746 ro rar kwelok! Melelen men in bwe elõñlok jen 220,000 armij ro rar kwelok jen yiõ eo lok juõn.

⁵ Jete armij ro renaj kwelok ilo yiõ in? Men in ej wawa ion jibadbad ko ad ñan rejañ ro jet ñan koba ibbed. Jino ilo am kõmmane juõn lajrak in etan aolep ro kwo kõnan kirtok ir. Ilõñtata en etan ro uan family eo am. Elañe beleõm ejjab juõn ri tõmak, kwalok kõnan eo jen buruõm bwe en kwelok ibbam. Juõn leo belen ejjab tõmak ear ba bwe ear bed ilo Kwojkwoj in Kememej ilo yiõ eo lok kinke ear lo bwe bed eo an ear lap an aorõk ñan lio belen. Jeltokin ilo lajrak eo am emaroñ ro nukõm, ri turõm, ri jerbal ro mõttam, ak ri school ro mõttam. Kwon jab meloklok in kirtok ri katak Bible ro am.

⁶ Elikin am kõmmane lajrak eo am, karõk ien ñan am kirtok kajjojo iair. Kajerbal peba in kir ko ñan Kwojkwoj in Kememej eo. Ñan jibañ armij ñan kememej ia eo im ñããt eo Kwojkwoj eo enaj walok ie, type ak jeje ilo alikar awa eo im jikin eo itu-lal in peba in kir eo. Ke ej ebaktok April 16, kwon kakememej ro ilo lajrak eo am, ilo am make lolok ir ak ikijen am telephone lok ñan ir. Jen jibañ elõñ armij joñan wõt ad maroñ bwe ren bed ilo ien in elaptata an kwojarjar.

⁷ Jibañ Ro Rej Bed ilo Kwojkwoj in Kememej eo: Ien otemjej boñin Kwojkwoj in Kememej eo ej juõn ien ekairujruj. Ewõr ien emõn ñan karuwaineneiktok ro ekkã air jab bed ilo kwelok ko ad. Kõmman karõk ko ñan am mõkaj tok im rumij am rol, ekkar ñan wãwen ko ilo bukwon eo. Bõk buñten nee ko mokta ñan jelã kajjen ro rekãl rej kwelok. Kwon kwalok juõn jitõb emãnãn im karuwainene.​—Rom 12:13.

⁸ Jemaroñ ke jibañ jet ro rar bed ilo Kwojkwoj in Kememej eo ñan kõmman wõnmanlok ko ilo jitõb ikijen juõn katak kin Bible? Kate yuk ñan bõk ãt ko etan armij im address ko an jabdewõt ri lotok ro me ejelok juõn ej lolok ir bwe kwon maroñ jibañ ir. Kin jibañ ko reyokwe, jet iair remaroñ wõnmanlok im tellokin air erom ri kwalok ro rejañin baptais mokta jen Kwojkwoj in Kememej eo ilo yiõ in lal. Ñe kwoj bar jeblak ibben ro rar bed ilo Kwojkwoj in Kememej eo, lelok juõn nan in kir ñan special talk eo enaj walok ilo April 27.

⁹ Kwomaroñ ke Auxiliary Pioneer ilo Alliñ ko Iman in Ien Rak? Kajjojo yiõ kijejeto eo ad ñan Jehovah ej kamakit kij ñan kate wõt joñan ad maroñ ilo jerbal in kwalok nan ilo alliñ ko jej kalaplok jerbal in kwalok nan eo ad. Iumin Ra eo ilo Guam, ear wõr 304 auxiliary pioneer ro ilo March ilo yiõ eo lok im 125 ro rar auxiliary pioneer ilo April. Jibadbad ko reburukuk an juõn congregation ñan kwalok kin news eo emõn ilo kijejeto ilo ien Kwojkwoj in Kememej eo emaroñ kwalok tokjen ko remõn.

¹⁰ Juõn congregation ilo United States me ewõr 107 ri kwalok ro im 9 regular pioneer ro ear report bwe April ilo yiõ eo lok ear juõn “alliñ elap an emõn,” kinke 53 armij rar jerbal einwõt auxiliary pioneer ro, ekoba aolep elder im ministerial servant ro. Ewi wãwen elder ro rar kalaplok kijejeto eo kin jerbal in auxiliary pioneer ilo alliñ eo? Mokta lok iman, rar rejañ elõñ ñan kanne air application. Rar karõk bwe en wõr kwelok ko ñan kwalok nan ilo elõñ ien ko ilo juõn ran bwe en jejjet ñan aolep ro ilo congregation eo. Ear lap air rejañ kin kwalok nan ikijen kajerbal telephone, elaptata ñan ro renañinmij. Kwalok nan ikijen kajerbal telephone ilo jota im ilo ien ko jet ej juõn wãwen ekeie ñan konono ibben armij ro rej jokwe ilo moko ak jikin eo ebin deloñ ie. Ej bareinwõt kamaroñ ri kwalok ro ñan iion armij ro rej jako jen moko imwiir ilo ran.

¹¹ Elder ro rar kajemlok report eo air ilo air ba: “Ear juõn ien elap an kamõnõnõ im kimij kamolol kin ien kein remõn ñan kalaplok am jerbal im kin jerammõn ko Jehovah ear letok ñan kim kajjojo.” Kin karõk ko remõn, congregation eo am bareinwõt emaroñ lañliñ kin jerammõn rot kein.

¹² Kate Kom Bwe 100-Percent Ren Bõk Kunair ilo Jerbal in Kwalok Nan: Yokwe eo ad ñan Anij im ri turid ej kamakit kij ñan wiaik ien kajjojo alliñ ñan bõk kunad im jaketo-jaketak news eo emõn ibben ro jet. (Mat. 22:37-39) Congregation Book Study overseer ro im ri jibañ ro mõttair ren kate ir jibañ ro ilo kumi eo air ñan bõk kunair ilo jerbal in kwalok nan kajjojo alliñ. Juõn wãwen emõn ñan kõmmane men in ej ilo ad karõk lok iman ñan jerbal ibben jet armij ilo kumi eo. Jen am kõttar mae jemlokin alliñ eo ñan kõmmane men in, kwon jinoe ilo mõkaj. Men in enaj lewõj elõñlok ien ko remõn ñan lelok jibañ ko reyokwe.

¹³ Ewõr ke ri kwalok ro remõjno ilo kumi in book study eo am me ebin air bõk kunair ilo jerbal in kwalok nan? Elañe jet rej bed ilo imõn ritto ro ak rejjab maroñ dioj jen moko imwiir, ealikar bwe ewõr joñan ien ko remaroñ kwalok nan. Ak ilo air kortokjen ien ko remõn, meñe ewõr joñan, ñan kõtlok bwe meram eo air en romak, remaroñ kamakit ro rej lo jerbal ko air remõn ñan itoklimo ilo mol eo. (Mat. 5:16) Book study overseer ro ren kejelãik rein bwe remaroñ reporte jerbal in kwalok nan eo air ilo joñan in 15 minute aetokin. Kin air maroñ reporte ien eo rej kajerbale ñan kwalok nan ej kõketak ri kwalok rein retiljek im ej bõktok ñan ir juburu eo ekalañliñ. Ej jibañ bareinwõt ñan kõmman bwe report eo kin jerbal in kwalok nan ibelakin lal an armij ro an Anij en jejjet.

¹⁴ Jodikdik Ro Rej Boub in Kõmman Emõn! Elap an kemourur ñan lo Christian jodikdik ro rej kajerbal kajur im maroñ ko air ilo jerbal eo an Jehovah! (Ken. 20:29) Elañe kwoj dik wõt, ewi wãwen kwomaroñ kwalok kijejeto eo am ñan Jehovah ilo alliñ kein jej kõmman jerbal ko relaplok?

¹⁵ Elañe kwojañin juõn ri kwalok ejañin baptais ilo congregation eo, kwomaroñ ke kate yuk ñan jibadõke jerammõn in? Kajitõkin yuk make kin kajitõk kein: ‘Ewõr ke ibba jelãlokjen kin irinekatak ko ilo Bible? I kõnan ke bõk kunaõ ilo jerbal kin Ailiñ eo? Emõn ke mwiliõ? I maroñ ke kwalok tõmak eo aõ ilo aõ konono ibben ro jet kin news eo emõn? Buruõ ej kamakit iõ ke ñan kõmmane?’ Elañe kwomaroñ uak aet ñan kajitõk kein, inem konono ibben jemõm im jinõm kin kõnan eo am ñan erom juõn ri kwalok nan. Jemõm im jinõm remaroñ kebak elder ro ilo service committee eo.

¹⁶ Elañe ededelok am juõn ri kwalok kin news eo emõn, kwomaroñ ke kortokjen ien kakije eo am jen school ñan kalaplok jerbal in kwalok nan eo am? Ilo an wõr juõn schedule emõn im jibañ jen jemeir im jineir im ro jet, elõñ jodikdik ro emwij air baptais rar maroñ auxiliary pioneer. Elañe kwojjab maroñ, inem kwon bebe ilo buruõm ñan kalaplok ijo kunam ilo jerbal in kwalok nan. Likit juõn mejenkajjik ñan kwe make. Ijellokin juõn mejenkajjik kin awa ko kwonaj kajerbali ilo kwalok nan, likit bar juõn mejenkajjik ewõr kõtan ñan emõnin jerbal in kwalok nan eo am. Bõlen kwomaroñ kate yuk ñan kwalok juõn eon ilo kajjojo moko kwoj kwalok nan ie, kakõmanmanlok wãwen am jerbal ñe kwoj bar jeblak ibben ro kwar konono ibbeir mokta, jino juõn Bible study, ak kalaplok jerbal eo ilo am kobaik kwalok nan ikijen kajerbal telephone ak bar juõn wãwen kwalok nan. Ta kin mejenkajjik eo ñan jibañ juõn ri turõm, juõn ri school eo mõttam, ak juõn nukõm ñan itok ibbam ñan Kwojkwoj in Kememej eo ilo yiõ in? Ilo am bõk kunam joñan wõt am maroñ ilo makitkit rot kein enaj lap an wõr tokjen im enaj kõketak ro jet ilo congregation eo.​—1 Tess. 5:11.

¹⁷ Jibañ Ro Rekãl ñan Kõmman Wõnmanlok: Ilo yiõ in jerbal eo lok, rar kõmman juõn joñan in 2,391 Bible study ko kajjojo alliñ iumin Ra eo ilo Guam. Juõn ien, elõñ ian ri katak rein renaj wõnmanlok ñan joñan eo renaj wujleplok air mour im baptais. Bõtab, mokta jen air tõbar mejenkajjik in, jej aikwij jibañ ir ñan air maroñ erom ri kwalok ro kin news eo emõn. Men in ej juõn buñten nee eaorõk ñan katakin ro rekãl ñan air erom ri kalor ro an Jesus Christ. (Mat. 9:9; Luk 6:40) Ewõr ke juõn ri katak Bible eo ebojak in bõk buñten nee in?

¹⁸ Elañe kwojjab lukkun jelã kin wõnmanlok eo an ri katak eo am, bõk jibañ jen book study overseer eo am ak service overseer eo. Bõlen kwomaroñ kajitõk ibben ñan an etal ibbam lok ñan ibben ri katak eo. Brother rein ewõr iminene ko raorõk me remaroñ kajerbali ñan etale wõnmanlok eo ilo jitõb an ri katak eo. Remaroñ kwalok jet nan in rejañ ko me renaj jibañ ri katak eo ñan etal wõt im kõmman wõnmanlok ko ilo jitõb.

¹⁹ Ñe ri katak eo am ej kwalok an kõnan erom juõn ri kwalok ejañin baptais im kwoj eñjake bwe ej tellokin, konono ibben presiding overseer eo. Enaj karõk bwe ruo elder ro ren kwelok ibbam im ibben ri katak eo ñan lale elañe ej tellokin, ilo air kajerbal kamelele ko ilo peij 98-9 ilo Our Ministry book eo. (Lale Watchtower ilo kajin English, November 15, 1988, peij 17.) Elañe rej kowãppen ri katak eo ñan erom juõn ri kwalok, kwon mõkaj im kamineneik e. Ñe ej kadeloñ juõn report in kwalok nan, renaj kejelãik congregation eo bwe ri katak eo ej juõn ri kwalok ejañin baptais. Ej kejatdikdik eo ad bwe elõñ thousand ri kwalok ro rekãl, dik im ritto jimor, ren tõbar buñten nee in eaorõk ilo alliñ kein jej kõmman jerbal ko relaplok.

²⁰ Kõmman Karõk ko Rej Jibañ ñan Kõtõbrak Men ko Remõntata: Kõmman karõk ko lok iman raorõk ñan ad lo tõbrak ilo makitkit ko ad ilo ien Kwojkwoj in Kememej eo. (Ken. 21:5) Elõñ men ko elder ro rej aikwij lale.

²¹ Ñan jibañ congregation eo ñan lo tõbrak eo elaptata ilo jerbal in kwalok nan, elder ro ren kõmman karõk ko kin kwelok ko ñan kwalok nan ilo aolepen week eo im ilo weekend eo. Service overseer eo en tel ilo kõmman karõk kein. Remaroñ ke kõmman karõk ko jet ilo jibboñtata, ilo awa ko itujemlokin ilo raelep, ak ilo awa ko jinoin ilo jota? Ren kejelãik congregation eo kin karõk kein. Emaroñ juõn men in jibañ elañe rej likit schedule eo ion board in kejelã eo.

²² Elder ro ren lale bwe karõk ko kin Kwojkwoj in Kememej eo ren dedelok im bin mokta jen April 16. Ren kejelãik congregation eo kin jabdewõt oktak ko kin schedule in kwelok ko ilo week eo. Ilo air tiljek in lale men kein renaj kõmman bwe ilo kwojkwoj eo “ren kõmõn men otemjej ekar im ilo lajrõk.”​—1 Kor. 14:40.

²³ Ro bõran family ko remaroñ kõnan kajerbal juõn mõttan in katak eo an family eo ñan bwebwenato kin ewi wãwen remaroñ bõk kunair ilo jerbal ko relaplok ilo ien Kwojkwoj in Kememej eo. Aolepen family eo am remaroñ ke auxiliary pioneer? Ak ro ilo family eo remaroñ ke rejetak juõn ak elõñlok ro uair ñan air kõmmane? Elañe rejjab maroñ, likit jet mejenkajjik ko einwõt juõn family ñan kalõñlok awa ko rej kajerbali ilo jerbal in kwalok nan. Ewõr ke juõn ajiri ilo family eo me emaroñ tellokin an erom juõn ri kwalok eo ejañin baptais elañe ej bõk jidik nan in rejañ im jibañ? Jete armij family eo am emaroñ kirtok ñan Kwojkwoj in Kememej eo ilo yiõ in? Karõk ko remõn renaj bõktok elõñ jerammõn im lañliñ ko ñan family eo am.

²⁴ Lukkun Kortokjen Bwen Ien eo: Ilo an jeje ñan Ri Christian ro ilo ebeben eo kein kajuõn, ri jilek Peter ear kakememej ir kin ekaiuriur in ien eo kinke jemlokin jukjuk im bed eo an Ri Jew ro ear ebak. (1 Pit. 4:7) Rainin aolep kein kamol ko rej kalikar bwe jemlokin jukjuk in bed in kiõ ej ebak. Ran otemjej, wãwen mour eo ad en kwalok tõmak in. Einwõt ri karejar ro rekijejeto an Jehovah, jen lemnakelok jerbal eo eaorõk ñan keañ kin news eo emõn.​—Taitõs 2:13, 14.

²⁵ Kiõ ej ien eo ñan ad kwalok kijejeto im jerbal! Kalmenlokjen kin ta eo Jehovah ear kõmmane ñan kwe, family eo am, im congregation eo. Meñe jejjab maroñ kõllã kin aolep wãwen ko jaar bõk tokjen jen e, jemaroñ kabuñ ñan Jehovah kin aolepen buruõd. (Sam 116:12-14) Jibadbad ko ad retiljek renaj bõktok ãjinkij eo kin kajerammõn ko jen Jehovah. (Ken. 10:22) Jen aolep “kijejeto ilo men ko remõn” ilo ien in ejej uan kin jerbal ko relaplok, “bwe ilo men otemjej ren kaibujuij Anij kin Jisõs Kraist.”​—1 Pit. 3:13; 4:11.

[Box eo ilo peij 3]

Oran Ri Kwelok Ro Ilo Kwojkwoj in Kememej eo Ibelakin Lal

1999 14,088,751

2000 14,872,086

2001 15,374,986

2002 15,597,746

[Box eo ilo peij 4]

Wõn Ro Kwonaj Kirtok Ir ñan Kwojkwoj in Kememej eo?

□ Ro uan family eo im ro nukõm

□ Ro ri turõm im ro mõttam

□ Ri jerbal ro mõttam im ri school ro mõttam

□ Ro jej bar jeblak ibbeir im ri katak Bible ro

[Box eo ilo peij 5]

Jibañ Ro Rej Bed ilo Kwojkwoj in Kememej eo

□ Karuwaineneiktok ir

□ Bar jeblak ibbeir

□ Tilmaake juõn katak kin Bible

□ Kirtok ir ñan special talk eo