“Kajejjet Am Kwalok Nan in Anij”

¹ Ñe ej mol kamolol eo am kin am bõk juõn men emõn, kwojjab kwalok e ke ikijen lemnak im kõmman ko am? Aet kwoj kõmmane! Ikijen lejokmen im joij in yokwe me Jehovah ej kwaloke ñan armij, lale kin ewi wãwen an kar ri jilek Paul emmakit. Ear ba: “Kamolol Anij kin An men in letok eo elap jen maroñ in ba”! Ta eo “men in letok eo elap” ej kitibuj? Aolep “joij an Anij” me ej kwaloki ñan kij, im eo elaptata ej men in letok eo kin Nejin make einwõt juõn binmour kin jerawiwi ko ad.​​—2 Kor. 9:14, 15; Jon 3:16.

² Paul ear kwaloke ke kamolol eo an ilo nan ko wõt? Emol jaab! Ear kwalok kamolol eo an emũlal ilo elõñ wãwen ko. Ear lap an itoklimo kin mour in jitõb eo an Ri Christian ro mõttan im ear kõnan kõmman joñan an maroñ ñan jibañ ir bõk tokjen eo elaptata jen joij in yokwe an Anij. Ikijen rein, Paul ear ba: “Ein drein kin an lap am yokwe kom, kim ar kõnan lewoj ñõn kom jab gospel eo wõt, a bareinwõt am mour, bwe kom jitenburu ibem.” (1 Tess. 2:8) Ijellokin an jibañ ro rar mõttan congregation eo kadede ñan bõk lomor, ilo jab mõk Paul ear kwalok kin news eo emõn, im ito-itak iumin elõñ thousand mile ko ion ene im ilo lojet ñan bukõt “ro jabrewõt ar likit ir bwe ren mour in drio.” (Jerbal 13:48) Kamolol eo emũlal an Paul kin aolep men ko Jehovah ear kõmmane ñan e kar kamakit e ñan “kajejjet an kwalok nan in Anij.”​​—Kol. 1:25, NW.

³ Kamolol eo ad kin aolep men ko Jehovah ear kõmmani ñan kij ejjab kamakit kij ke ñan lelok jibañ kin men ko ilo jitõb ñan ro rej aikwiji jibañ ilo congregation eo ad? (Gal. 6:10) Im ejjab kamakit kij ke ñan bõk kunad ilo joñan ad maroñ ñan kwalok kin news eo emõn kin Ailiñ eo ilujen territory eo ad?​​—Mat. 24:14.

⁴ Juõn Ien Emõn ñan Kwalok Kamolol: Kwojkwoj eo kin mij eo an Christ kajjojo yiõ ej letok ñan kij juõn ien emõn ñan kwalok ad kamolol kin ta eo Jehovah im Jesus rar kõmmane ñan kij. Ien in ejjab juõn kwelok bajjek ak ñan baj kememe juõn men eo ear walok. Jesus ear ba: “Komin kõmõn men in ilo ememej Iõ.” (Luk 22:19) Kwojkwoj in kememej mij eo an Christ ej juõn ien ñan kalmenlokjen kin kain armij rot eo Jesus. Ej juõn ien ñan kile bwe ej mour im ej boub in jerbal rainin, kin aibujuij im maroñ in iroij kar lelok ñan e kin tokjen ial in mour eo an etiljek im katok eo an. Kememe in ej bareinwõt juõn ien emõn ñan kwalok ad kõttãik kij ñan maroñ in bõr eo an Christ ke ej tel men ko im makitkit ko an congregation in Christian. (Kol. 1:17-20) Armij ro otemjej an Anij ren ilo kautiej bed ilo Kwojkwoj in kememej mij eo an Christ. Ilo yiõ in enaj walok elikin tulok in al ilo Thursday, March 28, 2002.

⁵ Kin jibadbad ko relap kar kõmmane mokta jen ad kememe Kwojkwoj kin Kejota eo ilo yiõ eo lok, jaar lo juõn laplok in 6,041 armij ro rar bed ilo kwelok eo iumin Ra eo ilo Guam. Ewi joñan armij ro renaj bed ilo kwelok eo ilo yiõ in? Elap ej wawa ion ad “jerbal im kate [kij]” ñan jibañ elõñ armij joñan ad maroñ ñan air bed ilo kwelok eo.​​—1 Tim. 4:10.

⁶ Ijellokin ad bed ilo Kwojkwoj in Kejota eo an Iroij, jemaroñ kalaplok jerbal im kwalok nan eo ad. Ejelok bere, elõñ brother in sister ro renaj auxiliary pioneer ilo juõn ak elõñlok alliñ ko ilo ien Kwojkwoj in Kejota eo, jen March ñan May. Kwomaroñ ke karõk men ko am bwe kwon maroñ lañliñ kin jerammõn in kin auxiliary pioneer ilo yiõ in? Enaj juõn wãwen emõn ñan kwalok kamolol eo am kin men in letok eo eyokwe an Anij kin katok in binmour eo an Christ. Kwomaroñ liki kin kajerammõn eo an Jehovah, einwõt experience ko tok renaj kwaloki.

⁷ Juõn sister eo ewõr an job full-time ear je kin experience eo an ke ear auxiliary pioneer ilo March eo lok: “February 2001 Ad Jerbal Ñan Ailiñ Eo ear rejañ aolep ro remaroñ ñan auxiliary pioneer ilo ien Kwojkwoj in Kejota eo. Kin an kar wõr lalem Saturday ilo March, men in ear jejjet ñan schedule eo aõ. Inem iar bebe ñan kadeloñ application eo aõ.” Ke ear jino alliñ eo, sister eo ear likit juõn an make mejenkajjik ñan kajeoñ in kajutak juõn Bible study. Ear lo ke tõbrak? Aet, ilo awa eo kein ka 52 ilo an kwalok nan ilo alliñ eo! Ta jemlok eo ear bõke? “Ewõr jerammõn ko remõn ñe jej kalaplok jibadbad ko ad.”

⁸ Ta tokjen ko rej walok ñan juõn family eo ej pioneer ibben don? Juõn family eo ewõr emen uair me rar pioneer ilo April eo lok rar lo bwe e kar juõn alliñ rejamin melokloke. Jinen family eo ear ba: “Kajjojo ran ear wõr juõn lemnak emõn ibbem, ke kimar koba ibben don ilo jerbal in kwalok nan! Bwebwenato ko kin makitkit ko am ilo jerbal in kwalok nan kajjojo ran ear kõmman bwe ien kejota eo en juõn ien ekalañliñ.” Ladik eo nejin ear ba: “Iar mõnõnõ in jerbal ibben jema ilo jerbal in kwalok nan ilo week eo, ke ekkã an kar bed ilo jikin jerbal eo an.” Jemen ear kakobaik: “Einwõt bõran family eo, iar eñjake aõ juburu in jelã bwe kimar jerbal ibben don ilo jerbal eo elaptata an aorõk ilo ien in.” Family eo am emaroñ ke pioneer ibben don? Etke komin jab bwebwenato ibben don einwõt juõn family im lale elañe aolepen family eo emaroñ auxiliary pioneer ilo ien Kwojkwoj in Kejota eo ilo yiõ in?

⁹ Jemaroñ Kõmman ke bwe March En Alliñ eo Ad Emõntata? Ilo jinoin 2000, Ad Jerbal Ñan Ailiñ Eo ear bõkmantak juõn kajitõk: “Jemaroñ Kõmman ke Bwe April 2000 En Alliñ eo Ad Emõntata?” Kar ta uak eo? Kar wõr juõn laplok elap ilo juõn alliñ kin auxiliary pioneer ro ilo Micronesia. Kwoj kememej ke kijejeto eo ear walok ilo congregation eo am kin aolep makitkit ko ilo jitõb ilo alliñ eo ejej uan? Jemaroñ ke kõmman ejja joñan eo wõt ak bõlen le jen tõbrak kan ilo yiõ in? Kin jibadbad ko an aolep, March 2002 emaroñ “Alliñ eo Ad Emõntata.” Etke March?

¹⁰ Ewõr ruo un ko unin March ej juõn alliñ ejej uan kin makitkit ko. Mokta, Kwojkwoj in Kejota eo enaj walok ilo tujemlokin alliñ in March, im ej letok ñan kij ien eo emõn ilo jinoin alliñ eo ñan kirtok elõñ armij joñan ad maroñ ñan bed ilo kwelok eo. Kein karuo, ilo yiõ in March ewõr lalem Saturday im Sunday, im men in ej kõmman bwe en bidodolok an ro rej jerbal ak bed ilo school ñan auxiliary pioneer. Etke kwojjab jijet im kõmman juõn schedule ekeie, ilo kajerbal calendar eo ilo insert in? Auxiliary pioneer emaroñ bidodolok jen am lemnak kake. Ñan wanjoñok, ilo am karõk ñan jerbal 8 awa ko ilo jerbal in kwalok nan ilo kajjojo ran ko ilo weekend ko lalem, kwonaj aikwij baj 10 wõt awa ko jet ilo alliñ eo ñan tõbar 50 awa ko kwoj aikwiji.

¹¹ Ta eo elder ro remaroñ kõmmane ñan jibañ aolep ro ilo congregation eo ñan kajejjet air kwalok nan in Anij”? Ikijen mõttan ko ilo kwelok ko im bwebwenato ko air remaroñ kalek kijejeto eo an armij. Ri tel in Congregation Book Study ko im ri jibañ ro air remaroñ bõk buñten nee ko ñan konono ibben kajjojo armij ilo kumi eo air im lelok jibañ. Jet nan in rejañ ko rejoij ak nan in rejañ ko rekeie emaroñ men eo rej aikwiji. (Ken. 25:11) Elõñ renaj lo bwe kin jet wõt oktak ko ilo schedule eo air, remaroñ lañliñ kin jerammõn eo ñan jerbal einwõt auxiliary pioneer ro. Ilo elõñ congregation ko, elõñ, elañe jab aolep, elder ro im ministerial servant ro im limaro beleir rej likit juõn joñok emõn ilo air auxiliary pioneer ibben don ilo ien Kwojkwoj in Kejota eo. Men in ear rejañ elõñ ri kwalok ro ñan koba ibbeir. Kin utame ko ilo enbwiniir ak kin wãwen ko jet ibbeir, jet ri kwalok ro rejjab maroñ pioneer, ak jemaroñ rejañ ir ñan kwalok kamolol eo air ilo air kõmman joñan air maroñ ilo jerbal in kwalok nan ibben ro jet ilo congregation eo.

¹² Tõbrak ko rej wawa ion karõk ko remõn elder ro rej kõmmani. Kwelok ko ñan kwalok nan ren karõki ilo ien ko rekkar ilo week eo. Elañe emaroñ, service overseer eo en karõk lok iman brother ro rej tellokiir ñan tel ilo aolep kwelok ko ñan kwalok nan. Kebojak ko remõn rej men in aikwij bwe kwelok kein ren jab le jen 10 ñan 15 minute ko, ekoba karõk kumi ko, lelok territory, im jar. (Lale Box in Kajitõk ilo September 2001 Ad Jerbal Ñan Ailiñ Eo.) Juõn schedule kin makitkit ko ilo alliñ eo ren kameleleiki ilo alikar ñan congregation eo im kõlake ion board in kejelã eo.

¹³ Ej aikwij bwe territory ko. Service overseer eo en kwelok ibben brother eo ej lolorjake territory ko ñan kõmman karõk ko ñan jerbal ilo jikin ko ejeja air jerbal ie. Ren kalikar aikwij eo ñan bar jeblak ñan moko ear jako armij ro ie, kwalok nan iturin ial ko im jen mõn wia ñan mõn wia, im jerbal in kwalok nan ilo jota. Ijo ekkar, jet ri kwalok ro remaroñ bõk jibañ ñan kwalok nan ikijen kajerbal telephone.

¹⁴ Jibañ Ir ñan Bar Jerbal: Ewõr ke jabdewõt armij ilo territory an congregation eo am me ejako air kwalok kin news eo emõn? Rein rej mõttan wõt congregation eo im rej aikwiji jibañ. (Sam 119:176) Kinke jemlokin jukjuk im bed in ebak im lal eo ekãl ej bed iman, ewõr un emõn ibbed ñan kate kij ñan jibañ ro rar oktak im inactive (ro rar bõjrak air kwalok nan). (Rom 13:11, 12) Kajjojo yiõ elõñ thousand armij ibelakin lal rar uak ilo emõn ñan jibañ ko kar liloki ñan ir im rar oktak im bar jino air kwalok nan. Ta eo jemaroñ kõmmane ñan jibañ elõñlok armij ñan kakajurlok yokwe im liki eo kar wõr ibbeir ilo jinoin air kwalok nan?​​—Hib. 3:12-14.

¹⁵ Kumi in elder ro renaj etale ewi wãwen remaroñ jibañ ro rar oktak im inactive ilo yiõ ko kiõ rej kab motlok. (Mat. 18:12-14) Secretary eo en lale Congregation’s Publisher Report card ko im je etan aolep ro rar oktak im inactive. Renaj kõmman juõn jibadbad ejej uan ñan lelok jibañ ikijen karõk in shepherd. Juõn elder emaroñ kõnan lolok juõn ri kwalok kin an kar lukkun ebak e mokta, ak emaroñ kajitõk ibben ri kwalok ro jet ñan jibañ. Bõlen rar katak ibben armij eo ej inactive im rej mõnõnõ in lelok jibañ ilo ien in rej bed ilo aikwij. Jej kejatdikdik, bwe elõñ ian ro rej inactive renaj emmakit ñan bar jino air kwalok nan kin nan in Anij. Elañe rej tellokiir, ejelok juõn ien emõnlok ñan air bar jino kwalok nan jen ilo ien Kwojkwoj in Kejota eo!​​—Lale Box in Kajitõk eo ilo November 2000 Ad Jerbal Ñan Ailiñ Eo kin kamelele ko jet.

¹⁶ Ro Jet Rej Tellokiir ke ñan Kwalok Nan? Jehovah ej wõnmanlok im kajerammõn armij ro an ilo an bõktok “men ko remõn jen ailiñ ko otemjej.” (Hag. 2:7, NW) Kajjojo yiõ elõñ thousand armij rej tellokiir ñan erom ri kwalok nan rejañin baptais. Wõn rein? Ajiri ro nejin Ri Kennan ro an Jehovah im bareinwõt ri katak Bible ro. Ewi wãwen ad jelã elañe rej tellokiir ñan erom ri kwalok ro kin news eo emõn?

¹⁷ Ajiri ro Nejin Ri Kennan ro an Jehovah: Elõñ ajiri ro rar etal jen em ñan em ibben jemeir im jineir iumin elõñ yiõ ko, meñe rejañin jerbal einwõt ri kwalok ro rejañin baptais. March enaj juõn ien emõn ñan air jinoe. Ewi wãwen am jelã elañe nejõm ej tellokin? Peij 100 ilo book in Organized to Accomplish Our Ministry ej ba bwe “ñe emõn mwilin juõn ajiri im emaroñ make kwalok kin tõmak eo an ilo an konono ibben ro jet kin news eo emõn, eo buruen ej kamakit e ñan kõmmane.” Elañe kwoj lemnak bwe nejõm etellokin, konono ibben juõn ian elder ro ilo Congregation Service Committee.

¹⁸ Ri Katak Bible ro Rej Tellokiir: Elikin an juõn ri katak Bible bõk jelãlokjen im bed ilo kwelok ko, emaroñ kõnan erom juõn ri kwalok kin Ailiñ eo. Elañe kwoj katak ibben juõn ri katak einwõt in, lemnak kin kajitõk kein: Ej kõmman ke wõnmanlok, ekkar ñan dettan im maroñ eo an? Emwij ke an kwalok kin tõmak eo an ibben ro jet? Ej kõnak ke “armij ekãl”? (Kol. 3:10) Ej kajejjet ke aolep men in aikwij ko ñan ri kwalok ro rejañin baptais, einwõt kar kõlajraki ilo peij 97-9 ilo Our Ministry book eo? Elañe aet, kwon kebak Congregation Service Committee eo bwe ren maroñ kõmman karõk ko bwe ruo elder ro ren maroñ kwelok ibbam im ri katak eo. Elañe ej tellokin, elder ro ruo renaj kejelãik e bwe emaroñ jino an bõk kunan ilo jerbal in kwalok nan.

¹⁹ Ta Kin April im May? Alliñ kein renaj bareinwõt alliñ ko rejej uair kin jerbal ko relaplok ñan kwalok nan. Elõñ ro rej auxiliary pioneer ilo March renaj maroñ bareinwõt kõmmane ilo April im/ak May. Ilo April im May, enaj laptata ad kwalok magazine ko in Imõniaroñroñ im Awake! Elukkun lap tokjen ko rar walok ilo mour ko an ro rej readi! Magazine kein elap air jibañ ñan kõtõbrak laplok eo ekabwilõñlõñ me jej iioni ibelakin lal. Juõn jibadbad ejej uan naj kõmmane ilo April im May ñan lelok magazine kein ñan joñan eo elaptata in armij einwõt ad maroñ. Karõk kiõ ñan bõk kunam ilo joñan am maroñ.

²⁰ Kin jerbal eo elaplok kar karõke, kwoj aikwij kalaplok ke oran magazine ko kwoj bõki ilo congregation eo? Ilo aolepen yiõ in jerbal eo, jej lelok Imõniaroñroñ im Awake! ilo kajjojo Saturday, Ran in Magazine eo ad emwij karõke. Bõtab, ke elõñ armij renaj bõk kunair ilo jerbal in auxiliary pioneer im kij aolep jenaj lelok magazine ko ilo aolepen ruo alliñ, emaroñ juõn men in aikwij ñan kalaplok oran magazine ko kwoj bõki ilo congregation eo. Elañe kwonaj kõmmane, joij im kejelãik eo ej lale jikin magazine ilo congregation eo am ilo mõkaj. Ilo ejja ien eo wõt, eo ej lale jikin book en kõmman bwe en wõr bwe in tract eo Would You Like to Know More About the Bible? ñan an aolep kajerbale.

²¹ Elõñ rar kwalok air kamolol kin katak eo ilo Ad Jerbal Ñan Ailiñ Eo naetan “Ta eo Kwomaroñ Ba kin Magazine ko.” Kwar kortokjen men in letok in ke ilo am katak kin wanjoñok in ennan ko ñan lelok magazine? Etke kwojjab kajerbal mõttan in katak Bible ibben family eo am ñan kamelmel ennan kein?

²² Kwon Kortokjen Ien Kwojkwoj in Kejota eo: Einwõt ri jilek Paul, jen kwalok ñan Jehovah joñan kamolol eo ad kin “men in letok eo [an] elap” ilo ad bõk kunad ilo joñan ad maroñ ilo makitkit ko lor jitõb kar karõki ilo ien Kwojkwoj in Kejota eo. Men kein rej kitibuj ad (1) bed ilo kwelok eo elaptata ilo yiõ eo, kememe Kwojkwoj in Kejota eo an Iroij ilo Thursday, March 28, 2002; (2) jibañ ro rar oktak im inactive ñan kakajurlok “yokwe [eo air] mokta” (Rev. 2:4; Rom 12:11); (3) jibañ ro nejid im jabdewõt ri katak Bible ro rej tellokiir ñan erom ri kwalok ro rejañin baptais; im (4) bõk kunad ilo jerbal in evanjel eo ilo joñan ad maroñ, im bõlen ñan auxiliary pioneer ilo March im etal.​​—2 Tim. 4:5.

²³ Ej jar eo ad emol bwe kij aolep naj bõk kunad ilo joñan ad maroñ ilo jerbal in kwalok nan kin news eo emõn kin Ailiñ eo ilo ien Kwojkwoj in Kejota eo, im ilo wãwen in kwalok tu-mũlal in kamolol eo ad kin aolep men ko Jehovah ear kõmmani ñan kij.