‘En Let Ad Kennan kin Nan eo Emõn’
1. Ta news ko remõn jej aikwij kwalok kaki ñan ro jet?
1 Ilo juõn lal me ejeja an walok news ko remõn, ewõr jerammõn eo ibbed ‘ñan kõmman bwe en let ad kennan kin news eo emõn kin joij an Anij.’ (Jerb. 20:24) Men in ej kitibuj ad kejelãik armij bwe mõttan jidik lal eo ekãl im wãnik an Jehovah, ijo “men ko mokta re [naj] joko,” renaj bõk jikin ‘ran kein eliktata.’ (2 Tim. 3:1-5; Rev. 21:4) Ilo ien in enaj ejelok bar nañinmij. (Ais. 33:24) Ro remij rejitenburu ibbed renaj diojtok jen lũp ko lũpiir im renaj bar bed ibben family ko air im ro mõttair. (Jon 5:28, 29) Aolepen lal in enaj oktak im juõn paradise eaibujuij. (Ais. 65:21-23) Eñin ej jet ian wanjoñok ko kin news ko remõn jej aikwij kwalok kaki ñan ro jet!
2. Etke ien Kwojkwoj in Kememej eo ej letok ien ko remõntata ñan kwalok kin news eo emõn?
2 Alliñ in March, April, im May renaj ien ko rekanuij emõn ñan kwalok kin news kein remõn. Kin an em̃on lãn ilo alliñ kein im to an jok marok ilo elõñ jikin ko ilo lal in rej kõmman bwe en emõn ñan kaetoklok ien ad kwalok nan. Bareinwõt, ien eo eaorõktata ilo yiõ eo, Kwojkwoj in Kememej eo, enaj kõmman ilo ibelakin lal in elikin tulok in al ilo Saturday, March 22. Kiõ ej ien ñan jino kõmman karõk ko ñan kalaplok ad jerbal in kwalok nan.
3. Ta eo enaj jibañ kij ñan kalaplok makitkit eo ad kin jerbal in kwalok nan einwõt juõn family?
3 Auxiliary Pioneer: Kwomaroñ ke karõke schedule eo am ñan am auxiliary pioneer ilo juõn, ruo ak ilo aolep alliñ kein jilu? Kwomaroñ bõk jet minute ko ilo ien naj katak eo ibben family eo am ñan bwebwenato kake men in. Ilo ami jerbal ibben don, juõn ak elõñlok ro uan family eo am remaroñ auxiliary pioneer. (Ken. 15:22) Jar kake men in, im lale wãwen an naj Jehovah kajerammõn jibadbad ko am. (Ken. 16:3) Meñe ejelok ilo family eo emaroñ auxiliary pioneer, aolep ro uan family eo remaroñ likit jet mejenkajjik ko rejejjet ñan kalaplok ijo kunair ilo jerbal in kwalok nan im jerbal ibben ro me remaroñ pioneer.
4. Ewi wãwen jemaroñ kõlajraki makitkit ko ilo schedule eo ad ñan auxiliary pioneer elañe ewõr juõn ad jerbal full-time?
4 Elañe ewõr juõn am jerbal full-time, juõn schedule emõn enaj kamaroñ yuk ñan auxiliary pioneer. Bõlen kwomaroñ kajerbal jimettan in ien mõñã in rãlep eo am ñan kwalok nan. Ak kwomaroñ bõk juõn am make territory ebake mweo imõm ak jikin jerbal eo am im kwalok nan iumin juõn ak elõñlok awa ko mokta ak elikin ien jerbal. Kwomaroñ kalaplok ien ilo schedule eo am ñe kwonaj lemanlok makitkit ko jet me rejjab kanuij aorõk ñan bar juõn alliñ im kwalok nan aolepen ran ko ilo ien weekend (Saturday im Sunday). Jet rar maroñ bõk juõn ak ruo ran in kakije ñan air kwalok nan.
5. Ewi wãwen am maroñ jibañ ritto ro ak ro ejjab emõn ejmour eo air ñan auxiliary pioneer?
5 Elañe kwo ritto ak ejjab emõn ejmour eo am ak ewõr joñan kajur eo am, kwomaroñ auxiliary pioneer wõt ikijen am kajerbal jidik wõt ien kajjojo ran ilo jerbal in kwalok nan. Kajitõk ibben Jehovah ñan an lewõj “maroñ eo e kanuij lap.” (2 Kor. 4:7) Juõn sister ear maroñ in auxiliary pioneer ke ear 106 an yiõ! Kin jibañ jen Ri Christian ro nukin im ro jet ilo congregation eo, ear kwalok nan jen em ñan em, kõmman bar jeblak ko, etal ibbeir ilo Bible study ko air, im bõk kunan ilo mõttan ko jet kin jerbal in kwalok nan. Ear jibañ ilo an jino katak Bible ibben joñoul armij. Ear ba, “Ke ij lemnak kin jerammõn eo elukkun emõn ear wõr ibba ñan jerbal einwõt juõn auxiliary pioneer, buruõ ear obrak kin yokwe im kamolol kin Jehovah, Nejin, im dolul eo An me elap yokwe ie. Ña ij lukkun kõnan ba ‘kommol, Jehovah!’ ”
6. Ewi wãwen jodikdik ro emwij air baptais im rej school wõt remaroñ in auxiliary pioneer?
6 Elañe kwoj juõn jodikdik emwij an baptais im kwoj school wõt, kwe bareinwõt kwomaroñ deloñe jerbal in auxiliary pioneer. Einwõt ro rej jerbal full-time, bõlen kwonaj kõlajraki weekend ko elaptata ñan am kajerbali ilo jerbal in kwalok nan. Bõlen kwomaroñ kwalok nan iumin juõn ak elõñlok awa ko elikin school ilo jet ran. Ewõr ke ien kakije ko an school bwe kwomaroñ kajerbali ñan bõk kunam ilo jerbal in kwalok nan? Elañe kwokõnan auxiliary pioneer, konono ibben jinõm im jemõm kake.
7. Ta eo elder ro remaroñ kõmmane ñan kalaplok itoklimo kin jerbal in kwalok nan ilo ien Kwojkwoj in Kememej eo?
7 Kalaplok Am Itoklimo: Elder ro remaroñ kalaplok itoklimo eo an congregation eo ikijen joñok ko air remõn. (1 Pit. 5:2, 3) Remaroñ karõk kwelok ko jet kin jerbal in kwalok nan ñan ro me renaj bõk kunair ilo kwalok nan in jibboñ tata, elikin school, ak elikin jerbal. Service overseer eo ej aikwij jitõñ ri kwalok ro ewõr air maroñ ñan tel kwelok in kwalok nan ko, im lale bwe en bwe territory ko, im bareinwõt magazine ko im book ko ñan alliñ kein jilu me jerbal eo ad eaorõk enaj walok ie.
8. Ta eo jej katak jen men eo ear walok ilo juõn congregation?
8 Ilo juõn congregation, jet alliñ ko lok iman elder ro rar jino rejañ ri kwalok ro ñan air auxiliary pioneer. Rej kejalaik congregation eo kajjojo week kin joñan ri kwalok ro emwij kowãppen ir ñan auxiliary pioneer. Tokjen men in, ej kõmman bwe ro me rekõnan kalaplok ijo kunair ilo jerbal in kwalok nan rejelã bwe enaj wõr ro renaj rejetake ir. Kwelok ko jet kin jerbal in kwalok nan rar karõki ñan jibboñ tata im ilo jota. Tokjen men in, kar 53 ri kwalok ro rar auxiliary pioneer ilo alliñ in April, enañin jimettan in congregation eo!
9. Etke ien Kwojkwoj in Kememej eo ej juõn ien emõn ñan ro rej kab erom ri kwalok ro ñan air jino kwalok kin news eo emõn?
9 Jibañ Ro Jet ñan Kwalok Nan: Ñe ro rekãl im jodikdik ro rej erom juõn ri kwalok, remaroñ kir ir ñan air kwalok nan ibben ri kwalok ro ewõr air iminene. Ien rot in emaroñ walok ilo ien eo mokta ak elikin Kwojkwoj in Kememej eo ñe elõñ ilo congregation eo renaj kalaplok makitkit ko air. Ewõr ke am ri katak Bible ej kõmman wõnmanlok me mour eo an kiõ ej errã ibben kien ko rewãnik an Jehovah? Ewõr ke ajiri ro nejõm emõn mwiliir im emõn air wõnmanlok ak rejañin jino ri kwalok? Elañe rein emwij air kwalok bwe rekõnan erom ri kwalok ro im kwoj lemnak remaroñ, inem kwon kejelãik juõn ian elder ro. Presiding overseer eo enaj karõke ruo elder ro ñan konono ibbam im ajiri eo nejõm ak ri katak Bible eo am kin men in.
10. Ta eo elder ro remaroñ kõmmane ñan jibañ ro rej inactive?
10 Alliñ kein rej itok renaj ien ko remõntata ñan ro rar inactive (bõjrak jen air kwalok nan iumin 6 ak elõñlok alliñ ko im rej jakkeini air kwelok) ñan bar jino kobalok ibben congregation eo. Ro rej tel ilo Congregation Book Study eo im elder ro jet rej aikwij lukkun kate ir ñan lolok rein im ilo juõn wãwen ejoij im yokwe kir ir ñan jerbal ibbeir ilo jerbal in kwalok nan. Elañe etto air kar inactive, ruo elder rej aikwij kennan ibbeir mokta ñan lale elañe ej tellokiir wõt ñan bõk jerbal in kwalok nan.—km 11/00 p. 3.
11. Ta wãwen eo elaptata kar kwalok kin ‘joij eo an Anij?’
11 Kebojak kin Kwojkwoj in Kememej Eo: Binmour eo ej wãwen eo elaptata kar kwalok kin ‘joij eo an Anij.’ (Jerb. 20:24) Elõñ million armij ro rej kwalok air kamolol ibelakin lal in renaj koba ibben don ilo Saturday, March 22, elikin tulok in al, ñan kememe Kwojkwoj in Kememej mij eo an Christ. Kim kõnan kir im jibañ aolep ro emol burueir ñan bed ilo ien in elukkun aorõk me ej kwalok kin joij eo ejelok joñan an Jehovah ñan armij ro.
12. Wõn ro jej aikwij kirtok ir ñan ien Kwojkwoj in Kememej eo?
12 Kõmman juõn lajrak in etan armij ro kwokõnan kirtok ir. Ejelok bere bwe etan ro ilo lajrak eo am enaj koba ro nukõm, ro ri turum, ro mõttam jen jikin jerbal ak school, ri katak Bible ro am kar mokta im kiõ, im aolep ro jet me ekkã am lolok ir. Elañe jet ian ro kwoj kir ir ewõr air kajitõk kin Kwojkwoj in Kememej eo, kwomaroñ bõk jibañ jen appendix eo (Kamelele Ko Jet) ilo katak eo kin Kejota eo an Iroij peij 206-208 ilo book eo Bible Teach (Ta eo Bible Ej Lukkun Katakin). Men in emaroñ kabellok ñan yuk juõn ial ñan jino juõn Bible study, kinke ej juõn ien emõn ñan am kwalok kin book eo jej kajerbale ñan katak ibben ri katak Bible ro.
13. Ewi wãwen an kar Jehovah kajerammõn ri kwalok ro ruo kin kate ko airro ñan kirtok ro jet ñan Kwojkwoj in Kememej eo?
13 Juõn sister ear kõmman juõn lajrak kin 48 family ko ñan kir ir. Ke ear dedelok an kir ir ear kakõlleik etair im je ran eo ear kirtok ir. Ear lukkun mõnõnõ ke 26 ian armij ro ear kir ir rar itok ñan Kwojkwoj in Kememej eo! Juõn brother eo ear wõr juõn an mõn wia ear kirtok juõn an ri jerbal eo me ear juõn priest mokta. Emaan eo ear bed ilo ien eo im elikin ear ba, “Iar katak elõñ men ko kin Bible eo ilo juõn wõt awa jen ke iar bed ilo kabuñ in Catholic iumin 30 yiõ ko.” Elikin wõt kar Kwojkwoj eo, ear mõnõnõ in katak ilo Bible Teach book eo.
14. Ta jerbal eo enaj kõmman ibelakin lal in ilo March 1?
14 Jerbal Eo: Jino ilo Saturday, March 1, im wõnmanlok ñan March 22, juõn peba in kir ejej uan ñan Kwojkwoj in Kememej eo naj leto-letak ibelakin lal in. Aolep ri kwalok ro renaj kõnan kõmman joñan wõt air maroñ ilo jerbal in eaorõk. Emõnlok ñan lelok peba in kir eo ñan armij eo make jen ad likiti ilo kejam ko. Bõtab, elañe ewõr juõn am territory elap, elder ro remaroñ bebe ñan kõtlok bwe ren door peba in kir kein ilo moko ejelok armij ie ak en ilo juõn jikin ro rej etetal bajjek rejjab loe. Ilo ien weekend ko jenaj bareinwõt lelok magazine ko an alliñ eo.
15. Ta eo jemaroñ ba ñe jej lelok ñan juõn armij peba in kir eo ñan Kwojkwoj in Kememej eo?
15 Kinke ewõr joñan ien ad leto-letak peba in kir in, enaj emõnlok ñan kwalok kake ilo tukadu. Kwon joij im bõplolũm. Kwomaroñ ba men in: “Kimij kõnan kirtok yuk, ro uan family eo am, im ro jeram ñan juõn ien eaorõk me enaj kõmman ilo March 22. Eñin ej am peba in kir. Tibdikin kamelele ko jet emwij je iloan.” Emaroñ lõñ an ri mweo kajitõk. Ak emaroñ bõk peba in kir eo im ba bwe enaj bed. Je etan ro rej kwalok air itoklimo im kõmman karõk ñan bar jeblak.
16. Ta bwebwenato eo ej kwalok kin aorõkin jerbal eo ñan kirtok armij ro ilo territory eo ñan Kwojkwoj in Kememej eo?
16 Yiõ eo lok juõn ri tarinae ear lo peba in kir eo ñan Kwojkwoj in Kememej eo ilo kejam eo an. Ear bebe ñan an bed ilo ien in ak ear aikwij bõk melim jen sergeant eo an (eo ej bõk eddon ak eo eutiejlok jen e). Ke ear kwalok ñan e peba in kir in, sergeant eo ear jino ikõñ im tokelik ear ba bwe jinen im jemen rej Ri Kennan ro im ekin kar kwelok ibbeir mokta. Inem sergeant eo ear jab baj kamelimi wõt ri tarinae eo ak ear etal ibben lok ñan Kwojkwoj in Kememej eo!
17. Ewi wãwen jej kwalok bwe jejjab kajettokjen joij eo an Anij?
17 Kwalok Kamolol: Ke ien Kwojkwoj in Kememej eo an 2008 ej ebaktok, kij kajjojo aikwij in kalmenlokjen kin joij eo Jehovah ear kwalok ñan tokjen eo ad. Ri jilek Paul ear je: “Kim . . . bareinwõt akwelap ñõn kom bwe en jab jitokjen ami bõk joij an Anij.” (2 Kor. 6:1) Ewi wãwen ad kwalok bwe jejjab kajettokjen joij eo an Anij? Paul ear je: “A ilo men otemjej kim kwalok karkarim einwõt dri jerbal an Anij.” (2 Kor. 6:4) Kin men in, jej kwalok ad kamolol kin menin letok eo an Jehovah ikijen kõmman ko ad remõn im kijejeto eo ad kin jerbal in kwalok nan kin news eo emõn. Ien Kwojkwoj in Kememej in enaj letok ien eo emõn ñan kalaplok jerbal eo ad, im bwe en let ad kennan kin news eo emõn.
[Box ilo peij 3]
Wõn Ro Remaroñ Auxiliary Pioneer?
◼ Family ko
◼ Ro rej jerbal full-time
◼ Ro reritto im ro ejjab emõn air ejmour
◼ Ro rej school
[Box ilo peij 4]
Ñe Jej Leto-Letak Peba In Kir Ko:
◼ Kwalok kake ilo tukadu; en bõplol am konono
◼ Je etan ro rej itoklimo im bar jeblak ibbeir
◼ Lelok magazine ko ilo weekend