Komin Kennaneklok Men Ko Remõn an Jehovah
1. Ta eo ej kamakit kij ñan ad kennan kin men ko remõn an Jehovah?
1 “Am, O Jeova, lapen, im kajur, im maroñ, im aibujuij, im anjo, im utiejen: bwe aolepen men ko ilo lõñ im ilo lõl, Am.” (1 Kron. 29:11) Ewi wãwen yokwe im kamolol eo ad kin Jehovah ej jelet kij? Ej kamakit kij ñan ad ‘kennaneklok men ko remõn an Eo e ar kir kij jen marok im ñõn iloan meram eo An.’ (1 Pit. 2:9) Jen jab bõjrak jen ad kennanek ro jet kin Anij eo ad elap! Enaj wõr jerammõn ko raorõk ibbed ñan keañ kin men ko remõn an Jehovah ilo alliñ in March, April, im May.
2. Ta jerbal eo ejej uan emwij karõke kin jerbal in kejelã kin ien Kwojkwoj in Kememej eo, im wõn ro remaroñ bõk kunair?
2 Juõn Jerbal Ejej Uan ñan Kejelã kin Kwojkwoj in Kememej Eo: Ilo Monday, April 2, jenaj kwalok men ko remõn an Jehovah ilo ad kememe Kwojkwoj in Kejota eo an Iroij. Naj ajeje peba in kir in ejej uan ñan ien in eaorõk ilo belakin lal jen March 17 ñan April 2. Kimij rejañ aolep bwe ren bõk kunair joñan wõt air maroñ. Enaj juõn ien emõn ñan an ro rekãl jino kwalok kin news eo emõn ñe ej tellokiir. Elañe ewõr am ri katak ak ro nejõm me rej tellokiir, bõk buñten nee ko ñan konono ibben elder ro.
3. Ta eo jenaj ba ñe jej kirtok armij ro ñan ien Kwojkwoj in Kememej mij eo?
3 Jerbal in enaj einlok wõt jerbal eo jaar kõmmane kin “Lomor Eo Ej Ebak!” District Convention eo. Naj jilkinlok ñan congregation ko elõñ peba in kir ko bwe kajjojo ri kwalok ro en wõr ibbeir joñan in 50 copy im 150 ñan kajjojo pioneer ro. Kõmman bwe ennan eo am en kadu, bõlen ilo am ba: “Eñin peba in kir eo am ñan juõn ien eaorõk ej kõmman kajjojo yiõ. Kwonaj bõk karuwainene eo emãnãn. Kamelele ko rebed ilo peba in.” Bõtab, elañe ewõr an ri mweo kajitõk, bõk ien ñan am uaki. Melele ko ilo peij 127 ilo Jelãlokjen book eo remaroñ jibañ yuk ilo am kameleleik ir kin aorõkin ien Kwojkwoj in Kememej mij eo. Ilo weekend ko, jenaj lelok magazine ko rekãl ibben peba in kir in ejej uan. Lale ro rar kwalok air itoklimo, im kõmman karõk ñan am bar jeblak.
4. Ewi wãwen naj leto-letak peba in kir ko ejej uair kin Kwojkwoj in Kememej eo?
4 Ñe emaroñ, jej aikwij lelok peba in kir in ejej uan ñan juõn armij ilo kajjojo em. Kin menin, jeje moko ejelok armij ie, im karõk ñan am jeblak ilo bar juõn ien. Congregation ko me ej lõñ wõt bwen peba in kir eo ibbeir remaroñ likiti ilo moko ear ejelok armij ie ilo week eo eliktata mokta jen ran in Kwojkwoj in Kememej eo, ak ejjab moktalok. Lale bwe ro kwoj bar jeblak ibbeir, ri katak Bible ro, ro nukõm, ri jerbal ro mõttam, ro ri turõm, im ro jet ej aikwij wõr air peba in kir.
5. Etke jej aikwij jino kiõ ñan ad kõmman karõk ko ñan auxiliary pioneer?
5 Jerbal in Auxiliary Pioneer: Kwomaroñ ke kalaplok am keañ kin emõn ko an Jehovah ilo am bõk kunam ilo jerbal in auxiliary pioneer ilo March, April im May? Ñe kwoj kõmmane menin, bõlen kwonaj aikwij kõmman jet oktak ko ilo lajrak in karõk eo am kajjojo ran. (Ep. 5:15-17) Kwomaroñ liki bwe ilo am kate yuk ñan kalaplok ijo kunam ilo jerbal eo an Jehovah enaj bõktok lañliñ im kajerammõn eo an Jehovah. (Ken. 10:22) Kinke ien Kwojkwoj in Kememej eo ej ebaktok, kiõ ej ien ñan ad kõmman karõk ko.—Ken. 21:5.
6. Ta eo jemaroñ katak jen bwebwenato eo kin sister eo 90 an yiõ me ear auxiliary pioneer ilo yiõ eo lok?
6 Juõn sister 90 an yiõ ear lañliñ kin jerammõn eo ear bõke kin an auxiliary pioneer ilo yiõ eo lok. Ear ba: “Meñe I lukkun mõnõnõ in jerbal ilo jikin kallip im iar kõnan jino kallip men in eddek ko, iar kile bwe iar aikwij in likit mokta men ko raorõktata. Kin kõnan eo ñan likit men ko an Ailiñ eo mokta, iar bebe ñan auxiliary pioneer ilo March.” Ear bõk ke kajerammõn kin kate ko an? Ear ba, “Iar eñjake aõ ebake congregation eo, im men in ear kõmman bwe in ebake Jehovah.” Jemaroñ ke etali men ko ad raorõktata im kõmman oktak ko einlok wõt in ñe ej men in aikwij?
7. Ebin ke ñan ad jerbal einwõt juõn auxiliary pioneer?
7 Tõbar mejenkajjik eo kin 50 awa ko ñan auxiliary pioneer emaroñ jab bin einwõt kwoj lemnak. Ilo jar etale makitkit ko am kajjojo ran, kõmman juõn lajrak in ien ko am, inem jeje ilo calendar ak ilo lajrak in makitkit ko am ilo jitõb. Kwo jelã kin wãwen ko am make. Elañe ejjab emõn ejmour eo am im kwojjab kajur, bõlen kwomaroñ bõk kunam ilo jerbal in kwalok nan jejjo awa ko ilo kajjojo ran. Elañe kwoj jerbal aolep ran ilo jikin jerbal eo am ak etal ñan school, bõlen kwomaroñ auxiliary pioneer ilo am bõk kunam ilo jerbal in kwalok nan ilo jota ak ilo weekend ko.
8. Ta eo ear kamaroñ ruo ri belele ñan air auxiliary pioneer?
8 Elõñ rar maroñ auxiliary pioneer einwõt juõn family. Ilo yiõ ko moktalok ruo ri belele rar makoko in kanne peba eo ñan air auxiliary pioneer kinke rar lemnak bwe wãwen ko ibbeir rar jab kõtlok ir ñan air maroñ auxiliary pioneer. Ta eo rar kõmmane? “Kimar jar ñan Jehovah ñan an jibañ kim tõbar men eo etto amro kar kõnan kõmmane ibben don.” Kin karõk ko remõn rar maroñ tõbar mejenkajjik eo air. Rar kobaiktok: “Elukkun kar emõn. Kimar lañliñ kin elõñ jerammõn ko. Nan in rejañ eo am in, kajeoñ kõmmane wãwen in. Elañe kimar maroñ kõmmane, kwomaroñ bareinwõt kõmmane.”
9. Ta eo kwomaroñ kõmmane ilo ien katak eo tok juõn an family eo am ñan kebojak kin alliñ kein rej bedotok kin jerbal eo ejej uan?
9 Etke kwojjab kõmman jidik ien ilo ien katak in tok juõn an family eo am ñan ami etale ewi wãwen aolep remaroñ kalaplok makitkit ko air ilo alliñ ko rej bedotok? Meñe aolep ro uan family eo am rejjab maroñ auxiliary pioneer, bõlen juõn iair emaroñ kõmmane ikijen jibañ im rejetak eo jen ro jet ilo family eo. Elañe ejjab, bõlen family eo am emaroñ likit mejenkajjik ko ñan kajerbal elõñlok awa ko ilo jerbal in kwalok nan ilo alliñ in jerbal kein rejej uair.
10. Etke jej aikwij konono ñan ro jet kin kõnan eo ad ñan auxiliary pioneer ilo ien Kwojkwoj in Kememej in?
10 Jibañ Don: Kijejeto ekabobo. Konono kin kõnan eo am ñan auxiliary pioneer. Men in enaj rejañ ro jet ñan air kanne peba eo ñan auxiliary pioneer. Bareinwõt, ro me rar kwalok nan full-time ilo ien ko remotlok remaroñ lewõj nan in rejañ ko me remaroñ jibañ yuk ñan karõk makitkit im lajrak ko am ñan am maroñ tõbar mejenkajjik eo am. (Ken. 15:22) Elañe kwomaroñ auxiliary pioneer, etke kwojjab kir bar juõn ri kwalok, bõlen juõn eo me ewõr wãwen kein ibben, ñan an kobawõj ibbam ilo jerbal in ekalañliñ?
11. Ewi wãwen an elder ro maroñ kwalok kijejeto kin jerbal in auxiliary pioneer ilo alliñ kein rej bedotok?
11 Elõñ elder ro rej kõmman karõk ko rekkar ñan air bõk kunair ilo jerbal in ejej uan. (Hib. 13:7) Aet men in ekõketak ñan congregation eo! Elder ro bareinwõt rej kwalok kijejeto ikijen bwebwenato ko air ibben ro jet. Jet nan ko rejoij im kõketak ak jet nan in rejañ ko remõn remaroñ men ko wõt jej aikwiji ñan kamakit jet ñan air auxiliary pioneer. Service overseer eo enaj karõk kwelok ko jet kin jerbal in kwalok nan bwe aolep ren maroñ bõk kunair ilo jerbal in kwalok nan ibben don einwõt juõn kumi, meñe ilo elikin jerbal ak school. Rej aikwij kejelã kin karõk kein aolep ien. Enaj bareinwõt lale bwe en wõr im bwe territory im book ko ñan aolep.
12. Ta eo kwomaroñ kõmmane elañe kwojjab maroñ auxiliary pioneer?
12 Meñe wãwen ko ibbam rej bõprae yuk jen am auxiliary pioneer, kwomaroñ lelok kõketak ñan ro me rej deloñ ilo jerbal in, im kwomaroñ jar kin ir. (Ken. 25:11; Kol. 4:12) Bõlen kwomaroñ kõmman karõk ko ilo am kobaik bar juõn ran ilo week eo ñan am bõk kunam ilo jerbal in kwalok nan ak ñan kaetoklok awa in am bed ilo jerbal in kwalok.
13. Ta mejenkajjik eo ra eo ilo Guam ear karõke, im ewi wãwen an congregation eo am maroñ jibañ ñan tõbare?
13 Mejenkajjik eo kin 225 Auxiliary Pioneer Ro ilo April: Laplok in oran auxiliary pioneer ro ilo ra eo ilo Guam kar tõbar joñan in 211 ilo March 2004. Kin menin, mejenkajjik eo ñan April in tok kin auxiliary pioneer ro ej 225. Jemaroñ tõbare elañe joñan in 1 ian 5 ri kwalok ro ilo kajjojo congregation ko rej bõk kunair ilo jerbal in auxiliary pioneer. Ilo mol, jet congregation ko enaj lõñlok ri kwalok ro ie me wãwen ko ibbeir enaj kamaroñ ir ñan air auxiliary pioneer. Mejenkajjik rot in ebidodo an elõñ congregation ko tõbare. Lemnak kin lañliñ eo enaj walok ilo congregation eo am im wãwen an naj jelet ilo emõn jerbal in kwalok nan ilo territory eo!
14. Etke April ej juõn alliñ emõn ñan auxiliary pioneer?
14 Etke April ej juõn alliñ emõn ñan auxiliary pioneer? Kwojkwoj in Kememej eo enaj ilo jinoin alliñ eo, kin men in enaj letok elap ien ñan kõmman bar jeblak ko ibben ro rar itok ñan ien eo. Jenaj lelok magazine ko, kin mejenkajjik eo ñan likit Jelãlokjen book eo ibben ro jej bar jeblak ibbeir im jino katak kin Bible eo. Kin menin, auxiliary pioneer ilo April enaj letok elõñ jerammõn ko ñan ad jino katak kin Bible ko. Bareinwõt, ewõr lalem Sunday ko im juõn holiday in lal in ilo alliñ in April, men in ej kõmman bwe en bidodo ñan ri jerbal ro im ro rej school ñan air bõk kunair.
15. Etke jej aikwij kwalok juõn jitõb in ekaiuriur ñe ien Kwojkwoj in Kememej eo ej ebaktok?
15 Kajjojo Kwojkwoj in Kememej ej ellã ej bõktok ñan kij juõn yiõ ebaklok ñan jemlokin jukjuk im bed in. Ien eo ebed ibbed kiõ ñan ad jiroñ ro jet kin Anij eo ad elap ekadu. (1 Kor. 7:29) Ñe ien Kwojkwoj in Kememej in enaj motlok, ien ko remõn rar bellok ñan ad kaibujuij Jemed ilañ renaj jako ñan indio. Jej aikwij kebojak kiõ ñan ad kõmman men otemjej joñan wõt ad maroñ ilo March, April, im May ñan ad kwalok news eo emõn kin Jehovah!
[Bo̦o̦k eo ilo peij 4]
Emaroñ Ke Wõr 225 Auxiliary Pioneer Ro ilo April?
◼ Etale ta men ko raorõktata ibbam
◼ Einwõt juõn family komin bwebwenato kin mejenkajjik ko ami
◼ Bwebwenato ibben ro jet kin men ko kwokõnan kõmmani