Juõn Mejenkajjik Emõn ñan Yiõ in Jerbal eo Ekãl

1. Ta mejenkajjik eo jemaroñ lemnak kake ñan yiõ in jerbal eo ekãl?

¹ Jej aikwij likit mejenkajjik ko elañe jekõnan wõnmanlok wõt ilo jitõb. Ta mejenkajjik ko kin jerbal in kwalok kwar likit im jibadõki ñan yiõ in jerbal eo ekãl? Juõn mejenkajjik emõn ej jerbal in auxiliary pioneer iumin juõn ak ruo alliñ. Kinke jerbal in ekamõnõnõ emakijkij an aikwij am karõklok iman, kiõ ej ien emõn ñan lemnak lok iman kin men in. Etke emõn bwe kwon likit jerbal in auxiliary pioneer einwõt juõn am mejenkajjik?

2. Etke jej aikwij lemnak in likit jerbal in auxiliary pioneer einwõt juõn mejenkajjik?

² Un ko Unin Ad Auxiliary Pioneer: Jerbal in auxiliary pioneer ej kamaroñ kij ñan kabuñburuen Jemed ilañ ñan juõn joñan ‘elõñlok’ ilo ad kalaplok ad ien ilo jerbal in kwalok nan. (1 Tes. 4:1) Ñe jej lemnak kin aolep men ko Jehovah ear kõmmani ñan kij, ej kamakit buruõd ñan ad jiroñ ro jet kin e. (Sam 34:1, 2) Jehovah ej lo im ewõr an kamolol kin men ko jej kõmmani bwe jen maroñ kalaplok jerbal in kwalok nan eo ad. (Hib. 6:10) Ñe jej jelã bwe Jehovah ej buñburuen kake kij kin ad niknik wõt ilo ad jerbal ñan e, men in elap an kamõnõnõik kij.​—1 Kron. 29:9.

3, 4. Ewi wãwen jej bõk tokjen jen jerbal in auxiliary pioneer?

³ Ekkã an walok bwe, ñe elaplok am kõmmane juõn men, enaj bidodolok im laplok am mõnõnõ kin men eo kwoj kõmmane. Ñe kwoj kalaplok am ien ilo jerbal in kwalok nan enaj kamineneik yuk ñan am konono ibben ro ri mweo. Enaj laplok am kabel in jinoe bwebwenato ko im kajerbal Bible eo. Ñe elaplok am konono kin tõmak eo am, enaj kajurlok bareinwõt. Elõñ ian ro rejañin katak Bible ibben armij ro mokta rar jino katak Bible kiõ ke rar bõk jerbal in auxiliary pioneer.

⁴ Jerbal in auxiliary pioneer emaroñ men eo rej aikwiji ñan kõketak ir ilo jitõb. Juõn ri kwalok eo ear pioneer full-time mokta, ear kile bwe ear jolok elõñ awa ko ellã jen joñan ilo jikin jerbal eo an, inem ear beek in auxiliary pioneer iumin juõn alliñ. Ear ba: “Iar bwilõñ kin ewi wãwen juõn wõt alliñ ear maroñ kakajur iõ ilo jitõb! I ar kõmman karõk ko ñan bedwõt ilo jerbal in auxiliary pioneer, im ear tellok bwe in bar bõk kunaõ ilo jerbal in regular pioneer.”

5. Ewi wãwen ad maroñ anjo ion eñjake eo bwe jej jekabel ñan auxiliary pioneer?

⁵ Bõk Anjo ion Abañ Ko: Jet remaroñ ãliklik in bõk kunair ilo jerbal in auxiliary pioneer kinke rej lemnak bwe rej jekabel ilo jerbal in kwalok nan. Elañe eñin ej unin am ãliklik in bõk jerbal in, Jehovah enaj jibañ yuk einwõt ke ear jibañ Jeremiah. (Jerm. 1:6-10) Meñe Moses ear “rumij [an] konono, im e rumij [loõn],” Jehovah ear kajerbal e ñan kõmanman ankil An. (Ex. 4:10-12) Elañe kwoj lemnak bwe kwo jekabel ilo jerbal in, kwon jar ñan Jehovah bwe en kaberan yuk.

6. Ewi wãwen jemaroñ auxiliary pioneer meñe emõjno enbwinid ak jej boub ilo jerbal ko jet?

⁶ Kwoj ãliklik in bõk jerbal in ke kinke ewõr abañ ko am kin nañinmij ak kin am boub ilo jerbal ko jet? Elañe kwoj mõjno ilo enbwinim ak nañinmij, kwomaroñ auxiliary pioneer wõt elañe kwoj jerbal joñan wõt am maroñ. Elañe kwoj boub kin jerbal ko jet, bõlen kwomaroñ le manlok jet jerbal ko rejjab aorõk ñan bar juõn alliñ ñan kõmmani. Jet ri kwalok ro rej jerbal full-time rar wiaik ien ñan bõk jerbal in auxiliary pioneer ilo air kakije jen jerbal ilo jikin jerbal eo air iumin juõn ak ruo ran.​—Kol. 4:5.

7. Etke ewõr tokjen ñan jar kin jerbal in auxiliary pioneer?

⁷ Ewi Wãwen Ad Maroñ Kõmmane Jerbal In: Kwon kwalok kõnan eo am ñan Anij ilo jar. Kwon kajitõk ibben Jehovah bwe en kajerammõn jibadbad ko am ñan kalaplok jerbal eo am ñan kwalok nan. (Rom. 12:11, 12) Emaroñ jibañ yuk ñan kõmman bebe ko rejimwe kin ewi wãwen kwomaroñ ukõt schedule eo am. (Jem. 1:5) Elañe ejañin wõr kõnan rot in ibbam, kwon kajitõk ibben Jehovah bwe en jibañ yuk ñan kaddek juõn eñjake elemõnõnõ ilo buruõm kin jerbal in kwalok nan.​—Luk 10:1, 17.

8. Ñe kwoj jerbale Jabõn Kennan Ko 15:22 ilo mour eo am, ewi wãwen an maroñ jibañ yuk ñan bõk jerbal in auxiliary pioneer?

⁸ Einwõt juõn family komin bwebwenato kin mejenkajjik in ñan bõk jerbal in auxiliary pioneer. (Ken. 15:22) Bõlen aolep ro uan family eo remaroñ jibañ bwe juõn iair en auxiliary pioneer. Bwebwenato ibben ro jet ilo congregation eo kin kõnan eo am ñan pioneer, elaptata ibben ro me wãwen mour eo air rej einlok wõt wãwen mour eo am. Kijejeto eo air emaroñ kamakit yuk ñan bõk jerbal in auxiliary pioneer.

9. Ta alliñ ko kwomaroñ kãlet ñan auxiliary pioneer?

⁹ Ñe kwoj etale schedule eo am ñan kwalok nan ilo yiõ in jerbal eo ekãl, ñããt eo kwomaroñ auxiliary pioneer? Elañe kwoj jerbal full-time ilo jikin jerbal eo ak etal ñan school, kwomaroñ lale ta alliñ ko me ewõr holiday ko ak ewõr lalem Saturday ak lalem Sunday. Ñan wanjoñok, September, December, March, im August ewõr lalem Saturday im Sunday. Alliñ in May ewõr lalem Saturday ko, im June ewõr lalem Sunday ko. Elañe ejmour eo am ejjab kanuij emõn, kwon kãlet alliñ ko me ejjab kabañ ejmour eo am. Kwomaroñ bareinwõt lemnak in pioneer ilo ien lotok eo an circuit overseer eo ilo congregation eo. Ilo ien lotok eo an, kwomaroñ bõk jerammõn eo ñan bed ilo mõttan eo tujinoin kwelok eo ibben regular pioneer ro. Kinke ien Kwojkwoj in Kememej kin Mij eo an Christ enaj walok ilo March 22 ilo yiõ in lal, alliñ in March, April, im May renaj alliñ ko remõn ñan pioneer. Elikin am kãlet ta alliñ ak alliñ ko kwokõnan auxiliary pioneer ie, kwon jino kõmman juõn lajrak kin ewi wãwen kwomaroñ kauñ awa ko ñan jerbal in.

10. Ta eo kwomaroñ kõmmane elañe kwojjab maroñ auxiliary pioneer?

¹⁰ Meñe kwoj lemnak bwe kwojjab maroñ auxiliary pioneer ilo yiõ in jerbal eo ej itok, kwomaroñ debij juõn eñjake ekijejeto einwõt ro rej pioneer. Wõnmanlok joñan wõt am maroñ ilo jerbal in kwalok nan, im kwon liki wõt bwe Jehovah ej buñburuen kin jibadbad ko am ñan jerbal ñan e kin aolepen buruõm. (Gal. 6:4) Kwon rejetak, im kõketak ro me remaroñ bõk jerbal in auxiliary pioneer. Bõlen kwomaroñ ukõt schedule eo am bwe ijellokin ran ko kwoj kwalok nan ilo kajjojo week kwon kobaiki bar juõn ran ñan am jerbal ibben ro rej pioneer.

11. Etke ej aikwij wõr ibbed juõn jitõb in ekaiuriur?

¹¹ Ewõr juõn jitõb in ekaiuriur ibben ro don Jehovah. Ewõr juõn jerbal jej aikwij kamwijlok​—jerbal in kwalok nan kin news eo emõn. Mour ko an armij ro rej bed ilo kauwatata kiõ, im ekadu ien kiõ jen mokta. (1 Kor. 7:29-31) Yokwe Anij im ro ri turid enaj kamakit kij ñan bõk kunad ilo jerbal in kwalok nan joñan wõt ad maroñ. Ilo ad kate kij im kõmman karõk ko remõn im lori, jenaj maroñ auxiliary pioneer juõn ak elõñlok jen juõn alliñ ilo yiõ ekãl in jerbal eo ej itok​—juõn mejenkajjik emol an wõr tokjen!