Kwalok Nan im En Let Am Kennan
1 Einwõt “juõn Dri Tel im Iroij,” Jesus ear kamineneik ri kalor ro an kin jerbal in kwalok nan eo elap ear bed imair. (Ais. 55:4; Luk 10:1-12; Jerbal 1:8) Ri jilek Peter ear kwalok kin jerbal eo Jesus ear lelok ñan ir ilo nan kein: “Im E ar jiroñ kim bwe kimin kwalok ñõn armij rõn, im kennan bwe E in Eo Anij e ar likit E bwe En Dri Ekajet ro remour im ro remij.” (Jerbal 10:42) Ta eo ekoba ilo an let ad kennan?
2 Elap ad maroñ katak jen ad etale wanjoñok eo an ri jilek Paul. Ke ear kwelok ibben elder ro jen congregation in Ephesus, ear kakememej ir: “Im ekijkan I ar jab drebij jen kom jabrewõt men in kakajuror, a I ar kwalok ñõn kom, im katakin kom ilo bwilij, im jen mweo ñõn mweo. Im [ear let aõ kennan, New World Translation] ñõn dri Ju ro, im bareinwõt ñõn ro dri Grik, ukwelok ñõn Anij, im tõmak ar Iroij Jisõs Kraist.” Meñe e bareinwõt ear iion melejoñ ko, Paul ear kate e bwe en jiroñ elõñ armij joñan wõt an maroñ kin news eo emõn. Ear jab juburu in jaketo-jaketak kin irinekatak ko wõt ibben ri roñjake ro an, ak ear kajeoñ in jiroñ ir kin “aolepen bebe an Anij.” Ñan kõtõbrak men in, ear mõnõnõ in kate im kõmman men in katok ko. Ear bareinwõt ba: “A ij lemnok aõ mour men in jekron im jab aurõk iba, bwe in kamwijlok ial eo aõ, im jerbal eo I ar bõk jen Iroij Jisõs, bwe [en let aõ kennan kin, NW] gospel an joij in Anij.”—Jerbal 20:20, 21, 24, 27.
3 Ewi wãwen ad maroñ kajeoñe wanjoñok eo an Paul rainin? (1 Kor. 11:1) Ilo ad bukõt ro remõn meñe kij bareinwõt jej iion melejoñ ko, ilo ad kate kij ñan jibadõk armij ro jen aolep kumi in ri ailiñ ko im kajin ko kin news eo emõn, im ilo ad tiljek in bar jeblak ibben aolep ro rej itoklimo ñan jibañ ir. (Mat. 10:12, 13) Men in ej aikwij ien, kate, im yokwe armij.
4 Kwomaroñ ke Jerbal einwõt juõn Auxiliary Pioneer? March im April remaroñ ien ko remõn bwe en let am kwalok nan ilo am auxiliary pioneer. Ear lap an kõketak kij ilo yiõ eo lok ñan lo elõñ ri kwalok ro rar kõmmane juõn jibadbad ejej uan ñan auxiliary pioneer!
5 Juõn sister 80 yiõ dettan im elõñ abañ ko kin ejmour ibben ear lujur kin kõketak eo dolul eo an Jehovah ear leloke. Ear je: “Ear kaurur kõnan eo etto an kar bed ilo buruõd, im ear kõmman bwe in eñjake bwe iar aikwij auxiliary pioneer bar juõn alen.” Ear likit bwe March en mejenkajjik eo an ñan auxiliary pioneer. “Men eo moktata iar kõmmane,” ear ba, “kar ñan jijet im bebe kin wõnãn. Iar bwebwenato ibben kõrã eo nejiõ kin mejenkajjik eo aõ kinke inaj kar aikwiji an jibañ. Ear kailbõk iõ ilo an kanne juõn application bareinwõt.” Ilo alliñ eo, sister eo eritto ear kwalok nan 52 awa ko. “Elõñ alen iar jar ñan Jehovah ñan kakajuror iõ ke iar mõk. Ilo jemlokin alliñ eo, iar lukkun mõnõnõ im bo buruõ, im elõñ alen iar kamolol Jehovah kin an kar jibañ iõ. I kõnan bar kajeoñ in auxiliary pioneer.” Experience eo an ekamõnõnõ emaroñ rejañ ro jet me relukkun kõnan auxiliary pioneer meñe ewõr abañ ko relap kin ejmour ibbeir.
6 Juõn brother me jikin jerbal eo an ear kabõjrak an jerbal ilo jab kõtmene kake ear kortokjen ien eo ilo an auxiliary pioneer. Ke ear motlok jet week ko ilo alliñ eo, ear eñjake an kajurlok kijejeto eo an kin jerbal in kwalok nan, im ilo tu-jemlokin alliñ eo, ear jino juõn Bible study ekãl. Ilo an lemnak kin experience eo an, ear ba: “Ear juõn alliñ elap an wõr tokjen!” Elap an kar lañliñ kin tel im jibañ eo an Jehovah! Aet, Jehovah ear lap an kajerammõn brother eo kin jibadbad eo ear kõmmane ilo jerbal in kwalok nan, im Jehovah enaj kõmman eindein ñan kij.—Mal. 3:10, NW.
7 Ñan elõñ ri kwalok ro, auxiliary pioneer ejjab juõn jerbal ebidodo kõmmane. Mekarta, meñe ewõr eddo ko ñan mour ilo lal in im an family eo im bareinwõt abañ ko air make, elõñ brother im sister ro rar maroñ bõk kunair kake. Ñan an let ad kwalok nan ekkã an kitibuj ad aikwij katok kin ien im kajur eo ad, ak jerammõn ko jej bõki ejelok en emaroñ in keidi ñani.—Ken. 10:22.
8 March im April rej ien ko remõn ñan auxiliary pioneer. Ewõr lalem weekend ko ilo March. Ilo air kortokjen ien kein im awa ko ilo jota men in emaroñ kõmman bwe jet ro rej jerbal full-time ren maroñ auxiliary pioneer. Bareinwõt, kwomaroñ kortokjen jabdewõt ien kakije ko ilo alliñ in April. Jet remaroñ kakije jen school ak jikin jerbal eo air, eo emaroñ lelok ien ñan air kauñ men in aikwij eo kin 50 awa ko. Ñan schedule 50 awa ko ilo jerbal in kwalok nan ilo March ak April, kwomaroñ ke kajerbal juõn ian wanjoñok in schedule ko ñan auxiliary pioneer me rej walok ilo katak in? Bwebwenato ibben ro jet kin schedule eo am; ejelok bere jet remaroñ bõk kakajur ñan koba ibbam ilo jerbal in kwalok nan. Elañe kwojjab maroñ auxiliary pioneer, likit juõn mejenkajjik ñan alliñ kein, im jerbal ibben ro remaroñ pioneer. Kõmman karõk ko am kiõ ñan kalaplok jerbal in kwalok nan ilo March im April.
9 Kwalok Kamolol kin Kwojkwoj im Kememej eo: Kajjojo yiõ ilo ien Kwojkwoj in Kememej eo, kamolol kin katok in binmour eo ej kamakit elõñ thousand ñan ‘wiaik ien’ ñan air auxiliary pioneer ro. (Ep. 5:15, 16) Ilo United States ilo yiõ eo lok, kar wõr 126,378 auxiliary pioneer ro ilo March im 51,217 ilo April. Melelen men in bwe ear wõr juõn average (oran eo iolaplap) in 88,797 ñan kajjojo ian alliñ kein ruo. Oran in ej laplok jen average eo kin 21,505 ro rar auxiliary pioneer ilo kajjojo alliñ ko mokta ilo service yiõ eo. Ien Kwojkwoj in Kememej eo ilo yiõ in ej bar juõn ien emõn ñan kwalok ad kamolol kin katok in binmour eo an Christ ilo ad kalaplok ijo kunair ilo jerbal in kwalok nan.
10 Ke ej ebaktok April 16, lemnak kin ta eo Kwojkwoj in Kememej eo ej melelen ñan yuk. Lemnak kin men ko rar walok im rar tellok ñan mij eo an Christ im kin lemnak ko me rar lap an kainebataik e. Kalmenlokjen, bareinwõt, kin lañliñ eo kar likit iman Jesus im ewi wãwen ear jibañ e ñan kijenmij kin kõmman ko renana nae e. Lemnak kin jerbal eo an kiõ einwõt Bõran congregation eo, im an lolorjake jerbal in kwalok nan im kõmman ri kalor ro. (1 Kor. 11:3; Hib. 12:2; Rev. 14:14-16) Inem kwalok kamolol eo am kin aolep men ko Christ ear kõmmani ilo am bõk kunam joñan am maroñ ilo jerbal in kwalok nan ekkar ñan wãwen ko am.
11 Rejañ Ro Jet ñan Kõmman Bwe En Let Air Jerbal: Ilo air bõk kunair ilo jerbal in auxiliary pioneer, elder ro im ministerial servant ro renaj maroñ rejañ ro jet. Ñe rej jerbal ibben ri kwalok ro ilo jerbal in kwalok nan im ñe rej lolok ir, ewõr ien ko remõn ibbeir ñan jibañ ro jet ñan bõk kunair ilo jerbal in ejej uan. Kimij kejatdikdik bwe kij aolep jenaj jar kake men in, im ilo wãwen in kakajurlok jibadbad ko ad reburukuk ñan kõmman bwe en let ad kwalok nan.
12 Meñe aolep elder ro im ministerial servant ro renaj jerbal ekkar ñan karõk ko an congregation kin jerbal ko relaplok ilo alliñ ko ilo March im April, service overseer eo elaptata en kõmman karõk ko rekkar kin jerbal in evanjel eo. Ej aikwij karõk jikin ko ñan kwelok ie ñan kwalok nan, ran ko, im ien ko remõn ñan aolep ri kwalok ro im kõmman bwe en keini air kejelã kake ilo Service Meeting ko. Remaroñ kõmman karõk ko ñan kwelok elõñ alen ilo ran eo, im ilo wãwen in lelok ñan aolep ro ilo congregation eo ien ko remõn ñan bõk kunair ilo kajjojo wãwen ko ñan kwalok nan. Men kein remaroñ koba jerbal ilo jikin business, kwalok nan iturin ial, jerbal jen em ñan em, kõmman bar jeblak ko, im kwalok nan ikijen kajerbal telephone. Bareinwõt, ej aikwij karõk bwe en bwe book ko, magazine ko, im territory ko ilo alliñ kein.
13 Book in lelok eo ilo March naj book in Jelãlokjen, kin mejenkajjik eo ñan jino Bible study ko. Nan in rejañ ko remõn ñan lelok book in Jelãlokjen rej walok ilo January 2002 Ad Jerbal Ñan Ailiñ Eo peij eo iloa. Men in lelok eo ilo April naj magazine in Imõniaroñroñ im Awake! Kajeoñ in kajerbal ennan ko rej walok ilo “Ta eo Jemaroñ Ba kin Magazine Ko.” Aolep ren bõk ien ñan kebojak ilo emõn bwe en maroñ let air kwalok nan.
14 Elap ad mõnõnõ bwe jej jerbal iumin tel eo an Bõran congregation eo, Christ Jesus, im ewõr jerammõn eo ibbed ñan jaketo-jaketak news eo emõn ibben ro jet! Ke ej ebaktok alliñ ko March im April, jen kate kij ñan bar kõmman bwe ren alliñ ko ad remõntata ke jej bokake kien eo an Christ ñan kwalok nan im en let ad kennan.
[Box eo ilo peij 4]
Wãwen ko Kajjojo ñan Auxiliary Pioneer ilo March im April 2003
Ran Awa ko
Monday 1 2 — — 2 —
Tuesday 1 — 3 — — —
Wednesday 1 2 — 5 — —
Thursday 1 — 3 — — —
Friday 1 2 — — — —
Saturday 5 4 3 5 6 7
Sunday 2 2 3 2 2 3
March 56 56 54 55 50 50
April 50 50 51 53 — —
Juõn ian schedule kein remaroñ ke jerbal ñan yuk?