Jerbal eo Me Ej Kaemololo
1 Ennan eo ilo Bible ej kaemololoik aolep ro rej bõke im jerbale ilo mour ko air. (Sam 19:7, 8) Ej jibañ ir ñan kanemkwoj ir jen katak ko rewan im manit ko rekauwatata im ej letok juõn kejatdikdik jemaroñ liki kin ilju im jeklaj. Bõtab, ro rej bõk news eo emõn ejjab ir wõt rej bõk tokjen. Ro rej jake mol ko ilo Bible ibben ro jet rej bareinwõt bõk kaemololo.—Ken. 11:25.
2 Bõk Kakajur jen Jerbal in Kwalok Nan: Jesus ear ba bwe ro rej bõk ine eo kin air Christian ri kalor ro, eo ej kitibuj jerbal in kwalok nan im kõmman ri kalor ro, renaj “lo an [air] kakije.” (Mat. 11:29) E make ear lo bwe an kwalok nan ñan ro jet ear kakajurlok e. Ear einwõt kijen. (Jon 4:34) Ke ear jilkinlok ri kalor ro 70 ñan kwalok nan, rar lañliñ ke rar lo bwe Jehovah ear rejetak jibadbad ko air.—Luk 10:17.
3 Elõñ Ri Christian ro rainin rej bareinwõt bõk kakajur ikijen air bõk kunair ilo jerbal in kwalok nan. Juõn sister ear ba: “Jerbal in kwalok nan ej kakajur kinke ej letok tel im karõk ilo mour eo aõ. Abañ ko im ijjibed ko aõ jen ran ñan ran rej diklok ñe ij bõk kunaõ ilo jerbal in kwalok nan.” Bar juõn ri kwalok ekijejeto ear ba: “Jerbal in kwalok nan . . . ej kakememej iõ ran otemjej bwe Jehovah ej juõn eo emol an bed im ej letok ñan iõ ainemõn im mõnõnõ eo iloa me ijjab maroñ bõke ilo bar juõn wãwen.” Ej juõn jerammõn elap ewõr ibbed bwe jen “dri jerbal iben Anij”!—1 Kor. 3:9.
4 Ine eo an Christ Ej Emõn: Ke ear rejañ Ri Christian ro bwe ren ‘kate ir,’ Jesus ear jab aikwij watõk jen ir elap jen air maroñe. (Luk 13:24) Emol, ilo yokwe ej kir kij ñan ‘itok iumin ine eo an.’ (Mat. 11:29, NW ftn.) Ro rej jelmae wãwen ko rebin remaroñ liki bwe jerbal eo air jen aolepen burueir, meñe ewõr joñan, ej kabuñburuen Anij.—Mark 14:6-8; Kol. 3:23.
5 Elap an kaemololo ñan karejar ñan juõn Anij eo ej kaorõk jabdewõt men jej kõmmane kin etan! (Hib. 6:10) Jen kate kij ien otemjej ñan lelok men eo emõntata ñan e.