Kajeoñe Lejokmen eo an Jehovah
1 Elikin ad lañliñ kin juõn tulok in al eaibujuij ak juõn mõñã enno, men in ejjab kamakit kij ke ñan kamolol Jehovah, Unjen lejokmen otemjej? Lejokmen eo an ej kamakit kij ñan ad kõnan kajeoñe e. (Sam 119:66, 68; Ep. 5:1) Ewi wãwen jemaroñ kwalok kadkad in lejokmen?
2 Ñan Ro Rejjab Tõmak: Juõn wãwen jemaroñ kajeoñe lejokmen eo an Jehovah ej ilo ad kwalok itoklimo eo emol kin ro rejjab bed ilo nukin tõmak. (Gal. 6:10) Kwalok lejokmen ilo wãwen ko rekeie emaroñ jelet ilo emõn wãwen eo rej watõk Ri Kennan ro an Jehovah im ennan eo jej bõktoke.
3 Ñan wanjoñok, ke ear kõttar ilo juõn jikin doctor, juõn pioneer likao ear jijet iturin juõn lellab eo elaplok an kar nañinmij jen ro jet rar bed ijo. Ke kar ien an lo doctor eo, leo ear kõtlok bwe lellab eo en bõk jikin. Tokelik ear bar iione, ilo ien in ilo mõn wia eo, im lio ear mõnõnõ in lo e. Meñe lio ear makoko in roñjake kin news eo emõn mokta, ear ba bwe kiõ ej jelã bwe Ri Kennan ro an Jehovah emol air yokwe ri turiir. Rar jino air keini katak Bible ibben.
4 Ñan Ro Jeid im Jatid: Jej bareinwõt kajeoñe lejokmen eo an Jehovah ñe jej kate kij ñan jibañ ri tõmak ro jeid im jatid. Ilo ien ej jidimkij im walok jorrãn ko, kij jej ian ro moktata ñan lelok jibañ ñan ro jeid im jatid. Jej kwalok ejja jitõb in wõt ñe jej jibañ ro rej aikwiji ial eo ñan itok ñan kwelok ko, lolok ro renañinmij, im ñe elaplok buruõd ñan kobaik ro jejjab lukkun jelã kajjiir.—2 Kor. 6:11-13; Hib. 13:16.
5 Bar juõn wãwen Jehovah ej kwalok lejokmen ej ilo an “kõnan jeõrlok.” (Sam 86:5) Ñan kajeoñe e, jemaroñ kwalok ad yokwe lejokmen ilo ad jeorlok bwid ko an ro jet. (Ep. 4:32) Men in ej jibañ ñan kõmman bwe kamao eo ad ibben ri tõmak ro mõttad en ‘emõn im men in mõnõnõ.’—Sam 133:1-3.
6 Kimij kejatdikdik bwe lejokmen elap an Jehovah enaj kamakit kij ñan nebar e im bõplolin kin lañliñ. Im en kamakit kij ñan kate wõt ñan kajeoñe lejokmen eo an ilo jabdewõt men ko jej kõmmani.—Sam 145:7; Jer. 31:12.