Jodikdik Ro—Kalek juõn Foundation Emõn kin Ran ko Renaj Itok
1 Ta eo elaptata ej bed ilo lemnak eo am? Ta eo kwoj lemnak kake? Men ko elaptata am itoklimo kaki rej kin men ko kiõ ke, ak rej kin men ko renaj itok im rej bedbed ion ta eo Anij ear kallimur kake? (Mat. 6:24, 31-33; Luk 8:14) Juõn tõmak ekajur ej men eo jej aikwiji ñan emmakit kin kallimur ko an Anij, einwõt jemaroñ loe jen wanjoñok ko an Abraham im Moses. (Hib. 11:8-10, 24-26) Ewi wãwen kwomaroñ kaddeklok tõmak rot in im kalek juõn “foundes̃õn emõn mae ien ej itok”?—1 Tim. 6:19.
2 Bukõte Jehovah: Elañe ewõr juõn manit kin makitkit ko lor jitõb ibben family eo am, kimij nebar yuk. Ak kwon jab make lemnak bwe juõn manit einwõt in enaj make kwalok juõn tõmak ekajur. Ñan lo “jelalokjen kin Anij,” kwe make kwoj aikwij bukõt Jehovah. (Ken. 2:3-5; 1 Kron. 28:9) King eo emõn dettan Josiah ear kõmmane men in. Meñe ear rittolok ilo juõn wãwen ejjab lukkun emõn ñan eddeklok ilo jitõb, “e ar jino in kabukot Anij an Devid jemen” ke ear 15 yiõ dettan.—2 Kron. 34:3.
3 Ewi wãwen kwomaroñ kabukõt Jehovah? Ilo am lukkun etale ta eo kwoj tõmak im ‘kamole ñan yuk make’ bwe ej lukkun mol eo. (Rom. 12:2) Ñan wanjoñok, kwomaroñ ke kamelele kin ta eo Bible ej ba kin bõtõktõk ak ñan kamol bwe Ailiñ eo an Anij ear jino iroij ilañ ilo 1914? Bõk “mol eo” ej juõn mõttan eaorõk ñan kalek juõn foundation emõn kin ran ko renaj itok.—1 Tim. 2:3, 4.
4 An Josiah kabukõt Anij ear kwalok tokjen ko remõn. Mokta jen ear tõbar 20 yiõ dettan, ear emmakit ilo beran ñan jolok kabuñ eo ewan jen ene eo. (2 Kron. 34:3-7) Eindein, wõnmanlok eo am ilo jitõb enaj alikar ilo makitkit ko am. (1 Tim. 4:15) Elañe kwoj juõn ri kwalok ejañin baptais, kate yuk ñan kakõmanmanlok emõnin jerbal in kwalok nan eo am. Kwon jab juburu ilo am baj lelok wõt book ko. Kõmman bwe en mejenkajjik eo am ñan kajerbal Bible eo, ñan kõmmanwa ibben armij, im ñan kaddeklok itoklimo eo an ro kwoj iion ir. (Rom. 12:7) Men in enaj jibañ yuk ñan eddeklok ilo jitõb.
5 Lelok ñan Jehovah Joñan Wõt Am Maroñ: Ke kwar kakõlleik wujleplok eo am ñan Jehovah ilo am baptais, kwar erom juõn ri karejaran Anij. (2 Kor. 3:5, 6) Men in ej kabellok ien ko remõn ñan am karejar ñan Jehovah full-time. Men kein rej koba pioneer im bareinwõt jerbal ilo Bethel, missionary, im ilo international service. Wãwen ko jet ñan kalaplok jerbal in kwalok nan eo am emaroñ kitibuj am katak bar juõn kajin ak ñan emmakit im jerbal ilo jikin ko elaplok air aikwiji jibañ ie.
6 Emol, ejjab aolep remaroñ bõk kunair ilo jerammõn in jerbal kein, ak kij kajjojo jemaroñ lelok ñan Jehovah joñan wõt ad maroñ. (Mat. 22:37) Jekdon ta wãwen ko ibbam, kõmman bwe am karejar ñan Jehovah en men eo eaorõktata ilo am mour. (Sam 16:5) Ilo am kõmman eindein, kwonaj kalek juõn foundation emõn kin ran ko renaj itok.
[Kajjitõk ko]
1. Etke Christian jodikdik ro rej aikwij kaddeklok tõmak eo ebin?
2. Ta eo jej katak jen wanjoñok eo an King Josiah?
3. Ewi wãwen Christian jodikdik ro remaroñ bukõte Jehovah?
4. Ewi wãwen ri kwalok ro rejañin baptais remaroñ kõmman bwe wõnmanlok eo air en alikar?
5. Ta ien ko remõn ñan kalaplok jerbal in kwalok nan eo air ej bellok ñan Ri Christian ro emwij air baptais?
6. Ewi wãwen kij aolep jemaroñ kalek juõn foundation emõn kin ran ko rej itok?