En Emõn Mejõm

¹ Ilo katak eo an ion Tol eo, Jesus ear kalikar kin kilan eo elap an mejed ilo kõkkar ion aolepen wãwen mour eo ad. Ear ba: “Inem elañe emõn mejõm, aolepen enbwinõm e naj obrõk kin maram. A elañe enana mejõm, aolepen enbwinõm e naj obrõk kin marok.” (Mat. 6:22, 23) Juõn mej emõn ej kalimjeke juõn wõt karõk​—kõmanman ankil an Anij​—im ejjab kõtlok bwe inebata ko kin men ko lor kanniek en kamad e. (Mat. 6:19-21, 24-33) Ta eo emaroñ jibañ kij kejbãrok juõn mej emõn?

² Kaddeklok Ad Juburu: Juõn eddo ekkar ñan Bible ej ñan kabwe aikwij ko an family eo. (1 Tim. 5:8) Ak men in ejjab melelen bwe jej aikwij jibadõk men ko remõntata im rekãltata. (Ken. 27:20; 30:8, 9) Jen an eindein, Jeje Ko ej rejañ kij bwe jen juburu kin “mõña im nuknuk ko,” men in aikwij ko an mour. (1 Tim. 6:8; Hib. 13:5, 6) Ilo ad bokake nan in kakabilek in enaj jibañ kij bwe en ekkar men ko jej reimanlok ñani.

³ Ej men in meletlet bwe jen jab kaddoik kij make kin muri ko rejjab men in aikwij im kin mweiuk ko ak jibadbad ko me rej bõk elap ien. (1 Tim. 6:9, 10) Ewi wãwen jemaroñ kõmmane men in? Ñe jej lemnak kin juõn men jenaj kõmmane, jar kin men eo im lale elañe enaj jumae jibadbad ko lor jitõb. Kwon beek ñan kejbãrok bwe men ko lor jitõb ren moktata ilo mour eo am.​—Pil. 1:10; 4:6, 7.

⁴ Kabidodolok Wãwen Mour eo Am: Bar juõn men in jibañ ñan jumae kareelel eo kin arõk mweiuk ej ñan kõmman bwe en lamwan wãwen mour eo am. Juõn brother eo ear lo bwe ear emõn wõt an family eo an mour meñe ear jab le jen joñan an wõr mweiuk ibbeir ear ba: “Elaplok men ko I maroñ kõmmani kiõ ñan karejar ñan ro jeiõ im jatiõ ilo congregation eo. Ij jelã bwe Jehovah ej kajerammõn aolep ri karejar ro an ñe rej likit bwe kabuñ eo emol en iman kõnan ko air make.” Kwomaroñ ke lañliñ kin jerammõn ko relaplok ilo am kõmman bwe en lamwan wãwen mour eo am?

⁵ Jej aikwij kate wõt kij ñan jumae kilan eo an Satan, lal eo an ej arõk mweiuk, im mour jab wãppen eo ad. Jen ad kõtlok bwe en emmõkadkad mejed, jej aikwij reimanlok wõt ñan ad kõmanman ankil an Anij im ion kejatdikdik eo ad eaorõk kin mour indio.​—Ken. 4:25; 2 Kor. 4:18.

[Kajjitõk ko]

1. Ta melelen bwe en emõn mejed, im etke men in eaorõk?

2. Ta lemnak eo Nan in Anij ej rejañ kake kin men ko lor kanniek?

3. Ta eo enaj jibañ kij ñan bõprae ad kaddoik kij make?

4. Etke jej aikwij bukõt wãwen ko ñan kõmman bwe en lamwan wãwen mour eo ad?

5. Etke jej aikwij kate wõt kij ñan kõmman bwe en emõn mejed?