Elamwan ke Mejõm?
1. Ta melelen bwe en “emõn” ak lamwan mejer?
1 Men ko mejer ej kalimjeki rej jelet kõmõn ko ar. Elukkun ekkar im jejit nan kein an Jisõs: “Elañe emõn [ak lamwan] mejõm, aolepen enbwinõm e naj obrõk kin maram”! (Matu 6:22) Elañe mejer ej “emõn” ak lamwan einwõt an kar Jisõs ba, jenaj kalimjek ak jibarek juõn wõt men, ñõn kõmõnmõn ankilan Anij. Jenaj likit Ailiñ eo moktata im jeban mad kin mweiuk ak kein kamõnõnõ ko im rej kabañ jerbal in kwalok nan eo ar.
2. Ta eo emaroñ kõmõn bwe en tab lolokjen eo ar, ak ta eo emaroñ jibõñ kij?
2 Aikwij eo ñõn Etale Kij Mõke: Lolokjen eo ar emaroñ tab elañe jej lore menin kareelel ko, im bareinwõt elañe jej kõnan men ko eor iben ro jet. Mokta jen ar jibarek ak wiaik juõn men im emaroñ bõk elap ien, jããn, im kajur ko ar, emõn elañe jej mokta “bebe kin wõnan” eo ilo ar kajitõkin kij mõke, ‘Menin enaj kakõmõnmõnlok ke, ak kabañ wãwen aõ korijer ñõn Jeova?’ (Luk 14:28; Pil. 1:9-11) Ej bareinwõt menin meletlet ñõn etale kij mõke jen ien ñõn ien kin ewi wãwen jemaroñ kõmõn bwe en lamwan mour ko ar bwe jen maroñ kalaplok ijo kwonad ilo jerbal in kwalok nan.—2 Kor. 13:5; Ep. 5:10.
3. Ta eo jej katak jen sister in me ear kõmõn oktõk ko bwe en lamwan mour eo an?
3 Ke juõn sister ear jino an regular pioneer, ear drebij wõt an full-time ilo jikin jerbal eo an, meñe emaroñ kar part-time im kabwe aikwij ko an. Tokelik, ear ba: “Ejelok en emaroñ korijer ñõn ruo iroij. Iar aikwij karmijeteik kõnan ko aõ bwe in maroñ kabwe aikwij ko aõ. Iar kile bwe mweiuk ko renaj morlok, im aõ jibarek mweiuk kein ej kõmõn bwe in lukkun mõk.” Tokelik, ear maroñ kõmõn oktõk ko bwe en lamwan mour eo an, ukot jikin jerbal eo an, im ear maroñ wõnmanlok wõt im pioneer.
4. Etke elukkun aurõk kiõ bwe jen drebij juõn mej elamwan?
4 Kinke ran ko eliktata kein, elaplok an aurõk jen mokta ñõn ar kõmõn bwe mejer en lamwan. Kajjojo ran jej ebakelok jemlokõn jukjuk im ber in enana im jinoin lõl eo ekãl an Anij. (1 Kor. 7:29, 31) Ilo ar kõmõn bwe jerbal in kwalok nan eo ar en men eo aurõktata, jemaroñ lomoren kij bareinwõt ro rej roñjake kij.—1 Tim. 4:16.