Program eo Ekãl kin Ran in Special Assembly

Kar kõmanman mej eo ilo juõn wãwen ekabwilõñlõñ. (Sam 139:14) Ak, emaroñ kalimjek juõn wõt men. Men in emol ilo kanniek im ilo men in kõkkar jimor. Ñan kejbãrok bwe lolokjen eo ad ilo jitõb en alikar, jej aikwij kalimjek wõt ad kõmanman ankil an Anij. Ilo lemnak kin men in kamad ko rej laplok wõt ilo lal in an Satan, elukkun ekkar bwe program in ran in special assembly eo ilo yiõ in jerbal eo 2006 ej ejaak ion unin tel eo “Komin Kõmman Bwe Mejõm En Lamwan”!​—Mat. 6:22.

Ta eo jemaroñ kõmmane bwe jen maroñ bõk jerammõn ko jen Jehovah? (Ken. 10:22) Jenaj etale kajitõk in ilo katak eo “Madmõd Jerammõn ko kin Am Kõmman Bwe Mejõm En Lamwan.” Interview ko renaj kwalok kin ewi wãwen jemaroñ bõk tokjen jen ad jerbale nan in kakabilek ko ilo Bible. Katak eo mokta an ri lotok eo, “Kejbãrok Bwe Mejõm En Lamwan ilo juõn Lal Enana,” ej kakkõl kij kin men ko me remaroñ kõmman bwe en kabwokbwok mour ko ad im jidik kin jidik emaroñ kautameik mour in jitõb eo ad. Jenaj bareinwõt katak kin ta eo ekoba ilo ad kãlet “ãjenkij eo emõn.”​—Luk 10:42.

Ewi wãwen ro jemen im jinen im ro jet remaroñ rejañ Christian jodikdik ro ñan air kalimjeklok jibadbad ko ilo jitõb? Katak ko “Ro Jemen im Jinen Me Ejimwe Air Aleje Made ko Air” im “Jodikdik Ro Me Rej Jibadõk Mejenkajjik ko Lor Jitõb” renaj kobaik nan ko jen ro jemen im jinen im jodikdik ro kin kajitõk in eaorõk. (Sam 127:4) Katak eo eliktata an ri lotok eo enaj etale kin ewi wãwen jemaroñ wõnmanlok ibben dolul eo an Jehovah einwõt armij ro kajjojo, einwõt family ko, im einwõt juõn congregation.

Meñe jej kab jelã mol eo ak jaar karejar ñan Jehovah iumin elõñ yiõ ko, eaorõk bwe jen kõmman bwe en ‘lamwan mejed.’ Program in ran in special assembly eo enaj jibañ kij kõmmane men in.