Jerbal eo Ejej Uan ñan Leto-letak Brochure eo Ekãl
1 Elõñ armij rainin rej inebata kin wãwen ko ilo lal in, ak jet wõt rej melele kin unin an eindein, ta eo ej bed imair, im ta eo rej aikwij kõmmane bwe ren ele im mour jen ran in ekajet eo ej berotok. (Ezek. 9:4, New World Translation) Ñan jibañ ir bwe ren kile aorõkin ien ko ad, juõn jerbal ejej uan ñan leto-letak brochure eo ekãl Keep on the Watch! (Komin Ekkõl!) naj walok jen Monday, October 18, ñan Sunday, November 14.
2 Jenaj leto-letak brochure eo ilo ien jej bõk kunad ilo jerbal in kwalok nan jen em-ñan-em, ñe jej bar jeblak, ñe jej kwalok nan ilo jabdewõt ien emõntok, ak ilo jikin ko ilobwilij. Bõtab, jen jab lelok Keep on the Watch! brochure eo ñan aolep armij. Jen an eindein, jenaj lelok brochure eo ñan ro wõt im rej kwalok air itoklimo kin ta eo Bible ej ba kin ta melelen men ko rej walok ilo lal in. Ñan ro jet me jidik wõt air itoklimo jemaroñ lelok juõn tract ñan ir.
3 Kwomaroñ kaitoklimoen juõn armij ilo am ba:
◼ “Elõñ armij rej inebata kin abañ ko relap im men ko rekailbõkbõk rej walok me ekkã air walok kiõ. [Kwalok juõn wanjoñok rej jelã kake ilo bukwon eo.] Kwar jelã ke bwe kar kanan kin men kein ilo Bible eo? [Kõtlok an uak. Inem konono juõn eon ekkar me ej jitõñlok ñan abañ eo kwar kwalok kake, einwõt Matu 24:3, 7, 8; Luk 21:7, 10, 11; ak 2 Timote 3:1-5.] Bible eo ej kwalok kin ta melelen ien kein ad im ta eo ej bed imad. Kwokõnan ke kalaplok am jelã kin men in? [Kõtlok an uak. Lelok brochure eo elañe emol air itoklimo.] Ejelok wõnãn brochure eo. Ak elañe kwokõnan letok jidik jabawõt ñan jerbal eo am ibelakin lal, kim naj mõnõnõ in bõke.”
4 Ak kwomaroñ lo bwe ekeie wãwen in:
◼ “Elõñ armij rainin rej buromõj kin men ko rekailbõkbõk rej walok ilo lal in ak juõn jorrãn me elap an kar jelet ir. Jet rej lemnak kin etke Anij ejjab bõprae men rot kein. Bible eo ej kamol ñan kij bwe ejjabto jen kiõ Anij enaj emmakit ñan bõktok jemlokin eñtan ko an armij. Lale ta jerammõn ko Anij enaj lelok ñan armij. [Konono Sam 37:10, 11.] Kwokõnan ke kalaplok am jelã kin men in?” Kajemlok einwõt kar kõlajrake ilõñ.
5 Kajeoñ in bõk etan im address eo an kajjojo armij ro rej bõk juõn copy in brochure eo, im karõk ñan bar jeblak ñan kalaplok itoklimo eo. Nan in rejañ ko kin ewi wãwen jemaroñ kõmmane men in renaj walok ilo November 2004 Ad Jerbal Ñan Ailiñ eo. Elañe juõn armij elap an kwalok an itoklimo ilo ien lolok eo mokta, kwomaroñ jino juõn Bible study ilo mõkaj ilo am kajerbal Keep on the Watch! brochure eo ak bar juõn kein read, einwõt Jen Kõmmõne brochure eo.
6 Kwomaroñ bõk copy ko kin brochure in ekãl elikin Service Meeting eo ñe rej bwebwenato kin katak in. Rej rejañ bwe ilo jinoin ri kwalok ro im pioneer ro ren bõk wõt joñan copy ko renaj aikwiji ilo ran ko jinoin ilo jerbal eo. Kimij kejatdikdik bwe Jehovah enaj kajerammõn jerbal in ejej uan ñan aibujuij eo an im ñan tokjen eo emõn ñan ro emol burueir ijoko otemjej.—Sam 90:17.