Juon Iien Campaign ñan Jino Kõm̦m̦an Rũkkatak Baibõl̦ ilo Allõñin Jeptõm̦ba

Ilo allõñin Jeptõm̦ba, jenaaj lukkuun kate kõj ñan kajjitõk ippãn aolep ro jej iioon er ñe rekõn̦aan katak Baibõl̦, ilo ad kõjerbal brochure eo M̦õn̦õn̦õ kõn Mour ñan Indeeo! Ri-kwal̦o̦k naan ro me renaaj akjel̦õri bainier remaroñ kããlõt ñan kõm̦m̦ane 30 awa. Ewi wãween ad naaj bõk kun̦aad ilo campaign in?

• Ilo Jinoin Ad Kõnnaan Ippãn Armej: Kõjerbale tulikin brochure eo ñan jino kãitoklimoik armej eo, im kajjioñ kwal̦o̦k kilen ad katak ippãn. Keememej ro rar kwal̦o̦k aer itoklimo m̦okta, ekoba ro jej jepl̦aak ippãer. Meñe rar jab kõn̦aan katak m̦okta, ak remaroñ itoklimo kõn kilen katak in ekããl im brochure eo. Jejjab aikuj likũt brochure ko ilo m̦õko ejjel̦o̦k armej ie ak jab jilkinl̦o̦k ilo lõta ko ad ñan ro rar jab kwal̦o̦k aer itoklimo m̦okta. Kamiti eo an Eklejia eo emaroñ kõm̦m̦an karõk bwe en lõñl̦o̦k kweilo̦k in kwal̦o̦k naan ilo allõñ eo.

• Wãween ko Jet Repel̦l̦o̦k ñan Ad Kõm̦m̦ani: El̦aññe eklejia eo am̦ ej kõjerbal wawa bwilbwil ko, kom̦win kwal̦o̦k brochure eo M̦õn̦õn̦õ kõn Mour ñan Indeeo! Kõmel̦el̦eik ro rej kwal̦o̦k aer itoklimo bwe ñe renaaj bõk juon brochure, remaroñ bar katak Baibõl̦ ilo ejjel̦o̦k on̦ããn. Kwal̦o̦kl̦o̦k ilo tukadu kilen ad katak ippãn armej ilo ejja iien eo wõt, ak kwõmaroñ kõm̦m̦an karõk ñan kõm̦m̦ane men in tokãlik. Em̦m̦aan eo ej loloodjake jerbalin kwal̦o̦k naan emaroñ kõm̦m̦an karõk bwe ri-kwal̦o̦k naan ro el̦ap imminene ko ippãer ilo kwal̦o̦k naan ren etal ñan peejnej ko ilo teretore eo im kajjitõk ippãn armej ro ñe rekõn̦aan katak Baibõl̦. Kwõmaroñ bareinwõt kajjitõk ippãn ri-jerbal ro kwõj jerbal ippãer el̦aññe rekõn̦aan katak Baibõl̦ ak ippãn armej ro kwõj iioon er ilo am̦ kwal̦o̦k naan ilo iien em̦m̦an tok.

Jesus ear jiroñ kõj ñan ‘kõm̦m̦an ri-kal̦oor,’ im “katakin er.” (Mt 28:19, 20) Campaign in en jipañ kõj ñan katõprak kõttõpar in, ilo ad kõjerbal brochure eo M̦õn̦õn̦õ kõn Mour ñan Indeeo!