Kate Yuk ñan Kwalok Nan
1 Jej bed ilo ien ko renana. Keojaljal ikõtan armij ro, tarinae ikõtan kumi in armij ro, jorrãn ko an lal, im men ko jet rekamijak ekkã air walok. Elaplok an armij aikwiji news eo emõn kiõ jen mokta. Bõtab, jab kea kin men ko lor jitõb ej jededlok wõt. Ilo jet jikin ko, ebin lo armij ro ilo moko imwiir im ebinlok ñan lo armij ro me rej mõnõnõ in roñjake ak rekõnan katak Bible. Meñe eindein, eaorõk bwe jen wõnmanlok im kate kij ñan kwalok kin news eo emõn kin Ailiñ in Anij eo me emwij an jutak.—Mat. 24:14.
2 Yokwe Armij: Jerbal in kwalok nan eo ad ej kalikar yokwe eo an Jehovah ñan armij. “[Ejjab] kõnan bwe jabrewõt en joko, a bwe ren otemjej itok im ukwelok ibeir.” (2 Pit. 3:9; Ezek. 33:11, New World Translation) Kin men in, ear kakien, einwõt Jesus ear ba, “Im naj kwalok gospel ñõn dri ailiñ ko otemjej mokta.” (Mark 13:10) Anij ej akwelap ñan armij bwe ren bukõt e im jeor jen ekajet eo ej itok ion lal eo an Satan. (Joel 2:28, 29, 32, NW; Zeph. 2:2, 3, NW) Jejjab kamolol ke bwe Jehovah ear letok ien in emõn ñan kij?—1 Tim. 1:12, 13.
3 Report eo ibelakin lal ej kwalok bwe ilo 2004 yiõ in jerbal eo, rar kõmman joñan in 6,085,387 Bible study ko kajjojo alliñ, im enañin 5,000 ri karejar ro rekãl rar baptais kajjojo week! Jet ian ri karejar rein rekãl kar lo ir kin an Jehovah kajerammõn jibadbad ko an ri kwalok ro me rar kate ir ñan konono ibben aolep armij ro ilo territory eo air. Men in ear walok ilo elap lañliñ ilo congregation ko, im ej juõn jerammõn elap bwe jen juõn ian ri jerbal ro mõttan Anij ilo jerbal in lomor in!—1 Kor. 3:5, 6, 9.
4 Nebar Etan Anij: Jej kate kij ñan kwalok nan ñan nebar Jehovah ilobwilij im ñan kokwojarjar etan iman armij otemjej. (Hib. 13:15) Satan ear mone “aolepen lõl” ñan tõmak bwe Anij ejelok an kajur ñan kamadmõde abañ ko an armij, bwe ejjab kea kin eñtan ko air, ak bwe Anij ejjab bed. (Rev. 12:9) Ikijen jerbal in kwalok nan eo ad, jej jojomare mol eo ikijen Jemed eaibujuij ilañ. Jen wõnmanlok im nebar etan—kiõ im indio.—Sam 145:1, 2.