Kwalok Itoklimo kin Armij Ro—Ikijen Am Kwalok Kajitõk ko im ilo Am Roñjake
1 Elõñ armij rej mõnõnõ in kwalok lemnak ko air ak rejjab kõnan ñe armij rej kajimwe ak kajitõkin ir. Kin men in, einwõt Christian ri karejar ro jej aikwij katak kilen kajerbal kajitõk ko ñan jelã lemnak ko an armij.—Ken. 20:5.
2 Kajitõk ko ad ren kamakit armij ñan lemnak, jab kabõnõnõik ir. Ke ear kwalok nan jen em ñan em, juõn brother ej kajitõk, “Kwoj lemnak ke bwe enaj wõr juõn ien ñe armij renaj jerbal ibben don ilo kautiej?” Ekkar ñan uak eo an armij eo, ej wõnmanlok, “Ta eo kwoj lemnak ej men in aikwij ñan kõtõbrak men in?” ak “Etke ej eindein am lemnak?” Ke ej kwalok nan ilo jabdewõt ien emõn tok im ilo jikin ko ilobwilij, bar juõn brother ej kajitõk ibben ro ewõr nejiir ajiri, “Ta men eo elaptata an kalañliñ yuk kin am juõn jemen ak jinen?” Inem ej kajitõk, “Ta men ko elaptata air kainebataik yuk?” Lale bwe kajitõk kein rej kõtlok bwe armij ren kwalok lemnak ko air im jab kajook ir. Kinke eoktak wãwen ko ibben kajjojo armij, jemaroñ aikwij ukõt wãwen kajitõk ko ad bwe en jejjet ñan territory eo ad.
3 Kõmman Bwe Armij Ren Kwalok Lemnak ko Air: Elañe armij rej mõnõnõ in kwalok lemnak ko air, ilo meanwõd kwon roñjake ilo am jab kabõjrak e. (Jem. 1:19) Ilo joij kwon kamolol ir kin uak ko air. (Kol. 4:6) Kwomaroñ baj ba: “Kommol kin am kwalok lemnak in.” Nebar ir elañe emol am maroñ kõmmane men in. Ilo joij kwalok kajitõk ko jet ñan jelã ta lemnak eo air im etke ej eindein air lemnak. Bukõt juõn men komij errã kake. Ñe kwokõnan kareilok ir ñan juõn eon, kwomaroñ ba, “Kwonañin kar lemnak ke elañe emaroñ walok men in?” Kwon bõprae am bõk juõn lemnak ekijñeñe ak lemnak in akwel.—2 Tim. 2:24, 25.
4 Wãwen eo jej roñjake emaroñ jelet wãwen eo ro jet rej uak ñan kajitõk ko ad. Armij rej jelã elañe emol ad roñjake. Juõn overseer eo ej itoitak ear kile: “Ñe kwoj mõnõnõ in roñjake ñe armij eo ej konono, elap an maroñ kareel e im ej juõn wãwen ñan kwalok itoklimo eo emãnãn.” Ñe kwoj roñjake ñe ro jet rej konono ej kwalok am kautiej ir, im emaroñ kamakit ir ñan air roñjake news eo emõn me jekõnan kwalok ñan ir.—Rom. 12:10.