Kwon Kõttar Wõt Jehovah
1. Ta unin tel in convention eo, im etke ekkar?
1 “Jeova juõn Anij in ekajet jime,” Aiseia ear je. “Re mõnõnõ ro otemjej rej kõtar E.” (Ais. 30:18b) Elõñ bwebwenato ko ilo Bible rej kwalok kin ekajet eo an Anij nae ri kijirãt ro an im an lomoren ri karejar ro an retiljek. Ta eo bwebwenato kein rej katakin ri kabuñ ro an Jehovah rainin? Ta eo jemaroñ kõmmane kiõ bwe jen bojak ñan “ran eo elab im kaamijak an Iroij”? (Joel 2:31, 32) “Lomor Eo Ej Ebak!” District Convention eo ad me ej bedotok enaj kamakit kij ñan kalmenlokjen kake kajitõk kein im etale kij make. Enaj jibañ kij ñan kõttar wõt Jehovah.
2. Ewi wãwen jemaroñ kwalok ad kamolol kin district convention eo ad?
2 Emwij ke am kõmman karõk ko ñan am bed im bõk tokjen jen kajjojo program in convention eo? Ñan wanjoñok, emwij ke am kebak boss eo am ñan kajitõk elañe kwomaroñ bõk ien kakije ñan am maroñ bed ilo kwelok ko? Kwon jab baj kõtmene wõt bwe boss eo am enaj kõtlok am kakije. Kwon jar inem kajitõk. (Nih. 2:4, 5) Eindein, jen jab aibedbed in kabin karõk ko ad kin ial in itoitak, jikin kiki, im men ko jet raorõk. Karõk rot kein remõn rej kwalok kamolol eo ad emũlal kin karõk eo an Jehovah ñan najidik kij kin men ko lor jitõb. Elder ro rej aikwij bojak ñan jibañ ro jet kõmman karõk ko air ñan bed ilo convention eo, elaptata ro reritto ilo congregation eo.—Gal. 6:10.
3. Ewi wãwen mwilid emaroñ bõktok nebar ñan Jehovah?
3 Mwil Emõn Ej Nebar Anij: Ñe elõñ iad jej kweloklok ibben don ilo convention ko, mwil emõn ej kalikar wõn kij ñan jukjuk im bed eo. Ta eo jej aikwij kõmmane? Ñe jej bed ilo hotel ko, mõn mõñã (restaurant) ko, ak jikin business ko jet rebak ñan convention eo, ro jej jerbal ibbeir ren mõnõnõ kin kadkadin Christian ko ad, einwõt meanwõd, inemõn, jatõr, im ad kõmmanwa. (Gal. 5:22, 23; Pil. 4:5) Ien otemjej jej aikwij lolorjake ajiri ro nejid. (Ken. 29:15) Mwil emõn en bõktok nebar ñan Jehovah im kamõnõnõik buruen!—Ken. 27:11.
4. Ewi wãwen jemaroñ kautiej Jehovah ikijen nuknuk ko ad im baotokid?
4 Nuknuk ko Ad im Baotokid Ren Kwalok Ettã Buruõd: Kij kajjojo jemaroñ kwalok kadkad ko raibujuij ilo convention eo ilo ad bõprae ad kõnak style ko rebuñbuñ ilo ran kein, rejõkkar, rejjab kwalok ettã buru, ak rejabde. Einwõt ri karejar ro an Anij, men eo moktata jej itoklimo kake ej etan Jehovah, im jab kõnan ko ad make. Ro rej bõran family eo ewõr eddo eo ibbeir ñan air kõmman bwe baotokin family eo ej kwalok ettã buru im emõn air lemnak.—1 Tim. 2:9.
5. Etke ej aikwij emõn baotokid ilo ien eo jej kakije im ñe jej bed ilo convention eo jimor?
5 Eaorõk bareinwõt ñan kejbãrok baotokid ilo ien kakije ñe jej bed ilo hotel ko, mõn wia ko, im mõn mõñã ko. Ekkar bwe jen kõnak nuknuk in kwelok ko elañe jej mõñã ilo mõn mõñã ko elikin program eo. Ñe jej kajerbal convention badge card eo ad ej kabellok ien ko remõn ñan ad kwalok nan ilo jabdewõt ien emõntok.—2 Kor. 6:3, 4.
6. Ewi wãwen jemaroñ kõmman ijo kunad ñan kwon im lañliñ eo an convention eo?
6 Aiseia ear kanan: “Jeova e naj kõtar, bwe En maroñ in joij ñõn kom.” (Ais. 30:18a) Kamolol kin tiriamokake im joij eo an Jehovah en kar kamakit kij ñan nebar e ikijen mwilid im baotokid ñe jej kwelok ibben don ilo convention ko ad. Kimij kejatdikdik bwe “Lomor Eo Ej Ebak!” District Convention eo enaj kaibujuij Anij eo ad im jibañ kij ñan kõttar wõt e!
[Box eo ilo peij 5]
Nan in Kakememej ko kin Convention Eo
◼ Kwon jijet mokta jen an jino kajjojo ien kwelok bwe program eo en maroñ jino ilo juõn wãwen ekwon.
◼ Joij im bõktok kijõm mõñã in raelep bwe kwon jab aikwij etal jen jikin convention eo ñan am wia kijõm.
◼ Elap an lap wõnãn ñan kõmman juõn district convention. Jemaroñ kwalok ad kamolol ikijen jabawõt ko ad.
◼ Kwon jab kõtlok bwe cell phone im peijr ko ren kamad ro jet.