Kwelok ko Relap, Juõn Ien Kabuñ ilo Lõñliñ
1 Josep, Meri, ajiri ro nejiir, im ro jet rar keini air etal ñõn Jerusalem ñõn kejbãrok kwojkwoj ko ilo kajjojo yiõ. Ilo ien kein, irro im dri kabuñ ro mõtair rar dror inebata ko air kin mour im rar lemnok wõt kin men ko raurõklok, men ko an Anij. Kwojkwoj kein rar lelok ien ñõn air kalomõnlokjen im konono kin emõn eo an Jeova im lemnok kin Kien eo an. Kwelok ko relap im rej ber imar renaj letok ñõn kij ejja ien ko remõn ñõn ar kabuñ ilo lõñliñ ñõn Jeova.
2 Aikwij Kapojõk: An baamle eo an Jisõs etal jen Nazeret im bar jeblak ej melelen bwe rar aikwij etetal iomin 120 mail ko. Meñe jejaje kar jete uan ro jãtin Jisõs, jej kile bwe Josep im Meri rar aikwij karõk elõñ men ko kin ial eo air. Emwij ke am kapojõk ñõn am ber ilo kwelok eo elap im ej ber iman? Bwelen kwonaj aikwij kajitõk kin jet ran in kakije jen jikin jerbal eo am ak dri kaki eo an ajiri eo nejõm. Kwomaroñ ke bõk kwonam ñõn jibõñ juõn im ej utame ilo jet wãwen bwe en ber ilo kwelok eo?—1 Jon 3:17, 18.
3 Jen air baj jeje wõt katak ko ilo buk ko ar, unin dri korijer eo e tiljek im meletlet ej karõke ar kobatok iben dron ñõn roñjaki katak ko ilo kwelok ko relap ej bwe jen rejañ dron. (Hib. 10:24, 25) Inem, karõke bwe komin mõkõj ñõn kwelok eo ilo kajjojo ran ñõn ami maroñ in kõmao iben ro jet mokta jen an chairman eo kebellok ien eo kin kajõñjõñ ko, ñõn kalikar bwe ej ien ar jijõt. Ijellokin ar etal jen jikin kwelok eo ñõn kabukot kijed mõña in raelip, emõn bwe jen bõktok jidrik mõña im berwõt ñõn ar maroñ iion im bwebwenato iben ro jet. Rolul in Kristian jimjãn jimjãtin eo ar ej juõn men in letok jen Jeova im jekõnan kaurõke.—Maika 2:12.
4 Juõn Ien ñõn Katak: Jen ke ear drik, Jisõs ear kortokjen kwelok kein ñõn katak kin Jemen ilõñ. (Luk 2:41-49) Ta eo enaj jibõñ kij im baamle ko ar ñõn bõk tokjen jen katak ko renaj walok? Ilo ien eo rej kwalok katak ko, jijõt wõt im jab bwebwenato bajjek. Lale bwe cell phone eo am ak kein jerbal ko jet ren jab kabnõnõik ro jet. Reilok wõt ñõn dri konono eo, im jei melele ko relap. Baamle eo am ren jijõt iben dron ñõn lale elañe ajiri ro rej roñjake bareinwõt. Ilo joten eo, bõk ien ñõn ami eliji melele ko komar mõnõnõ kaki.
5 Jen Karbõp: Dri wia ro jen ailiñ ko ear biruru air kile baamle eo an Jisõs im dri kabuñ ro jet an dri Ju ro ilo air itoitak ñõn kwojkwoj ko air kinke rar lo to ko retoto itõrerein nuknuk ko air im ear or juõn tõrej blue itulõñin to ko rej etoto. (Bwin. 15:37-41) Meñe dri Kristian ro rejjab kõnõk nuknuk ko reinjuõn jen ro jet, ro jet rej kile kij kin ar kõnõk nuknuk ko rekkar im rekarbõb. Jej aikwij lale im kejbãrok baotokid ñe jej jibareklok im jeblak jen kwelok eo im kõnõk badge in kwelok eo. Ilo wãwen in jenaj jenolok jen ro rejjab ber ilo tõmak im emaroñ karel ro rej lale kij.
6 Aikwij Dri Jibõñ: Bwe en emõn kwelok eo, ej aikwij or elõñ dri jibõñ ro. Kwo mõnõnõ ke in jibõñ? (Sam. 110:3) Jerbal eo ilo kwelok ko relap ej mõtõn jerbal eo ar ekwojarjar im ej juõn men emõn kennan kake. Manager eo ilo juõn ian jikin kwelok ko relap ear lukkun bwilõñ kin wãwen an kar ro jeer im jãter karreo, ear jei: “Ikõnan kamolol kom kin juõn men elap an kabwilõñlõñ Iar loe. Eto aõ roñ bwe Dri Kennan ro an Jeova rebuñbuñ kin wãwen air karreoik jikin kwelok ko im air erreolok jen mokta. Kom im rolul eo ami komar kõmõn bwe jikin kwelok in en emõnlok ñõn armij ro ilo jikin in im dri jerbal ro ami remõntata ian aolep jar ko im kimar jela kajeir.”
7 Ien ko Rebellok ñõn Kennan: Elañe jej karbõp im kajerbal badge ko ilo kwelok eo, elõñ renaj kile kij, im men in emaroñ kebellok juõn ien bwe jen kemeleleik ir kin kwelok eo. Juõn eo emen yiõ ridtõn ear bõklok buk eo an ekãl ñõn juõn mõn mõña elikin kwelok eo im ear kwaloke ñõn juõn dri jerbal. Menin ear kebellok ial ñõn jinen im jemen bwe ren kir tok kõra eo ñõn kwelok eo elap.
8 Kwojkwoj ko ilo ien ko etto rar kalõñliñ dri Ju ro me rar kõnan kalaplok air jela kin Jeova im rar reimanlok kaki. (Dut. 16:15) Baamle eo an Jisõs rar mõnõnõ in karmijete kõnan ko air bwe ren ber im bõk tokjeir. Ejja kamolol in wõt eber iber kin kwelok ko ar relap im jej watõki einwõt juõn menin letok jen Jemer ilõñ eo ej yokwe. (Jem. 1:17) Kiõ ej ien kapojõk kin kwelok in elap eo ej walok ilo kajjojo yiõ ñõn ar kabuñ ñõn Jeova ilo lõñliñ!
[Kajjitõk ko]
1. Ewi wãwen kwojkwoj ko an Israel rar einwõt kwelok ko relap ilo ran kein ar?
2. Ta men ko jej aikwij kõmõni ñõn kapojõk ñõn kwelok eo elap im ej ber imar?
3. Ewi wãwen jemaroñ kamol bwe jej kaurõke rolul in Kristian jimjãn jimjãtin eo ar?
4. Ta eo enaj jibõñ kij ñõn lukkun bõk tokjen jen kwelok eo?
5. Ta eo jej aikwij kememeje kin ar karbõp?
6. Etke jen kar lemnok in bõk kwonad ilo kwelok eo elap?
7. Ta ien ko rebellok ñõn ar kennan ñe jej ber ilo jikin eo jej kwelok ie?
8. Ewi wãwen jemaroñ kajeoñwe kamolol eo an baamle eo an Jisõs kin men in letok ko an Jeova ilo jitõb?
[Box ilo peij 6]
Nan in Kakememej ko kin Kwelok eo Elap
◼ Mõña in Raelip: Joij im bõktok mõña in raelip ko ami ijellokin ami etal jen jikin kwelok eo ñõn kabukot kijimi. Kwomaroñ bõktok juõn cooler edrik im likiti iomin jea eo am. Jab kadreloñ cooler ko rekilep im nien mõña ko kõmõn jen kilaj iloan mõn kwelok eo.
◼ Jabawõt ko: Jemaroñ kwalok ar kamolol kin kwelok eo elap ilo ar lelok jabawõt ñõn jerbal eo ibelakin lõl ilo imõn kwelok eo ar ak ilo mweo eo jej kõmõn kwelok eo elap ie. Elañe kwoj kõmõn jabawõt kin check ko ilo kwelok eo elap kwon je ñõn “Jehovah’s Witnesses.”