Kwo Pojõk ke ñõn Juõn Kwojkwoj Elap ilo Jitõb?
1. Ta men ko jej aikwij kapoji ñõn kõmõn juõn kwojkwoj?
1 Ej juõn jerbal laplap ñõn kapoj juõn ien kwojkwoj elap. Jej aikwij kabukot kõbwebweien mõña ko, im iõki bwe ren enno, inem kwaloki. Rej aikwij karõke wãwen renaj lelok mõña ko. Bareinwõt, jej aikwij kapoje jikin eo jenaj kõmõne mõña in ie. Dri lotok ro ren bareinwõt kapojõk, elaptata elañe renaj etal ñõn jikin ko retolok ñõn ber ie. Meñe enaj lap jerbal ilo kwojkwoj in, eor tokjen kinke an ro rej jimjera im baamle ko iben dron im bõk mõña ko renno im reuõne ej juõn men in kamõnõnõ. Ejjabto Dri Kennan ro an Jeova ibelakin lõl renaj kuktok iben dron einwõt kumi ko relap im redrik ñõn juõn kwojkwoj elap ilo jitõb me jar kijoruretok kwelok eo elap ej 3 ran, etan “Komin Ekkõl Wõt!” Emwij air jino jerbal ko relap ilo air kapoji katak ko im men ko jet. Kij aolep jej ruwainene. Bwe jen ber ilo kwojkwoj in im lukkun bõk tokjen, kij bareinwõt, jej aikwij mõke kapojõk.—Ken. 21:5.
2. Ta eo jej aikwij kõmõne bwe jen bõk aolep ekan ko ilo kwojkwoj eo ar elap ilo jitõb?
2 Bõk Tokjen Elap: Ererelok ke karõk ko am bwe kwomaroñ ber ilo aolepen kwojkwoj in ilo jitõb? Elañe kwoj aikwij, kwon kennan iben eo ej bõk erron ijo kwoj jerbal ie kin am naj aikwij bõk ien kakije ilo aolep ran in kwelok ko, ekoba ran eo moktata. Ererelok ke am kõmõn karõk kin ial im jikin eo kwonaj ber ie? Elder ro ren lale bwe en emõn karõk ko air kin ro re ridto im remõjno im bar kin ro jet im rej aikwij jiboñ.—Jerm. 23:4; Gal. 6:10.
3. Etke jen jab etal ñõn juõn kwelok elap (international) elañe kar jab kir kij ñõne?
3 Ilo jet jikin ko enaj or kwelok ko relap me ej kobatok armij jen elõñ ailiñ ko (international conventions). Kememej bwe emwij kalikar congregation it ko im ailiñ it ko rej ruwainenetok ñõn kwelok kein. Ilo air kõmõne karõk kein, emwij an ra eo lukkun lemnok kin oran armij ro remaroñ karuwaineneiktok ir, ekkar ñõn joñõn jea ko im rum in hotel ko rebellok. Emaroñ le jen joñõn an obrõk jikin kwelok eo elañe dri kwalok ro rej etal ñõn juõn kwelok elap (international) me kar jab kir ir ñõne.
4. Ta nan in kakememej ko renaj jibõñ kij bwe jen pojõk ñõn program eo ilo ran ko kajuju?
4 Pojõk in tõbar jikin kwelok eo ilo auõ eo emõn bwe jen maroñ in lo jea ko ar moktalok jen an ijjino program eo. Mokta jen an naj ijjino, kajerbal jet minit ko ñõn etale program eo. Men in enaj jibõñ yuk ñõn kapoj buruõm kin katak ko renaj walok. (Ezra 7:10) Ñe chairman eo ejjino kebellok ien eo kin al im kajõñjõñ, mõnõnõ in roñjake inem pojõk in bõk kwonad ilo al im jar.
5. Ewi wãwen baamle ko ar remaroñ bõk tokjen elap jen program eo?
5 Elañe ro uan juõn baamle rej jijõt iben dron ilo ien kwelok eo, ridto ro remaroñ lale elañe ro nejiir rej lukkun roñjake katak ko ilo kwelok eo. (Dut. 31:12) Rejañ aolep bwe ren kebellok Baibel ko air ilo ien an dri konono eo riit. Am jeje jet nan in kakememej ko emaroñ jibõñ yuk bwe kwon lukkun roñjake. Tokelik, men ko kwar jei renaj jibõñ yuk bwe kwon ememej men ko relap ilo katak ko. Kate yuk bwe kwon jab mad ilo am konono bajjek iben ro jet ilo ien kwelok eo ak emmakit jen jea eo am ñe ejjab menin aikwij. Elañe eor am cell phone, kwon jab kõtlok bwe en kamad yuk ak ro jet ilo ien kwelok eo. Mwijin kwelok eo ilo ran ko kajuju, kwon bwebwenato iben ro jet kin katak ko remõn kwar bõki jen program eo.
6. Ta men ko jej aikwij lemnok kaki ilo ar kapoji nuknuk ko ar?
6 Nuknuk ko: Eor unin an kar Jeova kakien dri Israel ro ñõn kõmõn inõk ko kõmõn jen tõrej ilo tõreren nuknuk ko air, im bwe ren likit ion inõk in juõn tõrej blue. (Bwin. 15:37-41) Men in kar juõn kein kakememej ir bwe emwij kajenolok ir einwõt armij ro rej kabuñ ñõn Jeova. Ranin, ar karbõp im kõnõk nuknuk ko rejjab le jen joñõn ej kajenolok kij jen dri lõl in. Ej juõn menin kennan elap ñõn ro rej lo kij, bar ñe jej mõña ilo juõn jikin mõña elikin program eo. Inem, kwon lukkun lemnok kin kain nuknuk rot kwonaj kõnõke.
7. Ekijkan ar maroñ kwalok nan iben ro jet ñe jej ber ilo jikin eo jenaj kwelok ie?
7 Kennanek Ro Jet: Ar pojõk lok iman, ilo ien kwelok eo elap, emaroñ kebellok ien ar kennanek ro jet kin tõmak eo ar. Juõn jeer im jãter man kab lio iben rar etal ñõn juõn imõn mõña elikin kwelok eo im ear jitõñlok ñõn badge eo an im kajitõk iben dri lale tebel ko: “Elõñ ke armij kwoj lo air kõnõk badge kein?” Dri lale tebel ko ear ba aet im ear kõnan jela ta melelen. Rar jino bwebwenato iben dron, im jeer im jãter man ear kir dri lale tebel ko ñõn kwelok eo elap.
8. Ewi wãwen ar maroñ kwalok ar kamolol ñõn Eo ear Kir Kij, Jeova?
8 Meñe aolep katak ko, kajitõk ko iben armij, im wanjoñok ko renaj walok ikijen ro jeer im jãter, Dri Letok ekan kein ilo jitõb ilo kajuju yiõ ej Jeova, Jemeruij ilõñ. (Ais. 65:13, 14) Jej kwalok ar kamolol ñõn Eo Ear Kir Kij ilo ar keini kajuju ran in kwelok ko im kaurõki kajuju mõtõn ekan ko ilo jitõb me ej litok. Ererelok ke am kapojõk?