Lor Ri Christ ilo Am Kwalok Kautiej
1. Ewi wãwen unin tel in convention eo an yiõ in ej ekkejellok ñan kwalok kautiej?
1 Bible eo ej kalikar kin Iroij Bõtata eo, Jehovah, kar kanuknuk e kin nebar im utiej. (Sam. 104:1) Ekkã an Jesus kar konono im jerbal ilo juõn wãwen me ej kautiej Jemen im karõk ko an. (Jon 17:4) Kij kajjojo enaj wõr ien ko remõn ibbed ñan kajeoñe Jesus im kaibujuij Jehovah ilo ien kwelok ko rej itok etan, “Lor Ri Christ!” District Convention ko.
2. Ewi wãwen kebojak ñan bed ilo kajjojo kwelok ko ej kautiej Jehovah?
2 Kabuñ Eo Ej Tellokin Bõk Kautiej: Jemaroñ kautiej Jehovah ilo ad karõk ñan bed ilo ien kwojkwoj in mõñã eo ilo jitõb me emwij an keboje ñan kij. Kwonañin konono ke ibben boss eo am im karõklok iman ñan bed ilo program ko ilo jibboñ im raelep ilo kajjojo ran in kwelok ko ilo convention eo? Kwonañin karõk ke ñan am mõkajtok ñan bukõt jikin jijet eo am im bõk kunam ilo al im jar? Kwonañin ke karõklok iman ñan keboje mõñã ko kijõm ñan mõñã in raelep ibben ro jeim im jatim ilo jikin kwelok eo elap? Ilo jinoin kajjojo kwelok, ñe chairman eo ej kir kij ñan jijet ilo jea ko ad mokta jen an jino kajañjañ eo, jej aikwij mõkaj im kabõjrak ad bwebwenato ibben armij ro im jijet bwe en jino program eo.
3. Ewi wãwen roñjake im liñõri program eo ej kautiej ad kabuñ?
3 Roñjake im liñõri katak ko ilo program eo ej kautiej Jemeduij ilañ. Elikin an lale juõn district convention me kar walok ilo bukwon eo, juõn ri jeje ear je bwe armij ro renaj lo im bwilõñ “kin mwil eo emõn mwilin ro rej bed, ke rar roñjake ta eo kar konono kake ilo kautiej im ejelok keroro.” Ear bareinwõt konono “kin an lõñ ajiri ro. . . , emõn mwiliir ak bõlen boub in bukõt eon ko ilo Bible eo air.” Ilo ien eo ej jino program eo, ejjab ien ñan bwebwenato bajjek, text message ilo cellphone, mõñã, ak mõkadkad ilo jikin etetal ko. Jodikdik ro rej aikwij jijet ibben jemeir im jineir bwe ren maroñ jibañ ir ñan bok tokjen jen program eo. (Dut. 31:12; Ken. 29:15) Ñe jej kate wõt im lolorjake wãwen kein jej kwalok ad kautiej ro jet im kamolol kin mõñã ko lor jitõb raorõk kar litoki.
4. Etke jej aikwij kautiej wãwen baotokid ñe jej bed ilo convention eo?
4 Kautiej wãwen Baotokid: Elõñ rar kwalok kamolol kin nan in kakememej ko ilo kar district convention talk eo ilo yiõ eo lok “Kwalok Mwil eo Emõn Mwilin Christian Ien Otemjej,” me ej kamelele bwe ri karejar ro an Anij rej aikwij kate wõt ñan kwalok mwil emõn einwõt juõn Christian ilo balliir im wãwen air litlit. Yiõ in jej aikwij bar kalmenlokjen kake aikwij in im jerbale. Baotokid ej kalikar eñjake eo ad kin Jehovah im kin jerammõn eo ñan jutak einwõt Ri Kennan ro an. Jej aikwij kõnak nuknuk ko einwõt “ro rej kwalok air tõmak.”—1 Tim. 2:9, 10.
5. Ewi wãwen jemaroñ debij ad kautiej wãwen baotokid ilo ien ikkure ilo jikin kwelok eo convention ej bed ie?
5 Jej kwalok kautiej kin baotokid ñe jej bed ilo kwelok in program eo wõt ke? Kememej bwe elõñ renaj lo kij ilo ad kõnak badge ko ad ilo convention eo. Baotokid ej aikwij oktak jen armij ro an lal in. Kin men in, meñe ilo ien ikkure im kakije jej aikwij kõnak nuknuk ko rekkar ñan juõn Ri Christian ñe jej bed ilo bukwon eo me Convention eo ej walok ie im jab kõnak tanim ko, kadu ne ko, im jiñlij ko. Ej juõn wãwen emõn ñan kwalok nan ñan armij ro ilo bukwon eo! Jehovah enaj lañliñ ñe baotokid ej ekkar ñan juõn ri kwalok.
6. Ta tokjen ko remõn ñan kwalok kautiej einwõt juõn ri Christian?
6 Tokjen ko Remõn: Ñe jej kautiej manit in Christian ilo convention ko ad ej letok ien ko remõn ñan kwalok nan im likit juõn lemnak emõn ibben armij ro rej lo kij. Ilo jemlokin juõn convention, juõn ri utiej ear ba: “Ejeja ad lo an armij kwalok mwil emõn einwõt kom. Komij emmakit ilo wãwen eo Anij ej kõtmene kake kij.” Kwalok kautiej ej kalikar ad kaorõk im yokwe ro jet im ej kaibujuij Jehovah. (1 Pit. 2:12) Ej kwalok ad mijak Anij im ad kamolol kin jerammõn eo ñan katak jen Jemed. (Hib. 12:28) Jen kate kij ñan kwalok kautiej ilo ad reimanlok ñan District Convention eo ilo yiõ in etan “Lor Ri Christ!”
[Box ilo peij 5]
Nan in Kakememej ko kin Convention Eo
◼ Kejbãrok Jea ko: Kwomaroñ kejbãrok jea ko ñan ro wõt im rej uwe ibbam ak rej jokwe ilo mweo imõm.
◼ Mõñã in Raelep: Joij im bõktok kijõm mõñã in raelep ñan jikin convention eo jen am illok im wia kijõm ilo ien kakije ilo raelep.
◼ Jabawõt ko: Elap expense ko rej walok ñe rej kõmman karõk kin juõn district convention. Jemaroñ kwalok ad kamolol ilo ad lelok jabawõt ko.