Juon Iien El̦ap an Kõketak im Kakajoor Kõj
1. Ta eo enaaj wal̦o̦k ñan kõj ñe jenaaj pãd ilo kweilo̦k eo el̦ap ej pedotok?
1 Armej ro ilo lal̦ in an Setan rem̦õjn̦o̦ kõn aer kwõle kõn m̦ool eo, bõtab Jeova ej kakajoor wõt armej ro doon. (Ais. 58:11) Juon wãween Jeova ej kakajoor kõj ej ikijjeen kweilo̦k ko rel̦ap. Ej pojak in wal̦o̦k juon kweilo̦k el̦ap ak district convention eo. Ta eo jemaroñ kõm̦m̦ane bwe kweilo̦k in el̦ap en kakajoor kõj im bwe jen maroñ kakajoor ro jet?—JK. 21:5.
2. Ta ko jej aikuj kõm̦m̦ani kiiõ bwe jen pojak ñan kweilo̦k eo el̦ap?
2 Eaorõk bwe kwõn kõnono ippãn bo̦o̦j eo am̦ ñan kakkije jãn jikin jerbal bwe kwõn jab jako jãn aolep katak ko ilo kweilo̦k eo el̦ap. El̦aññe kwõjañin, jouj im jino kõm̦m̦ane men in kiiõ. Kwõj jel̦ã ke jete awa kwõj aikuj ilo̦k jãn m̦weo im̦õm bwe kwõn m̦õkaj in tõpare jikin eo kweilo̦k eo el̦ap ej pãd ie? Ilo wãween in kwõnaaj maroñ kappok jikin jijet m̦okta jãn an jinoe bũrookraam̦ eo. Jejjab kõn̦aan jako jãn jabdewõt iaan katak ko em̦õj an Jeova kõbooji ñan kõj im rej ãinwõt m̦õñã ko rej kakajoor kõj! (Ais. 65:13, 14) Kwõnañin ke kõm̦m̦an karõk ak kakon̦ jããn bwe en wõr ial̦am̦ ñan kweilo̦k eo el̦ap?
3. Ta ko jemaroñ kõm̦m̦ani im renaaj jipañ kõj im baam̦le ko ad bwe jen lukkuun bõk tokjãn kweilo̦k eo el̦ap?
3 Ta eo enaaj jipañ eok bwe kwõn lukkuun roñjake katak ko im jab l̦õmn̦ak kõn men ko jet ilo iien kweilo̦k eo? El̦aññe kwõmaroñ, en m̦õkaj am̦ kiki boñõn eo m̦okta jãn raan in kweilo̦k eo. Reim̦aanl̦o̦k im lale ri kõnono eo. Ãlõkl̦o̦k Baibõl̦ eo am̦ ñan aolep eoon ko ri kõnono eo ej riiti. Kapoj juon am̦ bok im pinjel̦ ñan je mel̦el̦e ko rem̦m̦an. Em̦m̦an ñe baam̦le ko ren jijet iturin doon bwe rũtto ro ren lale ro nejier im jipañ er ñan lukkuun roñjake katak ko. (JK. 29:15) Ro uwaan baam̦le eo am̦ remaroñ kõm̦m̦ao ippãn doon kõn katak ko ãlikin ami ro̦o̦l ñan m̦weo. Baam̦le eo am̦ remaroñ kajoor wõt meñe ejem̦l̦o̦k kweilo̦k in el̦ap. Ewi wãween? Eokwe, ilo iien eo baam̦le eo am̦ ej katak ippãn doon, kom̦ maroñ bwebwenato kõn katak ko kom̦ij kõn̦aan jerbali.
4. Ewi wãween jemaroñ jipañ ro jet ilo congregation eo ad bwe kweilo̦k in el̦ap en kakajoor er?
4 Jipañ im Kakajoor Ro Jet: Jekõn̦aan bwe kweilo̦k in el̦ap en kakajoor ro jet bareinwõt. Ewõr ke ro rerũtto ak ro jet ilo congregation eo am̦ me renaaj aikuj ial̦ ñan kweilo̦k eo? Kwõmaroñ ke jipañ er? (1 Jon 3:17, 18) Elder ro ilo kajjojo congregation rej aikuj kõm̦m̦an karõk ñan jipañ rein ilo congregation ko aer.
5. Ewi wãween jenaaj leto letak peba in kũr eo? (Lale bo̦o̦k eo itulõñ.)
5 Jenaaj leto letak peba in kũr eo kõn kweilo̦k in el̦ap jilu wiik ko m̦okta jãn kweilo̦k in ãinwõt jaar kõm̦m̦ane ilo iiõ ko remootl̦o̦k. Mejãnkajjik eo an kajjojo congregation ko ej ñan kamaat aolep peba in kũr ko aer im tõpar aolep armej ro ilo bukwõn ko aer. Bõtab el̦aññe ewõr bween peba in kũr ko an baam̦le eo am̦ kwõj aikuj bõktok peba kein ippam̦ ñan kweilo̦k in el̦ap. Jenaaj kortokjãn peba kein ñe jej kwal̦o̦k naan ñan armej ro jabdewõt iien im jikin jej iion er ie. Naaj kõmel̦el̦eik kilen lel̦o̦k peba in kũr in ilo juon katak ilo kweilo̦k eo el̦ap. Kwõmaroñ lel̦o̦k bween peba in kũr ko an baam̦le eo am̦ ñan eo ej lale kejam ilo jibboñ in raan eo jinointata kwõj del̦o̦ñl̦o̦k iloan jikin kweilo̦k eo. Bõtab jouj im bõk juon am̦ peba in kũr bwe kwõn lale ñe eo jeid im jatid ej kõm̦m̦ane katak eo ãliktata ilo Jabõt.
6. Ilo wãween et jej kwal̦o̦k bwe jejel̦ã m̦anit ilo iien kweilo̦k eo el̦ap?
6 Jel̦ã M̦anit im Kakajoor Ro Jet: Ñe jej pãd iturin armej ro rej “yokwe er make” im jab l̦õmn̦ak kõn ro jet im rejaje m̦anit, jej inepata. Bõtab, jej m̦õn̦õn̦õ ñe jej pãd iturin Kũrjin ro m̦õttad im rej kate er ñan kwal̦o̦k m̦wil ko rem̦m̦an im rejel̦ã m̦anit! (2 Ti. 3:2) Jemaroñ kwal̦o̦k m̦wil ko rem̦m̦an im bwe jejel̦ã m̦anit ilo elõñ wãween ko. Ñan waanjoñak, jen jab rum̦wij ñan kweilo̦k. Bareinwõt jen jab jijet ilo jea ko lik. Ak jen kõtl̦o̦k bwe baam̦le ko me ewõr ro nejier redik ren maroñ jijet ilo jea ko lik. Jen pokake ñe chairman eo ej ba bwe jen jijet im roñjake kõjañjañ ko m̦okta jãn an jinoe bũrookraam̦ eo. Jej kwal̦o̦k bwe jejel̦ã m̦anit ñe jej kune cellphone ko nejid bwe ainikien en jab kabõn̦õn̦õik ro jet. Im jen jab keroro ak text e ro jet im m̦õñã ak etetal bajjek ilo tõre eo me jeid im jatid rej kõm̦m̦an katak ko.
7. Ñe jej kõm̦m̦ao ippãn ro jeid im jatid, ta ko jemaroñ kõm̦m̦ani bwe jen kakajoor er im bwe ren kakajoor kõj?
7 Kõm̦m̦ao im Kakajoor Doon: Kweilo̦k ko rel̦ap rej letok juon iien ñan ad kõm̦m̦ao im kakajoor Kũrjin ro m̦õttad. (Sam 133:1-3) Etke kwõjjab etal im yokyokwe ro jeid im jatid jãn congregation ko jet im kal̦apl̦o̦k am̦ jel̦ã kajjier? (2 Ko. 6:13) Kwõmaroñ kõm̦m̦an juon mejãnkajjik ñan kepaake juon jeid ak jatid ak juon baam̦le me kwõjaje kajjier im kõm̦m̦ao ippãer. Kwõmaroñ kõm̦m̦ane men in ilo iien m̦õñã in raelep. Innem kwõn bõktok jidik m̦õñã in raelep ijello̦kun am̦ etal ñan m̦weo im̦õm ak wia kijõm̦ ak m̦õñã ilo juon restaurant. Ilo wãween in kwõmaroñ kõm̦m̦ao ippãn ro jet. Bõlen kwõmaroñ jujen jel̦ã kajjien juon im jino m̦õttaiki.
8. Etke jej aikuj jipañ jerbal ilo kweilo̦k eo el̦ap, im ewi wãween jemaroñ kõm̦m̦ane men in?
8 El̦ap ad m̦õn̦õn̦õ ñe jej jerbal ippãn ro jeid im jatid! Kwõmaroñ ke kepaake eo ej lolorjake jerbal ko im ba ñan e bwe kwõj m̦õn̦õn̦õ in jipañ? Ak kwõmaroñ ke jipañ ro im rej karreo? (Sam 110:3) El̦aññe ejjel̦o̦k men en kwõj kõm̦m̦ane im kokõn̦aan jipañ, jouj im kepaake eo im ej lolorjake jerbal ko ilo kweilo̦k eo el̦ap. Keememej bwe ippãn doon ej kwal̦o̦k juon kajoor.
9. Etke jej aikuj kõjparok m̦wilid im nuknuk ko jej kõn̦aki im baotokid ilo iien kweilo̦k eo el̦ap?
9 M̦wilid Ej Kam̦õn̦õn̦õik Armej ro Likin: Jejjab baj kakõm̦anm̦an wõt m̦wilid ilo kweilo̦k eo el̦ap. Ñe jej diwõjl̦o̦k jãn jikin kweilo̦k eo, armej ro likin rej aikuj kile bwe jej oktak jãn ro im rejjab Ri Kõnnaan ro an Jeova. (1 Pi. 2:12, UBS) Nuknuk ko jej kõn̦aki im baotokid rej aikuj kam̦õn̦õn̦õik Jeova ilo jikin kweilo̦k eo el̦ap im jabdewõt jikin jej etal ie. (1 Ti. 2:9, 10) Ñe jej etal im m̦õñã ilo restaurant ko jej aikuj lel̦o̦k jidik jããn ñan eo im ej bõktok kijed ñe ej juon m̦anit ilo jikin eo. El̦aññe jej kõn̦ak wõt badge eo enaaj kalikkar bwe kõj Ri Kõnnaan ro an Jeova. Men in emaroñ kepel̦l̦o̦k juon iien ñan ad kõnono kõn kweilo̦k eo el̦ap im kwal̦o̦k naan ippãn armej ro.
10. Kwal̦o̦k men ko armej ro rar ba kõn an em̦m̦an m̦wilin Ri Kõnnaan ro an Jeova.
10 Armej ro rej m̦õn̦õn̦õ kõn an em̦m̦an m̦wilid. Etke jemaroñ ba men in? Ekkar ñan juon nuujpeba, juon mãnija an juon jikin Ri Kõnnaan ro an Jeova rekõn kweilo̦k el̦ap ie, ear ba: “Armej rein relukkuun jel̦ã m̦anit im rejouj. Kõm m̦õn̦õn̦õ bwe rej kajerbale m̦wiin kajjojo iiõ.” Ilo iiõ eo l̦o̦k ilo juon hotel me elõñ Ri Kõnnaan ro an Jeova rar pãd ie, ear jako wallet eo an juon armej me ejjab juon iaan Ri Kõnnaan ro an Jeova. Kar lel̦o̦k wallet eo kap men ko iloan ñan mãnija eo an hotel eo. Mãnija in ear ba ke ej lel̦o̦k wallet eo ñan armej eo an: “Kwõlukkuun jeraam̦m̦an bwe ewõr juon kweilo̦k el̦ap an Ri Kõnnaan ro an Jeova ilo jikin eo epaak ñan hotel in im elõñ iaaer rej jokwe ijin. El̦aññe ejjab, bõlen kwoban kar lo wallet in am̦.”
11. Ke ej epaaktok kweilo̦k eo el̦ap, ta ko jen peek ilo bũruod ñan kõm̦m̦ani im etke?
11 Ejjabto jãn kiiõ kweilo̦k in el̦ap enaaj wal̦o̦k. Rar jol̦o̦k el̦ap iien ñan kõbooj elõñ katak ko ñan kakajoor kõj, im bwe en em̦m̦an jikin eo me jej kweilo̦k ie. Kwõn peek ilo bũruom̦ bwe kwõn jab jako jãn aolep katak ko ilo kweilo̦k eo el̦ap. Jeova kap doulul eo an rar keboji elõñ men ko rem̦m̦an ñan kõj, jepojak ke in bõki? Jen kakajoor ro jet kõn ad jel̦ã m̦anit, kõm̦m̦ao ippãn doon, im kõn m̦wil ko ad rem̦m̦an. El̦aññe jej kõm̦m̦ani men kein jenaaj ãinwõt juon jeid im jatid kõrã me ear ba, “Ear juon iien em̦m̦antata im iar m̦õn̦õn̦õ!”
[Naan ko ilo peij 4]
Jenaaj leto letak peba in kũr eo kõn kweilo̦k in el̦ap jilu wiik ko m̦okta jãn kweilo̦k in, ãinwõt jaar kõm̦m̦ane ilo iiõ ko remootl̦o̦k
[Naan ko ilo peij 6]
Nuknuk ko jej kõn̦aki kap baotokid rej aikuj kam̦õn̦õn̦õik Jeova ilo jikin kweilo̦k eo, restaurant ko im jabdewõt jikin jej pãd ie
[Naan ko ilo peij 7]
Jen peek ilo bũruod ñan kakajoor ro jet ilo ad jab jaje m̦anit ak jen kõm̦m̦ao ippãn doon im kwal̦o̦k m̦wil ko rem̦m̦an
[Bo̦o̦k eo ilo peij 4-7]
Naan in Kakeememej ko kõn Kweilo̦k eo El̦ap ilo 2011
◼ Awa in Kweilo̦k: Bũrookraam̦ eo enaaj jino ilo 9:20 jibboñ ilo aolep raan in kweilo̦k ko. Ñe chairman eo ej kõjjel̦ã bwe enaaj jino al in kõjañjañ eo, jouj im etal ñan jea ko ami im jijet. Ilo wãween in jej kwal̦o̦k ad kautiej im enaaj em̦m̦an an jino bũrookraam̦ eo ad.
◼ Jikin Jijet: Ñe jej kappok jikin ad jijet, jen kappok wõt jea ko ñan baam̦le eo ad im rej kiki m̦weo im̦õd ak ro rar itok ippãd tok ak ro im jej katak Baibõl̦ eo ippãer.—1 Ko. 13:5, UBS.
◼ Cellphone: Ñe ej jino bũrookraam̦ eo, jej rõjañ aolep bwe ren kune cellphone ko aer, ñe ejjab kadikl̦o̦k ainikier bwe ren jab ko̦kkure an ro jet lukkuun roñjake katak ko ilo kweilo̦k eo ad.
◼ M̦õñã in Raelep: Jouj im bõktok m̦õñã in raelep ko kijõmi bwe kom̦win jab aikuj ro̦o̦l ñan m̦weo ak jikin ko jet im m̦õñã in raelep ie. Em̦m̦an ñe kom̦ij bõktok nien m̦õñã ko redik bwe kom̦win maroñ likũti ium̦win jea ko. Jouj im jab bõktok cooler ko rekilep im nien m̦õñã ko kõm̦m̦an jãn kilaj ñan loan im̦õn kweilo̦k eo.
◼ Jabawõt: Jemaroñ kwal̦o̦k ad kam̦m̦oolol kõn jerbal ko kar kõm̦m̦ani ñan kepoj kweilo̦k eo el̦ap, ilo ad lel̦o̦k jabawõt ko ilo jikin ko jej kweilo̦k el̦ap ie. Jabawõt ko renaaj jipañ im rejetak jerbal in kwal̦o̦k naan eo ipel̦aakin lal̦ in. El̦aññe jej je check ko im jabawõt kaki, je ñan “Christian Congregation of Jehovah’s Witnesses.”
◼ Jorrããn im Nañinmej ilo Jidimkij: El̦aññe juon euwe an nañinmej ilo jikin kweilo̦k eo, jouj im kepaak ro rej lale kõjãm bwe ren kwõjel̦ãik kumi eo ej lale ri nañinmej ro. Rein remaroñ lale ta nañinmej eo an im jipañ e. El̦aññe rej lo bwe ekauwõtata nañinmej eo an, renaaj call 911. Men in enaaj bõbrae an elõñ armej ro call e l̦o̦k waan aujpitõl̦.
◼ Uno: El̦aññe ewõr ami nañinmej im kom̦ij idaak uno, jouj im bõktok uno ko limõmi kõnke enaaj ejjel̦o̦k kain uno rot in ilo jikin kweilo̦k eo el̦ap.
◼ Peba eo kõn Ro Rej Itoklimo: Ewõr juon peba n̦aetan Please Follow Up (S-43) im kom̦ maroñ je kõn ro kom̦ar kwal̦o̦k naan ippãer jabdewõt jikin ilo iien kweilo̦k el̦ap eo im rej itoklimo in katak. Jej aikuj bõktok juon ak ruo peba rot in ñan iien kweilo̦k eo el̦ap. El̦aññe eddedel̦o̦k ami kanne peba in, kom̦ maroñ lel̦o̦k ñan brother ro rej lale jikin bok ko. Ñe jab, kom̦ maroñ kakon̦e im ñe em̦õj kweilo̦k el̦ap, kom̦ maroñ lel̦o̦k ñan secretary eo an congregation eo ami.—Lale Ad Jerbal Ñan Aelõñ Eo an Nobõmba 2009, peij 4.
◼ Restaurant Ko: Kom̦win bõktok nõbar ñan ãt eo etan Anij kõn kõm̦m̦an ko ami. Ñe kom̦ij kõl̦l̦ãik m̦õñã ko kijemi, kom̦win likũt jidik jããn ak tip ko ilo restaurant eo ekkar ñan joñan bõjjããn eo an jikin eo.
◼ Jipañ ilo Jerbal Ko: Enaaj l̦apl̦o̦k an em̦m̦an kweilo̦k eo el̦ap el̦aññe jej m̦õn̦õn̦õ in bok kun̦aad im jipañ ilo jabdewõt kain jerbal. (Jrb. 20:35) Jabdewõt ej m̦õn̦õn̦õ in jipañ en etal ñan ippãn Kumi eo ej lolorjake jerbal ko ilo kweilo̦k el̦ap eo. Ajri ro im 16 aer iiõ im lal̦ l̦o̦k remaroñ bareinwõt jipañ. Bõtab, rein ren jerbal ippãn jineer im jemãer ak rũtto ro rej lale er.
[Bo̦o̦k eo ilo peij 5]
Ta eo Jen Ba Ñe Jej Leto Letak Peba in Kũr Eo?
Bwe jen maroñ tõpar aolep armej ilo bukwõn eo jej kwal̦o̦k naan ie, en jab l̦ap ad kõnnaan. Jemaroñ ba: “Yokwe. Kõmij leto letak peba in kũr in ñan aolep armej ro. Eñin ej peba in kũr eo am̦. Kõmel̦el̦e ko jet rej pãd ilo peba in.” Ñe jej lel̦o̦k peba in kũr eo ñan ri m̦weo jen kwal̦o̦k peij eo itum̦aan kõnke pija eo ie enaaj kaitoklimoik armej ro. Jen kõnono ilo juon wãween me ej kaitoktoklimo. Ñe jej leto letak peba in kũr eo ilo Jãdede im Jabõt jen bareinwõt kwal̦o̦k kõn Imõniaroñroñ eo im lel̦o̦k ñan armej eo.