En Em̦m̦an M̦wilid Ibwiljin Armej Ro

1. Etke eaorõk bwe en em̦m̦an m̦wilid ilo naaj kweilo̦k eo el̦ap?

¹ Ilo bukwõn ko me enaaj wal̦o̦k kweilo̦k ko rel̦l̦ap ie, ekkã an armej ro kalimjek kõj im jel̦ã bwe kõj Ri Kõnnaan ro an Jeova. Eñin unin el̦ap an aorõk bwe kõm̦m̦an ko ad ren bõktok nõbar ñan Anij eo me jej kabuñ ñane. (Lv. 20:26) M̦wilid kab nuknuk ko jej kõn̦aki rej aikuj kaalikkar ñan aolep bwe jej rũkal̦oor ro rem̦ool an Kũraij. Ñe em̦m̦an m̦wilid, men in ej bõktok nõbar ñan Jemãdwõj ilañ. Ke ej epaaktok kweilo̦k eo el̦ap (district ak international convention), ta ko jemaroñ kõm̦m̦ani bwe ‘m̦wilid en em̦m̦an ibwiljin’ armej ro?—1 Pi. 2:12, UBS.

2. Ilo raanin kweilo̦k el̦ap ko, ta ko jemaroñ kõm̦m̦ani ñan kwal̦o̦k m̦wilin Kũrjin?

² Kwal̦o̦k M̦wilin Kũrjin: Ñe jej kwal̦o̦k yokwe im em̦m̦an wãween ad kõm̦m̦an ñan ro jet, men in ej kaalikkar ad oktak jãn armej ro jet. (Kol. 3:10, UBS; 4:5, UBS; 2 Ti. 3:1-5) Kõn men in, jej aikuj kwal̦o̦k jouj im meanwõd ñan ro me rej jerbal ilo oteel̦ ko kab restaurant ko jekdo̦o̦n ñe rej likjab ilo aer jerbal. Ilo jikin ko me rijerbal ro rej kõtmãne an armej ro lel̦o̦k jidik jããn in kam̦m̦oolol kõn jerbal ko aer, jej aikuj lel̦o̦k jããn in kam̦m̦oolol ñan er. Ñe jej kõm̦m̦ane men in, jej kaalikkar bwe jejel̦ã m̦anit.

3. Ta eo ro jemãn im jinen ajri ro rej aikuj kõm̦m̦ane im etke?

³ Rũtto ro rej aikuj lukkuun lale ajri ro nejier ilo jikin kweilo̦k eo el̦ap, ilo restaurant ko rej m̦õñã ie, kab ilo oteel̦ ko rej kiki ie. (JK. 29:15, UBS) Ilo juon oteel̦, mãnija in restaurant eo ie ear kepaake ruo rippãlele im ba: “Kõmij lukkuun m̦õn̦õn̦õ ñe Ri Kõnnaan ro an Jeova rej itok im kiki m̦wiin. Kom̦ aolep ekoba ajri ro nejimi, kom̦ lukkuun jel̦ã m̦anit im jouj. Aolep rijerbal ro ilo m̦wiin rej nõbar kom̦. Im kõmij bũrom̦õj bwe kom̦ij jab kiki m̦wiin aolep Jãdede im Jabõt.”

4. Ñe jenaaj pãd ilo bukwõn eo me jej kweilo̦k el̦ap ie, kain rot nuknuk ko jej aikuj kõn̦aki?

⁴ Nuknuk ko Rekkar: Ilo raan kein, elõñ armej ro me rejjab kabuñ ñan Jeova rej kõn̦ak nuknuk ko me rekabwilo̦klo̦k mãj. Jen kõjparok bwe jen jab ãinwõt er. Jej aikuj kõn̦ak nuknuk ko rekkar im karbõb ñan kweilo̦k eo el̦ap. (1 Ti. 2:9) Ak ta kõn iien ko me jej bõk ki in ruum̦ ilo oteel̦ eo, im iien eo jej karo̦o̦l ki eo? Im ta kõn iien ko jet me jej jam̦bo im pãd ilo̦bwilej? Eokwe, jej aikuj bar kõjparok bwe en jab jabdetakwõt ad nuknuk. El̦aññe jej kõjparok wãween ad tõreejab, jeban jook in kõn̦ak badge eo ad im kwal̦o̦k naan ilo iien ko me repel̦l̦o̦k. Ewõr tokjãn ad kõn̦ak nuknuk ko rekkar im kwal̦o̦k m̦wil ko rem̦m̦an ilo naaj kweilo̦k el̦ap ko rel̦l̦ap renaaj wal̦o̦k. Ilo ad kõm̦m̦ani men kein, jenaaj kareel ro em̦ool bũrueer bwe ren kobatok ippãd im roñjake katak ko jãn Baibõl̦. Bareinwõt, Jeova enaaj lukkuun m̦õn̦õn̦õ ippãd.—Zp. 3:17, UBS.

Naan in Kakeememej ko kõn Kweilo̦k eo El̦ap ilo 2014

◼ Awa in Kweilo̦k: Jikin eo me jenaaj kweilo̦k el̦ap ie enaaj pel̦l̦o̦k ilo 8:00 awa jibboñ. Bũrookraam̦ eo enaaj jino ilo 9:20 jibboñ ilo aolep raan in kweilo̦k ko. Ñe chairman eo ej kõjjel̦ã bwe enaaj jino al in kõjañjañ eo, kõj aolep jej aikuj etal ñan jea ko ad im jijet. Ilo wãween in jej kwal̦o̦k ad kautiej im enaaj em̦m̦an an jino bũrookraam̦ eo ad. Ilo raan in Jãdede, naaj kõjem̦l̦o̦k kweilo̦k eo ad kõn al im jar ilo 4:55 jota im ilo Jabõt, enaaj jem̦l̦o̦k ilo 3:50 ãlikin raelep.

◼ International Convention: Enaaj wõr international convention ilo jet jikin ko. Keememej bwe em̦õj an ra ko karõk armej ro jãn aelõñ ko jet im eklejia ta ko me renaaj pãd ilo kweilo̦k kein. Em̦õj aer bwine jea ko, im kõm̦m̦an karõk kõn jikin baak ko im ruum̦ in oteel̦ ko ñan ro me em̦õj kũr er. Kõn men in, el̦aññe jej etal ñan kweilo̦k el̦ap kein ak kar jab kũr kõj, men in enaaj kõm̦m̦an bwe en lukkuun l̦e jãn joñan an obrak armej. El̦aññe ejejjet bwe kwõn pãd ilo jikin eo me ewõr international convention ie, ak kar jab kũr kwe, em̦m̦an ñe kwõjjab pepe in etal ñan kweilo̦k el̦ap in. Kwõn etal wõt ñan ijo kar kũr kwe ñane.

◼ Jikin an Wa Baak: Ilo jet iaan jikin ko me enaaj wõr kweilo̦k el̦ap ie, em̦õj letok ñan kõj maroñ ñan baak ilo jikin baak ko. Ilo jikin kein, ejjel̦o̦k on̦ãn ñan baak. Eñin unin em̦m̦an ñe jej m̦õkajl̦o̦k m̦okta jãn an obrak jikin baak kein. Ekkã an jabwe jikin ñan baaki wa ko. Kõn men in, el̦aññe ewõr waad wa, jemaroñ jipañ doon im ektak ro jet ilo wa ko waad. Ilo jet aelõñ, ewõr jikin baak ko me em̦õj kõjenolo̦ki ñan ro me ewõr aer nañinmej ak utam̦we ilo ãnbwin im ewõr aer license plate ak juon jain me ej kamãlim er ñan baak ilo jikin kein.

◼ Jikin Jijet: Ñe ej jino pel̦l̦o̦k jikin kweilo̦k eo, jouj im jab kajjioñ jiãiik ro jet ilo am̦ ekkotaaki jikin jijet ko me rem̦m̦an ippam̦. Jej aikuj kwal̦o̦k ad kaarmejjete kõj make im kõtl̦o̦k bwe ro jet ren jijet ilo jikin ko rem̦m̦an ippãer. Ilo wãween in, armej ro jet me renaaj kobatok renaaj kile bwe kõj m̦oolin Kũrjin. Im men in enaaj kõm̦akũt er ñan nõbar Anij. (Jon 13:34, 35; 1 Ko. 13:4, 5; 1 Pi. 2:12, UBS) Ñe jej kappok jikin ad jijet, jen kappok wõt jea ñan baam̦le eo ad me rej kiki m̦weo im̦õd ak ñan ro rar itok ippãd tok ak ro jej katak Baibõl̦ ippãer. Enaaj wõr jikin jijet ko me naaj kõjenolo̦ki ñan lel̦l̦ap im l̦al̦l̦ap ro im ro me ewõr aer nañinmej. Kõnke eban lukkuun lõñ jea ñan rein, juon ak ruo iaan armej ro me rej lale im jipañ er renaaj jijet ippãer ilo jea kein me kar kõjenolo̦ki ñan er.

◼ M̦õñã in Raelep: Jouj im bõktok m̦õñã in raelep ko kijõmi bwe kom̦win jab aikuj ro̦o̦l ñan m̦weo ak jikin ko jet im m̦õñã in raelep ie. Em̦m̦an ñe kom̦ij bõktok nien m̦õñã ko reddik bwe kom̦win maroñ likũti ium̦win jea ko. Jouj im jab bõktok cooler ko rekkillep im nien m̦õñã ko kõm̦m̦an jãn kilaaj ñan lowaan im̦õn kweilo̦k eo.

◼ Jabawõt: Jemaroñ kwal̦o̦k ad kam̦m̦oolol kõn jerbal ko kar kõm̦m̦ani ñan kõpooj kweilo̦k eo el̦ap ilo ad lel̦o̦k jabawõt ko ilo jikin ko jej kweilo̦k el̦ap ie. Jabawõt ko renaaj jipañ im rejetak jerbal in kwal̦o̦k naan eo ipel̦aakin lal̦ in. El̦aññe jej jabawõt kõn jããk, je ilo jããk eo “Watch Tower.” Bareinwõt, ilo jet jikin ko, ro jeid im jatid remaroñ jabawõt kõn debit ak credit card ko aer.

◼ Uno: El̦aññe ewõr am̦ nañinmej im kwõj idaak uno, jouj im bõktok uno ko lim̦õm̦ kõnke enaaj ejjel̦o̦k kain uno rot in ilo jikin kweilo̦k eo el̦ap. Ñan ro me ewõr aer nañinmej in tõñal, jouj im jab jo̦kpeji wã ko ilo nien jo̦kpej ko ilo jikin kweilo̦k eo ak oteel̦ ko kom̦ij jokwe ie kõnke rekauwõtata. Kwõj aikuj jo̦kpeji men kein ilo jikin jo̦kpej ko me kar kõjenolo̦ki wõt ñan men ko rekauwõtata.

◼ Kõjparok bwe En Jab Wal̦o̦k Jorrããn: Jouj im kõjparok bwe kwõn jab jikeet im tũbbo̦k. Kajjojo iiõ, ej wõr jorrããn ko rej wal̦o̦k ñan ro jet itok wõt jãn juuj ak sandal ko rej kõn̦aki, el̦aptata ñe el̦ap an ekkañ ak utiej kapier. Em̦m̦an ñe jej kõn̦ak sandal ko me em̦m̦an joñan aer utiej im rokon̦. Ilo wãween in, jeban ñarij lal̦ ak tũbbo̦k ñe jej jikinuwe ak etetal ijoko jet.

◼ Ñe Ejjab Lukkuun Em̦m̦an Am̦ Roñ: Renaaj bo̦urtok katak ko renaaj wal̦o̦k ilo FM retio. Bwe kwõn maroñ roñjaki katak kein, kwõnaaj aikuj bõktok kein roñjake jiddik ko nejũm̦ me ewõr aer FM retio.

◼ Kein Bwilbwil ko an Ajri im Jea ko Rej Nokjek: Jouj im jab bõktok waan bwilbwil ko an ajri im jea ko kwõj nukuji ñan ilowaan jikin kweilo̦k el̦ap eo. Bõtab, el̦aññe kein babu eo an niñniñ eo emaroñ pãd ioon jea eo iturum̦, eokwe kwõmaroñ bõktoke ñan ilowaan jikin kweilo̦k eo.

◼ Bõkãñaj: Ekkã ad kõm̦m̦ani kweilo̦k ko ad rel̦l̦ap ilo jikin ko me rej air conditioner. Kõn men in, el̦aññe jej kõm̦m̦an bwe en em̦m̦an joñan ad kañajñõj ak bũttũk, eokwe jej kwal̦o̦k ad l̦õmn̦ak kõn ro jet me rej ikkijel̦o̦k ak kadeke bwiin jet kain bõkãñaj ko.—1 Ko. 10:24, UBS.

◼ Peba eo etan Please Follow Up (S-43): Kwõmaroñ kanne peba eo etan Please Follow Up kõn etan armej ro rar m̦õn̦õn̦õ in roñjake ke kwaar kwal̦o̦k naan ñan er ilo iien kweilo̦k eo el̦ap. Ãlikin wõt am̦ kanne, kwõmaroñ lel̦o̦k ñan em̦m̦aan eo me ej lale Jikin Bok eo ilo jikin kweilo̦k el̦ap eo ak ñan secretary eo an eklejia eo am̦.

◼ Restaurant Ko: Jej aikuj lale bwe kõm̦m̦an ko ad ren bõktok nõbar ñan ãt eo etan Anij ñe jej m̦õñã ilo restaurant ko. Jej aikuj kõn̦ak nuknuk ko rekkar im rej kwal̦o̦k bwe kõj Kũrjin. Ewõr jet restaurant ko rej ebbõk tip. Kõn men in, em̦m̦an ñe jej illik jidik jããn ak tip ñe jej itõn kõl̦l̦ãik on̦ãn m̦õñã ko kijed.

◼ Oteel̦:

Jouj im reserve wõt oran ruum̦ ko kom̦ij aikuji. Keememej bwe oran armej ro rej jokwe ippam̦ ilo ruum̦ eo en ekkar ñan joñan eo me oteel̦ eo ej kamãlimi.
Jouj im jab kããnjel̦e ruum̦ eo kwaar reserve e, m̦ae iien ewal̦o̦k juon idiñ. Ñe kwõj kile bwe kwõj aikuj kããnjel̦e ruum̦ eo ilo oteel̦ eo, eokwe m̦õkaj im kõnnaanek oteel̦ eo bwe ren maroñ lel̦o̦k ruum̦ eo ñan ro jet. (Matu 5:37) Ñe kwõj kããnjel̦e ruum̦ eo kwaar reserve e, em̦m̦an ñe kwõj kajjitõk ippãn oteel̦ eo bwe ren lewaj nõmba eo me ej kaalikkar am̦ kar kããnjel̦e ruum̦ eo. Keememej bwe el̦aññe kwõj kããnjel̦e ruum̦ eo ak m̦õttan wõt juon raan bwe en jejjete raan eo kwaar reserve e ñane, eokwe oteel̦ eo eban karo̦o̦lwaj jããn eo am̦.
Jouj im keememej bwe ñe kwõj rent ruum̦ kõn debit ak credit card, eokwe ekkar bwe oteel̦ eo en kõjjemo̦o̦je jãn card eo am̦ on̦ãn ruum̦ eo im on̦ãn jabdewõt men ko kwõnaaj jaaji ilo oteel̦ eo ak ñe kwõnaaj kajorrããne men ko ie. Kwõjjab maroñ kõjerbal jããn in me em̦õj kõjjemo̦o̦je m̦ae jejjo raan ãlikin am̦ em̦m̦akũt jãn oteel̦ eo.
Kwõmaroñ kõjerbal waan bwilbwil kõbañ ko el̦aññe ej menin aikuj. Bõtab m̦õkaj im bar karo̦o̦le ñan ijo jikin bwe ro jet ren maroñ kõjerbale.
Em̦m̦an ñe kwõj lel̦o̦k jidik jããn in kam̦m̦oolol ñan rijerbal eo me ej aljekiwaj m̦weiuk ko m̦weiõm̦ ñan ruum̦ eo el̦aññe ãindein an armej ro kõm̦m̦ane ilo aelõñ eo. Bareinwõt, likũt jidik jããn ñan kam̦m̦oolol ro rej karreoik ruum̦ ko.
Jouj im kõmat wõt ilo jikin eo emãlim ñan kõmat ie.
Ilo jet oteel̦ ko, on̦ãn m̦õñã in jibboñ, limed ko̦pe, ak aij ekoba ippãn on̦ãn ruum̦ eo. Meñe ãindein, ak jej aikuj kabwe wõt joñan ad m̦õñã im idaak ilo iien ko jej pãd ilo oteel̦ ko im jab kajjioñ kallõñlõñ m̦õñã ak dãn bwe jen maroñ bũki ñan iien kweilo̦k eo el̦ap.
Aolep iien jej aikuj kwal̦o̦k wõt m̦wilin Kũrjin ñan rijerbal ro. El̦ap aer poub im jerbal ñan aolep armej ro rej jokwe ilo oteel̦ eo. Kõn men in, enaaj l̦ap aer m̦õn̦õn̦õ im kam̦m̦oolole kõj el̦aññe jej jouj ñan er im kijenmej wõt ippãer.
Aolep iien rũtto ro rej aikuj lale ajri ro nejier. Rej aikuj etal ippãn ajri ro nejier ñe rej elevator, swimming pool, pãd ilo ruum̦ in exercise ko im jikin ko jet.
Ewõr juon peba etan Recommended Lodging List. Peba in ej kõllaajraki oteel̦ ko kab on̦ãer ak ejjab koba tax. El̦aññe on̦ãn ruum̦ eo ilo oteel̦ eo el̦ap jãn joñan eo ej ba ilo peba eo, jab kijer in kõl̦l̦ãiki. Em̦m̦an ñe kwõj m̦õkaj im kajjitõk jipañ jãn em̦m̦aan ro ilo jikin kweilo̦k el̦ap eo me rej loloorjake jikin jokwe ñan ro jeid im jatid (Rooming Department).
El̦aññe ewõr bũraabl̦õm̦ ilo ruum̦ eo kwõj jokwe ie, jouj im kõnnaanekl̦o̦k em̦m̦aan ro ilo jikin kweilo̦k el̦ap eo me rej loloorjake jikin jokwe.

◼ Jipañ ilo Jerbal Ko: Jabdewõt eo ej m̦õn̦õn̦õ in jipañ en etal ñan ippãn Kumi eo Ej Loloorjake Jerbal ko ilo kweilo̦k eo el̦ap. Ajri ro im 16 aer iiõ im lal̦ l̦o̦k remaroñ bareinwõt jipañ. Bõtab, ajri rein rej aikuj jerbal ippãn jineer im jemãer ak rũtto ro rej lale er ak ro jet me jineer im jemãer rar kamãlim aer lale er.