M̦wil ko M̦wilid Ren Bõktok Nõbar ñan Anij
1. Etke armej ro remaroñ kile Ri Kõnnaan ro an Jeova ñe rej iten pãd ilo kweilo̦k ko aer rel̦l̦ap?
1 Ilo kweilo̦k ko ad rel̦l̦ap, ekkã an armej ro kile ñe jej iten pãd ilo iien kein. Ilo elõñ jikin ko me jej kõm̦m̦ani kweilo̦k ko ad rel̦l̦ap, rej nuuj im kõjjel̦ãiki armej ro ilo bukwõn kein kõn kõj. Ilo iien rot kein, ekkã an obrak oteel̦ im jikin m̦õñã ko kõn ro jeid im jatid. Im armej ro ilo bukwõn ko me jej kweilo̦k el̦ap ie rej kile an lõñ armej ro rej ekkõn̦ak badge ko ñan iien eo. Jenaaj kiiõ etale jet kein kakeememej ko me remaroñ jipañ kõj ñan nõbar Anij ilo wãween m̦wil ko m̦wilid.—1 Pi. 2:12, UBS.
2. Ñe jej kõn̦ak nuknuk ko rekkar ilo iien ko jej itoitak ilo bukwõn eo me kweilo̦k eo el̦ap ej wal̦o̦k ie, ewi wãween men in ej bõktok nõbar ñan Anij?
2 Nuknuk ko Rekkar: Armej ro renaaj bwilõñ kõn aer lo an em̦m̦an im ekkar nuknuk ko jej kõn̦aki ñan Kweilo̦k eo el̦ap. Bõtab, em̦m̦an bwe jen kõjparok wãween ad nuknuk ilo iien ko jet. Ãinwõt ilo iien ko ñe jej check in ñan oteel̦ ko, ñe jej m̦õñã ilo restaurant ko im ñe jej kaikujkuj ak kõm̦m̦ani men ko jet. Ad kõn̦ak nuknuk ko rekkar ilo bar iien kein emaroñ l̦apl̦o̦k an jelõt wãween an armej ro l̦õmn̦ak kõn kõj. Kõn men in, meñe jejjab aikuj kõn̦ak nuknuk in kweilo̦k ko, bõtab aorõk bwe jen kõn̦ak nuknuk ko rekkar im jab jabde ad nuknuk. Armej ro rej aikuj kile bwe jej oktak jãn armej ro me rejjab ri tõmak. (Rom 12:2) Bareinwõt, jej aikuj kõn̦ak badge ko ad kõn kweilo̦k eo el̦ap. Etke? Kõnke ñe jej kõn̦aki, emaroñ kwal̦o̦k ñan ro jet kõn kweilo̦k eo, kareel ro jet im kepel̦l̦o̦k iien ñan ad kwal̦o̦k naan kab ej juon wãween jej kwal̦o̦k kajjied ñan ro jeid im jatid ilo tõmak.
3. Ewi wãween jemaroñ kwal̦o̦k kõmmaanwa im jouj ñan ro jet?
3 Kõmmaanwa im Jouj: Jej mour ilo lal̦ in me el̦ap an armej ro l̦õmn̦ak wõt kõn er make im rejaje kam̦m̦oolol. Kõn men in, ñe armej ro, ãinwõt ri jerbal ro ilo oteel̦ ak jikin m̦õñã ko rej reitok im loe ad kõmmaanwa im jouj wõt ñan armej ro, renaaj lukkuun bwilõñ kõn ad jel̦ã m̦anit. (2 Ti. 3:1-5) Jej aikuj l̦õmn̦ak kõn ro jet im jab kõn kõj make ñe jej kõjparok jet jea ko ak l̦ain ñan ebbõk ad bok ak dvd ko rekããl ilo iien kweilo̦k eo el̦ap. (1 Ko. 10:23, 24, UBS) Juon em̦m̦aan ear lukkuun bwilõñ ãlikin iien eo jinointata in an kar pãd ilo juon iaan kweilo̦k ko ad rel̦l̦ap. Ear ba: “Ijjab keememej aolep katak ko rar wal̦o̦k ilo raan eo, ak men eo wõt ij keememeje ej kõn an em̦m̦an m̦wilin Ri Kõnnaan ro an Jeova.”
4. Etke em̦m̦an bwe jen m̦õn̦õn̦õ in jipañ ñan karreo im kõpooj jikin kweilo̦k eo ñe jemaroñ?
4 M̦õn̦õn̦õ in Jipañ: Kũrjin ro rem̦ool rej m̦õn̦õn̦õ in lel̦o̦k peier im jipañ ilo jabdewõt wãween ko. (Sam 110:3) Kwõmaroñ ke bõk kun̦aam im jipañ ilo iien kweilo̦k ko rel̦l̦ap? Ilo juon kweilo̦k el̦ap, ekar wõr enañin 600 ro jeid im jatid rar m̦õn̦õn̦õ in jipañ ñan karreo im kõpooje jikin eo naaj kõm̦m̦ane kweilo̦k eo ie. Ri jerbal ro ilo jikin eo rar ba: “Kõmar lukkuun bwilõñ! Elukkuun kar pen amim tõmak ke aolep armej rein rar m̦õn̦õn̦õ in bõk kun̦aaer im jipañ.” Jej reim̦aanl̦o̦k im kijoororetok iien eo ñe jenaaj bar kweilo̦k el̦ap (district convention) ippãn doon ilo iiõ eo 2013. Jenaaj bar pojak in roñjake im katak jãn Anij im bareinwõt nõbar e.
[Bo̦o̦k eo ilo peij 3-6]
Naan in Kakeememej ko kõn Kweilo̦k Eo El̦ap (District Convention) An 2013
◼ Awa in Kweilo̦k: Jikin eo me jenaaj kweilo̦k el̦ap ie enaaj pel̦o̦k 8:00 awa jibboñ. Bũrookraam̦ eo enaaj jino ilo 9:20 jibboñ ilo aolep raan in kweilo̦k ko. Ñe chairman eo ej kõjjel̦ã bwe enaaj jino al in kõjañjañ eo, kõj aolep jej aikuj etal ñan jea ko ad im jijet. Ilo wãween in jej kwal̦o̦k ad kautiej im enaaj em̦m̦an an jino bũrookraam̦ eo ad. Ilo raan in Jãdede, naaj kajem̦l̦o̦k kweilo̦k eo ad kõn al im jar ilo 4:50 jota im ilo Jabõt enaaj jem̦l̦o̦k ilo 3:35 awa.
◼ Jikin an Wa Baak: Ekkã an jabwe jikin ñan baaki wa ko. Kõn men in, el̦aññe ewõr waad wa, jemaroñ jipañ doon im ektak ro jet ilo wa ko waad. Ilo jet aelõñ, ewõr jikin baak ko me em̦õj kajenolo̦ki ñan ro me ewõr aer utam̦we ilo ãnbwin im ewõr aer license plate ak juon jain me ej kamãlim er ñan baak ilo jikin kein.
◼ Jikin Jijet: Ñe jej kappok jikin ad jijet, jen kappok wõt jea ko ñan baam̦le eo ad im rej kiki m̦weo im̦õd ak ñan ro rar itok ippãd tok ak ro im jej katak Baibõl̦ ippãer.—1 Ko. 13:5, UBS.
◼ M̦õñã in Raelep: Jouj im bõktok m̦õñã in raelep ko kijõmi bwe kom̦win jab aikuj ro̦o̦l ñan m̦weo ak jikin ko jet im m̦õñã in raelep ie. Em̦m̦an ñe kom̦ij bõktok nien m̦õñã ko redik bwe kom̦win maroñ likũti ium̦win jea ko. Jouj im jab bõktok cooler ko rekilep im nien m̦õñã ko kõm̦m̦an jãn kilaj ñan lowaan im̦õn kweilo̦k eo.
◼ Jabawõt: Jemaroñ kwal̦o̦k ad kam̦m̦oolol kõn jerbal ko kar kõm̦m̦ani ñan kõpooj kweilo̦k eo el̦ap, ilo ad lel̦o̦k jabawõt ko ilo jikin ko jej kweilo̦k el̦ap ie. Jabawõt ko renaaj jipañ im rejetak jerbal in kwal̦o̦k naan eo ipel̦aakin lal̦ in. El̦aññe jej jabawõt kõn jããk, je ilo jããk eo “Watch Tower.” Bareinwõt, ilo jet jikin ko, ro jeid im jatid remaroñ jabawõt kõn debit ak credit card ko aer.
◼ Uno: El̦aññe ewõr ami nañinmej im kom̦ij idaak uno, jouj im bõktok uno ko limõmi kõnke enaaj ejjel̦o̦k kain uno rot in ilo jikin kweilo̦k eo el̦ap. Ñan ro me ewõr aer nañinmej in tõñal, jouj im jab jo̦kpeji wã ko ilo nien jo̦kpej ko ilo jikin kweilo̦k eo kõnke rekauwõtata.
◼ Sandal: Jej kile bwe ekkã an wõr jorrããn ko rej wal̦o̦k ñan ro jet itok wõt jãn sandal ko rej kõn̦aki, el̦aptata ñe el̦ap an ekõñ ak utiej kapier. Em̦m̦an bwe jen kõn̦ak sandal ko em̦m̦an joñan aer utiej im rekwon. Ilo wãween in, jeban ñarij lal̦ ak tũbbo̦k ñe jej jikinuwe ak etetal ijoko jet.
◼ Ñe Ejjab Lukkuun Em̦m̦an Am̦ Roñ: Renaaj bo̦urtok katak ko renaaj wal̦o̦k ilo FM retio. Bwe kwõn maroñ roñjaki katak kein, eokwe bõktok kein roñjake jiddik ko nejũmi me ewõr aer FM retio.
◼ Kein Bwilbwil ko an Ajri im Jea ko Rej Nokjek: Jouj im jab bõktok waan bwilbwil ko an ajri im jea ko kwõj nukuji ñan ilowaan jikin kweilo̦k el̦ap eo. Bõtab, el̦aññe kein babu eo an niñniñ eo emaroñ pãd ioon jea eo iturum, eokwe kwõmaroñ bõktoke ñan ilowaan jikin kweilo̦k eo.
◼ Bõkãñaj: Ilo enañin aolep kweilo̦k ko rel̦l̦ap, ekkã ad kõm̦m̦ani ilowaan juon jikin me ej air condition. Kõn men in, el̦aññe jej kõm̦m̦an en em̦m̦an joñan ad kañajñõj ak bũttũk, eokwe jenaaj kwal̦o̦k ad l̦õmn̦ak kõn ro jet me rej ikkijel̦o̦k ak kadeke jet kain bõkãñaj ko.—1 Ko. 10:24, UBS.
◼ Peba eo etan Please Follow Up (S-43): Em̦m̦an bwe kwõn kanne peba eo etan Please Follow Up kõn etan armej ro rar m̦õn̦õn̦õ in roñjake ke kwaar kwal̦o̦k naan ñan er ilo kar raan in kweilo̦k el̦ap eo. Ãlikin wõt am̦ kanne, kwõmaroñ lel̦o̦k ñan em̦m̦aan eo me ej lale Jikin Bok eo ak ñan secretary eo an eklejia eo am̦.
◼ Restaurant Ko: Ñe jej m̦õñã ilo restaurant ko jen bõktok nõbar ñan ãt eo etan Anij kõn kõm̦m̦an ko ad. Jej aikuj kõn̦ak nuknuk ko rekkar im rej kwal̦o̦k bwe kõj Kũrjin. Ilo jet restaurant ko rej ebbõk tip, innem em̦m̦an bwe jen illik jidik jããn ak tip ñe jej itõn kõl̦l̦ãik on̦ean m̦õñã ko kijed.
◼ Oteel̦:
(1) Jouj im reserve wõt oran ruum̦ ko kom̦ij aikuji. Keememej bwe oran armej ro rej jokwe ippam̦ ilo ruum̦ eo en ekkar ñan joñan eo me oteel̦ eo ej kamãlimi.
(2) Ñe kwõj kile bwe kwõj aikuj cancele ruum̦ eo ilo oteel̦ eo, eokwe m̦õkaj im kõnnaanek oteel̦ eo bwe ren maroñ lel̦o̦k ruum̦ eo ñan ro jet. (Matu 5:37) Ñe kwõj cancele ruum̦ eo kwaar reserve, em̦m̦an bwe kwõn kajjitõk ippãn oteel̦ eo bwe ren lewaj nõmba eo me ej kaalikkar am̦ kar cancele ruum̦ eo. Keememej bwe el̦aññe kwõj cancele ruum̦ eo m̦õttan wõt juon raan bwe en jejjete raan eo kwaar reserve e, eokwe oteel̦ eo eban karo̦o̦lwaj jããn eo am̦.
(3) Jouj im keememej bwe ñe kwõj rent ruum̦ kõn debit ak credit card, eokwe ekkar bwe oteel̦ eo en “kõjjemo̦o̦je” jãn card eo am̦ on̦ean ruum̦ eo im jabdewõt men ko kwõnaaj charge ilo oteel̦ eo ak ñe kwõnaaj kajorrããne men ko ie. Kwõjjab maroñ kõjerbal jããn in me em̦õj kõjjemo̦o̦je m̦ae jejjo raan ãlikin am̦ kar kiki ilo oteel̦ eo.
(4) Kwõmaroñ kõjerbal waan bwilbwil kõbañ ko el̦aññe ej menin aikuj. Bõtab m̦õkaj im bar karo̦o̦le ñan ijo jikin bwe ro jet ren maroñ kõjerbale.
(5) Em̦m̦an bwe kwõn lel̦o̦k jidik jããn in kam̦m̦oolol ñan ri jerbal eo me ej aljekwaj m̦weiuk ko m̦weiõm̦ ñan ruum̦ eo el̦aññe ãindein an armej ro kõm̦m̦ane. Bareinwõt likũt jidik jããn ñan kam̦m̦oolol ro rej karreo ruum̦ ko ilo kajjojo raan.
(6) Jouj im kõmat wõt ilo jikin eo emãlim ñan kõmat.
(7) Ilo jet oteel̦ ko, on̦ean m̦õñã in jibboñ, limed ko̦pe im aij ekoba ippãn on̦ean ruum̦ eo. Kõn men in, jej aikuj ebbõk kijed im limed ekkar ñan oran ro wõt me rej jokwe ilo ruum̦ eo im jab ebbõk tak wõt.
(8) Aolep iien jej aikuj kwal̦o̦k wõt m̦wilin Kũrjin ñan ri jerbal ro. El̦ap aer poub im jerbal ñan aolep armej ro rej jokwe ilo oteel̦ eo. Kõn men in, enaaj l̦ap aer m̦õn̦õn̦õ im kam̦m̦oolole kõj el̦aññe jej jouj ñan er im kijenmej wõt ippãer.
(9) Aolep iien rũtto ro rej aikuj lale bwe ajri ro nejier ren jab make iaaer. Kõn men in, rũtto ro ren etal ippãn ajri ro nejier ñe rej elevator, tutu ilo pool, pãd ilo ruum̦ in exercise im jikin ko jet.
(10) Ewõr juon peba etan “Recommended Lodging List.” Peba in ej kõllaajraki oteel̦ ko kab on̦aer ak ejjab koba tax. El̦aññe on̦ean ruum̦ ilo oteel̦ eo el̦ap jãn joñan eo ej ba ilo peba eo, jab kijer in kõl̦l̦ãiki. Em̦m̦an bwe kwõn m̦õkaj im kajjitõk jipañ jãn em̦m̦aan ro ilo jikin kweilo̦k el̦ap eo me rej loloorjake jikin jokwe ñan ro jeid im jatid (Rooming Department).
(11) El̦aññe ewõr men eo ear wal̦o̦k ilo ruum̦ eo kwõj jokwe ie, jouj im kõnnaanekl̦o̦k em̦m̦aan ro ilo jikin kweilo̦k el̦ap eo me rej loloorjake jikin jokwe ñan ro jeid im jatid.
◼ Jipañ ilo Jerbal Ko: Jabdewõt eo ej m̦õn̦õn̦õ in jipañ en etal ñan ippãn Kumi eo Ej Loloorjake Jerbal ko ilo kweilo̦k eo el̦ap. Ajri ro im 16 aer iiõ im lal̦ l̦o̦k remaroñ bareinwõt jipañ. Bõtab, rein ren jerbal ippãn jineer im jemãer ak rũtto ro rej lale er.