Naanin Kakeememej ko kõn Kweilo̦k eo El̦ap
Awa in Kweilo̦k: Jikin eo me jenaaj kweilo̦k el̦ap ie enaaj pel̦l̦o̦k ilo 8:00 awa jibboñ. Bũrookraam̦ eo enaaj jino ilo 9:20 jibboñ ilo aolep raanin kweilo̦k ko. Ñe jermen (chairman) eo ej kõjjel̦ã bwe enaaj jino al in kõjañjañ eo, kõj aolep jej aikuj etal ñan jea ko ad im jijet. Ilo wãween in jej kwal̦o̦k ad kautiej im enaaj em̦m̦an an jino bũrookraam̦ eo ad. Ilo raan in Bõl̦aide im Jãdede, naaj kõjem̦l̦o̦k kweilo̦k eo ad kõn al im jar jejjo minit ñan 5 awa, im ilo Jabõt, enaaj jem̦l̦o̦k kweilo̦k eo jejjo minit ñan 4 awa.
Al im Nõbar Jeova: Rũkarejar ro an Jeova ilo kar iien ko etto rekõn kar nõbare ilo aer al ñane, innem al ej wõnm̦aanl̦o̦k wõt im aorõk ilo ad kabuñ ñan Jeova ilo raan kein. (Sam 28:7) Aolep iien m̦okta jãn an jino kweilo̦k eo, ej jo̦ kõjañjañ eo. Kajjojo iien ej jino bũrookraam̦ eo ad, jej kõjo̦e kõjañjañ eo me kar kõpooje ñan ad katak kõn Jeova im kabuñ ñane. Meñe rej baj ainikien kõjañjañ wõt ak rejjab kõjañjañ bajjek. Kõn men in, ñe jermen eo ej kõjjel̦ã bwe kõjañjañ eo ej pojak in jo̦, jej aikuj jijet ijoko jikid im kwal̦o̦k ad kam̦m̦oolol ilo ad roñjake kõjañjañ kein im jab bwebwenato. Ad kõm̦m̦ane men in ej kaalikkar ad kam̦m̦oolol kumi in kõjañjañ eo an doulul in. Ruo alen ilo juon iiõ, em̦m̦aan im kõrã rein jeid im jatid rej make kõl̦l̦ã on̦ãn aer etal ñan Patterson, ilo New York, ñan rekoote aer kõjañjañ bwe en kab em̦m̦an ad roñjake. Ãlikin ad lukkuun roñjake kõjañjañ eo, aolep rej aikuj koba im nõbar Jeova ilo aer al jãn bokin al eo ad.
Jikin Baak Wa: Ilo jet iaan jikin ko me enaaj wõr kweilo̦k el̦ap ie, em̦õj letok ñan kõj maroñ ñan baak ilo jikin baak ko. Ejjel̦o̦k on̦ãn ñan baak, im eo em̦õkaj eokwe enaaj wõr jikin an baak. Ekkã an jabwe jikin ñan baaki wa ko. Kõn men in, el̦aññe ewõr waad wa, jemaroñ jipañ doon im ektake ro jet ilo wa ko waad. Ilo jet aelõñ, ewõr jikin baak ko me em̦õj kõjenolo̦ki ñan ro me ewõr aer nañinmej ak utam̦we ilo ãnbwinnier im ewõr aer l̦aijen bũl̦eit (license plate) ak juon jain me ej kamãlim er ñan baak ilo jikin kein.
Jikin Jijet: Ñe ej jino pel̦l̦o̦k jikin kweilo̦k eo ilo jibboñ, jouj im jab kajjioñ jiãiik ro jet ilo am̦ ekkotaaki jikin jijet ko me rem̦m̦an ippam̦. Jej aikuj kwal̦o̦k ad kaarmejjete kõj make im kõtl̦o̦k bwe ro jet ren jijet ilo jikin ko rem̦m̦an ippãer. Ilo wãween in, armej ro jet me renaaj kobatok renaaj kile bwe kõj m̦oolin Kũrjin im nõbar Anij. (Jon 13:34, 35; 1 Ko. 13:5, UBS; 1 Pi. 2:12, UBS) Ñe jej kappok jikin ad jijet, jen kappok wõt jea ñan baam̦le eo ad me rej kiki m̦weo im̦õd ak ñan ro rar itok ippãd tok ak ro jej katak Baibõl̦ ippãer. Enaaj wõr jikin jijet ko me naaj kõjenolo̦ki ñan lel̦l̦ap im l̦al̦l̦ap ro im ro me ewõr aer nañinmej. Kõnke eban lukkuun lõñ jea ñan rein, juon ak ruo iaan armej ro me rej lale im jipañ er renaaj jijet ippãer ilo jea kein me kar kõjenolo̦ki ñan er.
Nuknuk ko Rekkar: Nuknuk ko ad ilo iien kweilo̦k eo el̦ap rej aikuj ekkar im karbõb im en jab tarjen joñan ad tõrejab ãinwõt wãween an rũlal̦ in tõrejab. (1 Ti. 2:9) Jej aikuj bar kõjparok wãween ad nuknuk ñe jej itõn jããk in ak jããk out jãn wõtel̦ eo jej pãd ie. Im jej aikuj bar kõjparok wãween ad nuknuk ilo iien ko m̦okta jãn raanin kweilo̦k el̦ap eo ak ãlikin. Lale bwe nuknuk ko ad ren jab ettoon im jokdãd. Ad erreo im karbõb enaaj kõm̦m̦an menin ad m̦õn̦õn̦õ in kõn̦ak pããj (badge) eo ad im jab jook in kwal̦o̦k kõn kweilo̦k el̦ap eo. Bareinwõt ñe ekarbõb im ekkar nuknuk ko ad kab em̦m̦an m̦wilid, eban baj kareel wõt bũruon ro rej kõn̦aan jel̦ã kõn m̦ool eo ak enaaj bar kam̦õn̦õn̦õik bũruon Jeova.—Zp. 3:17, UBS.
Kwal̦o̦k Ad Jel̦ã M̦anit Ñe Jej Kõjerbal iPad ak Jeel̦boon Ko: Ñe epãd jeel̦boon ko nejid ak iPad ko, jej aikuj kwal̦o̦k ad jel̦ã m̦anit im kõm̦m̦an bwe ren jab wal̦o̦k ainikier. Ilo wãween in eban kaabn̦õn̦õik ro jet. Ñe jej kõjerbal kamera ko, kein piitio ko, iPad ko, im ko ãierl̦o̦kwõt, jen bar l̦õmn̦ak kõn ro jet bwe jen jab kaabn̦õn̦õik er ak pinej mejãer. Jej aikuj bar jel̦ã m̦anit ilo ad jab text ak email bajjek ilo iien kweilo̦k eo.
M̦õñã in Raelep: Jouj im bõktok m̦õñã in raelep ko kijõmi bwe kom̦win jab aikuj ro̦o̦l ñan m̦weo ak jikin ko jet im m̦õñã in raelep ie. Em̦m̦an ñe kom̦ij bõktok nien m̦õñã ko reddik bwe kom̦win maroñ likũti ium̦win jea ko. Jouj im jab bõktok kul̦õr (cooler) ko rekkillep im nien m̦õñã ko kõm̦m̦an jãn kilaaj ñan lowaan im̦õn kweilo̦k eo.
Jabawõt: Jemaroñ kwal̦o̦k ad kam̦m̦oolol kõn jerbal ko kar kõm̦m̦ani ñan kõpooj kweilo̦k eo el̦ap ilo ad lel̦o̦k jabawõt ko ilo jikin ko jej kweilo̦k el̦ap ie. Jabawõt ko renaaj jipañ im rejetak jerbal in kwal̦o̦k naan eo ipel̦aakin lal̦ in. El̦aññe jej jabawõt kõn jããk, je ilo jããk eo “Christian Congregation of Jehovah’s Witnesses.” Bareinwõt, ilo jet jikin ko, ro jeid im jatid remaroñ kõjerbal kaat (debit ak credit card) ko aer ñan jabawõt.
Uno: El̦aññe ewõr am̦ nañinmej im kwõj idaak uno, jouj im bõktok uno ko lim̦õm̦ kõnke enaaj ejjel̦o̦k kain uno rot in ilo jikin kweilo̦k eo el̦ap. Ñan ro me ewõr aer nañinmej in tõñal, jouj im jab jo̦kpeji wã ko ilo nien jo̦kpej ko ilo jikin kweilo̦k eo ak wõtel̦ ko kom̦ij jokwe ie kõnke rekauwõtata. Kwõj aikuj jo̦kpeji men kein ilo jikin jo̦kpej ko me kar kõjenolo̦ki wõt ñan men ko rekauwõtata.
Kõjparok bwe En Jab Wal̦o̦k Jorrããn: Jouj im kõjparok bwe kwõn jab jikeet im tũbbo̦k. Kajjojo iiõ, ej wõr jorrããn ko rej wal̦o̦k ñan ro jet itok wõt jãn juuj ak jããntõl̦ ko (sandal) rej kõn̦aki, el̦aptata ñe el̦ap an ekkañ ak utiej kapier. Em̦m̦an ñe jej kõn̦ak jããntõl̦ ko me em̦m̦an joñan aer utiej. Ilo wãween in, jeban ñarij lal̦ im tũbbo̦k ñe jej jikinuwe ak etetal ijoko jet.
Ñe Epen Am̦ Roñ: Renaaj bo̦urtok katak ko renaaj wal̦o̦k ilo FM retio. Bwe kwõn maroñ roñjaki katak kein, kwõnaaj aikuj bõktok kein roñjake jiddik ko nejũm̦ me ewõr aer FM retio.
Kein Bwilbwil ko an Ajri im Jea ko Rej Nokjek: Jouj im jab bõktok waan bwilbwil ko an ajri im jea ko kwõj nukuji ñan ilowaan jikin kweilo̦k el̦ap eo. Bõtab, el̦aññe kein jijet eo an niñniñ eo emaroñ pãd ioon jea eo iturum̦, eokwe kwõmaroñ bõktoke ñan ilowaan jikin kweilo̦k eo.
Bõkãñaj Ko: Ekkã ad kõm̦m̦ani kweilo̦k ko ad rel̦l̦ap ilo jikin ko me rej erkan̦teijen (air condition). Kõn men in, el̦aññe jej kõm̦m̦an bwe en em̦m̦an joñan ad kañajñõj, eokwe jej kwal̦o̦k ad l̦õmn̦ak kõn ro jet me rej ikkijel̦o̦k ak kadeke bwiin jet kain bõkãñaj.—1 Ko. 10:24, UBS.
Peba eo Etan Please Follow Up (S-43): Kwõmaroñ kanne peba eo etan Please Follow Up kõn etan armej ro rar m̦õn̦õn̦õ in roñjake ke kwaar kwal̦o̦k naan ñan er ilo iien kweilo̦k eo el̦ap. Ãlikin wõt am̦ kanne, kwõmaroñ lel̦o̦k ñan em̦m̦aan eo me ej lale Jikin Bok eo ilo jikin kweilo̦k el̦ap eo ak ñan jekretari eo an eklejia eo am̦.
Rejtõrõn Ko: Jej aikuj lale bwe kõm̦m̦an ko ad ren bõktok nõbar ñan ãt eo etan Anij ñe jej m̦õñã ilo rejtõrõn ko. Jej aikuj kõn̦ak nuknuk ko rekkar im rej kwal̦o̦k bwe kõj Kũrjin. Ewõr jet rejtõrõn ko rej ebbõk tũp. Kõn men in, em̦m̦an ñe jej illik jidik jããn in kam̦m̦oolol ñe jej itõn kõl̦l̦ãik on̦ãn m̦õñã ko kijed.
Wõtel̦:
Jouj im reserve wõt oran ruum̦ ko kom̦ij aikuji. Keememej bwe oran armej ro rej jokwe ippam̦ ilo ruum̦ eo en ekkar ñan joñan eo me wõtel̦ eo ej kamãlimi.
Ñe em̦õj am̦ kar reserve ruum̦ ilo juon wõtel̦ im kõl̦l̦ã on̦ãn kadede, jouj im jab kããnjel̦e m̦ae iien ewal̦o̦k juon idiñ. Ñe kwõj kile bwe kwõj aikuj kõm̦m̦ane men in, eokwe m̦õkaj im kõjjel̦ãik wõtel̦ eo bwe ren maroñ lel̦o̦k ruum̦ eo ñan ro jet. (Matu 5:37) Bareinwõt, kwõn kajjitõk ippãn wõtel̦ eo bwe ren lewaj nõmba eo me ej kaalikkar am̦ kar kããnjel̦e bũl̦ããn eo am̦. Keememej bwe el̦aññe m̦õttan wõt juon raan bwe en jejjete raan eo kwaar reserve am̦ ruum̦ ak kwaar jab m̦õkaj im kããnjel̦e, eokwe wõtel̦ eo eban karo̦o̦lwaj jããn eo am̦.
Jouj im keememej bwe ñe kwõj itõn kiki ilo wõtel̦ im kwõj kõjerbal kaat (debit ak credit card), wõtel̦ eo enaaj bõk nõmba in kaat eo am̦ bwe ren kab jaaje on̦ãn ruum̦ eo am̦ im jabdewõt men ko ilowaan ñe enaaj wõr jorrããn ilo iien eo kwõj kiki ie. Kõn men in, kwõn jab kõjerbal jããn eo ilo account eo am̦ ilo pããñ me wõtel̦ eo em̦õj an jaaje eok kadede kake m̦ae iien kwõj diwõjl̦o̦k im ejjel̦o̦k jorrããn ear wal̦o̦k ñan ruum̦ eo.
Kwõmaroñ kõjerbal waan bwilbwil kõbañ ko an wõtel̦ eo el̦aññe ej menin aikuj. Bõtab, m̦õkaj im bar karo̦o̦le ñan ijo jikin bwe ro jet ren maroñ bar kõjerbale.
Em̦m̦an ñe kwõj lel̦o̦k jidik jããn in kam̦m̦oolol ñan rijerbal eo me ej aljekiwaj m̦weiuk ko m̦weiõm̦ ñan ruum̦ eo am̦ el̦aññe ãindein an armej ro kõm̦m̦ane ilo aelõñ eo. Bareinwõt, likũt jidik jããn ñan kam̦m̦oolol rijerbal eo ej karreoik ruum̦ eo am̦.
Jouj im kõmat wõt ilo ruum̦ ko wõtel̦ eo ej kõtl̦o̦k am̦ kõmat ie. El̦aññe ejjab mãlim kõmat ilo ruum̦ eo, jab kõmat ie.
Ilo jet wõtel̦ ko, on̦ãn m̦õñã in jibboñ, dãnnin ko̦pe, kab aij rekoba ippãn on̦ãn ruum̦ eo. Meñe ãindein, ak jej aikuj kabwe wõt joñan ad m̦õñã im idaak ilo iien ko jej pãd ilo wõtel̦ ko im jab kajjioñ kallõñlõñ m̦õñã ak dãn bwe jen maroñ bũki.
Aolep iien jej aikuj kwal̦o̦k wõt m̦wilin Kũrjin ñan rijerbal ro. El̦ap aer poub im jerbal ñan aolep armej ro rej jokwe ilo wõtel̦ eo. Kõn men in, enaaj l̦ap aer m̦õn̦õn̦õ im kam̦m̦oolole kõj el̦aññe jej jouj ñan er, kijenmej wõt ippãer, im kwal̦o̦k bwe kõj rũmel̦el̦e.
Aolep iien rũtto ro rej aikuj lale ajri ro nejier ñe rej itoitak ilo wõtel̦ eo. Rej aikuj etal ippãn ajri ro nejier ñe rej erpeta (elevator), tutu ilo jikin tutu ko (swimming pool), pãd ilo jikin kõttar eo (lobby) im ruum̦ in ekjerjaij eo (exercise), im bar jikin ko jet.
Ilo peba eo (Recommended Lodging List) me doulul in ekar jilkinwaj ñan kwal̦o̦k wõtel̦ ta ko rem̦m̦an, em̦õj kõllaajrake on̦ãn kajjojo ruum̦ ilo juon raan bõtab ejjab koba tax. El̦aññe on̦ãn ruum̦ eo ilo wõtel̦ eo el̦ap jãn joñan eo ej ba ilo peba eo, jab kijer in kõl̦l̦ãiki. Em̦m̦an ñe kwõj m̦õkaj im kajjitõk jipañ jãn em̦m̦aan ro ilo jikin kweilo̦k el̦ap eo (Rooming Department) me rej loloorjake jikin jokwe ñan ro jeid im jatid.
El̦aññe ewõr bũraabl̦õm̦ ilo ruum̦ eo kwõj jokwe ie, jouj im kõnnaanekl̦o̦k em̦m̦aan ro ilo jikin kweilo̦k el̦ap eo me rej loloorjake jikin jokwe bwe ren jipañ eok.
Jipañ ilo Jerbal Ko: Jabdewõt eo ej m̦õn̦õn̦õ in jipañ en etal ñan ippãn Kumi eo Ej Loloorjake Jerbal ko ilo kweilo̦k el̦ap eo. Ajri ro 16 aer iiõ im lal̦l̦o̦k remaroñ bareinwõt jipañ. Bõtab, ajri rein rej aikuj jerbal ippãn jineer im jemãer ak rũtto ro rej lale er ak ro jet me jineer im jemãer rar kamãlim aer lale er.