Kweilo̦k Eo El̦ap Etan “Kõjparok Bũruom̦!”–Juon Wãween Jej Kalikkar M̦ool Eo
1. Ta katak ko kõn Anij Ri Israel ro rar kõl̦mãnl̦o̦kjen̦ im kõnono kaki ke rar kõm̦m̦ani kwõjkwõj ko aer kajjojo iiõ?
1 Ri Israel ro rekõn kweilo̦k ippãn doon jilu alen ilo juon iiõ ñan kõm̦m̦ani kwõjkwõj ko aer. Meñe em̦m̦aan ro wõt rar aikuj pãd ilo kwõjkwõj ko, ekkã an kar baam̦le ko aer ilo̦k ippãerl̦o̦k ñan Jerusalem kõnke iien kein kar jet iien rekam̦õn̦õn̦õ. (Dt. 16:15, 16) Iien kein rel̦l̦ap rar kepel̦l̦o̦k iien ñan aer kõl̦mãnl̦o̦kjen̦ im kõnono kõn katak ko rem̦ool kõn Anij. Ta jet iaan katak kein? Juon iaaer ej bwe Jeova ejouj im yokwe im ej kabwe aikuj ko aer. (Dt. 15:4, 5) Bareinwõt ej juon eo remaroñ lõke im atartar ioon ñan tõl im kõjparok er. (Dt. 32:9, 10) Ri Israel ro rar bar maroñ kõl̦mãnl̦o̦kjen̦ bwe ãinwõt armej ro rej ineek ãt in Jeova, rej aikuj kwal̦o̦k l̦õmn̦ak im kõm̦m̦an ko rewãnõk an Jeova ilo mour ko aer. (Dt. 7:6, 11) Rainin, kweilo̦k ko rel̦l̦ap me jej kõm̦m̦ani aolep iiõ rej bar jipañ kõj ilo ejja wãween in wõt.
2. Ewi wãween kweilo̦k eo el̦ap enaaj kal̦apl̦o̦k ad mel̦el̦e im jerbali katak ko rem̦ool ilo Baibõl̦?
2 Bũrookraam̦ eo Ej Kalikkar Katak ko Rem̦ool: Ilo kweilo̦k ko rel̦l̦ap, jej roñjake katak ko, loi tieta ko, waanjoñak ko, im bwebwenato ko an ro jet me rej kal̦apl̦o̦k ad mel̦el̦e im jerbali katak ko rem̦ool ilo Baibõl̦. (Jon 17:17) Kar lukkuun kõpooje kweilo̦k eo el̦ap me ej pojak in wal̦o̦k im etan “Kõjparok Bũruom̦!” Doulul eo an Jeova ej kõm̦m̦ane juon bũrookraam̦ me ejejjet im ekkar ñan aikuj ko an aolep armej ipel̦aakin lal̦. (Matu 24:45-47) Kwõj ke kijooror in loe im roñjake katak ko renaaj wal̦o̦k?
3. Ta ko jej aikuj kõm̦m̦ani bwe jen lukkuun bõk tokjãn jãn katak ko ilo kweilo̦k eo el̦ap?
3 Em̦ool, jenaaj lukkuun bõk tokjãn jãn kweilo̦k el̦ap in el̦aññe jej pãd im lukkuun roñjake aolepen katak ko. El̦aññe kwõjañin kajjitõk ippãn bo̦o̦j eo am̦ ñan kakkije jãn jerbal bwe kwõn pãd ilo kweilo̦k eo el̦ap, jouj im kõm̦m̦ane men in kiiõ. Em̦m̦an kwõn kakkije im en m̦õkaj am̦ kiki bwe kwõn jab m̦õk im mejki ilo iien kweilo̦k. Elõñ rar lo bwe aer reim̦aanl̦o̦k im kalimjek ri kõnono eo im jei katak ko ear jipañ er ñan lukkuun roñjake. Lale bwe cell phone eo am̦ en jab jañ im ko̦kkure am̦ roñjake ak an ro jet roñjake. Jouj im jab keroro im text ñan ro jet, ak m̦õñã ilo iien kweilo̦k.
4. Ewi wãween ro jemen im jinen remaroñ jipañ ajri ro nejier bwe ren bõk tokjãn jãn kweilo̦k eo el̦ap?
4 Ilo iiõ ko me rar n̦aetaer Jabõt, aolep baam̦le ko an Ri Israel ro rekõn kweilo̦k ippãn doon ñan roñjake aer riiti Kien eo ilo iien Kwõjkwõj in Im̦õn Kõppãd. Ilo iien in rũtto ro rar bõktok “ajri” ro nejier “bwe ren roñjake, im bwe ren katak.” (Dt. 31:12) Ej menin kõketak ñe jej loe an baam̦le ko jijet ippãn doon ilo kweilo̦k ko rel̦l̦ap im an ajri ro jijet wõt im lukkuun roñjake! Enaaj em̦m̦an ñe baam̦le eo am̦ ej koba ippãn doon ilo joten eo kom̦ij ro̦o̦l ñan m̦weo im bwebwenato ippãn doon kõn katak ko rem̦m̦an ippemi me komar jei ilo kweilo̦k eo. Baibõl̦ ej ba: “E lokjak men in bwebwe ilo bũruon juon ajri.” Kõn men in, kom̦ ro jemen im jinen kom̦ij aikuj lale ajri ro nejõmi ekoba jodrikdrik ro ilo iien m̦õñã in raelep im jab kõtl̦o̦k bwe ren ‘kõm̦m̦an ekkar ñan kõn̦aan ko aer make.’—JK. 22:15; 29:15, UBS.
5. Ewi wãween nuknuk ko ad im wãween ad tõreejab ilo kweilo̦k eo el̦ap ej juon wãween ñan kalikkar m̦ool eo?
5 Ñe jej kõn̦ak badge ko ilo kweilo̦k eo el̦ap, jej kõm̦m̦ane men in bwe jen maroñ kareel ro jet kõn kweilo̦k eo im bareinwõt ej juon wãween ñan kalikkar m̦ool eo ak kwal̦o̦k naan ñan armej ro ipel̦aakid. Armej ro renaaj lo bwe ro rej kõn̦ak badge ko rej kõn̦ak nuknuk ko rekkar im rerreo. Ejjab jokdãd wãween aer nuknuk im rejjab kõn̦ak style ko an ri lal̦ in me rekabwilo̦klo̦k mãj. (1 Ti. 2:9, 10) Kõn men in, jej aikuj in lukkuun lale bwe en em̦m̦an wãween ad nuknuk im tõreejab ilo kweilo̦k eo el̦ap. El̦aññe jej ekpã ãlikin kweilo̦k im etal ñan m̦õn wia ak m̦õn m̦õñã ko, jej aikuj keememej bwe ej kab m̦õj ad kweilo̦k el̦ap im jen kõn̦ak wõt nuknuk ko rekkar.
6. Ta eo jemaroñ kõm̦m̦ane bwe jen maroñ kõm̦m̦ao ippãn ri tõmak ro m̦õttad ilo kweilo̦k eo el̦ap?
6 Ilo kar iien kwõjkwõj ko rel̦l̦ap an Ri Israel ro kajjojo iiõ, rekõn kõm̦m̦ao ippãn ri tõmak ro m̦õttaer jãn jikin ko jet ilo aelõñ in Israel im jãn lal̦ ko jet. Men in ear kõm̦m̦an bwe ren bõrokuk ippãn doon. (Jrb. 2:1, 5) Ilo kweilo̦k ko rel̦l̦ap, doulul in jimjãn jemjaten eo ad ej juon menin kaalwõjwõj. Ekkã wõt an armej ro bwilõñ kõn ad bõrokuk im aenõm̦m̦an ippãn doon meñe eoktak aelõñ ko ad jãn doon. (Sam 133:1) Ijello̦kun ad diwõjl̦o̦k jãn jikin kweilo̦k eo im wia kijed m̦õñã, em̦m̦anl̦o̦k ñe jej bõktok kadede jidik kijed m̦õñã. Ilo wãween in, jemaroñ bwebwenato ippãn ri tõmak ro jet rej kab jel̦ã kajjied ak ro me rej jijet iturud!
7. Ñe ewõr ad maroñ, etke em̦m̦an bwe jen jipañ ilo iien kweilo̦k ko rel̦l̦ap?
7 Enañin aolep iien armej ro rej bwilõñ kõn an kon̦ im laajrak wãween ad kõm̦m̦ani kweilo̦k ko rel̦l̦ap, el̦aptata ñe rej jel̦ã bwe ro jeid im jatid rar m̦õn̦õn̦õ in kõpooje aolep men ñan kweilo̦k ko kõn ejjel̦o̦k on̦ean. Kwõj “m̦õn̦õn̦õ” ke in letok peõm im jipañ kõm̦m̦ani jerbal ko ilo kweilo̦k eo el̦ap? (Sam 110:3) Ekkã an baam̦le ko m̦õn̦õn̦õ in bõk kun̦aaer kõnke ej juon wãween ñan katakin ro nejier ñan jel̦ã jipañ ro jet. El̦aññe kwe armej ejookok, am̦ jipañ ilo kweilo̦k eo el̦ap enaaj kõm̦m̦an bwe kwõn jel̦ã kajjien ro jet. Juon jeid im jatid kõrã ear ba: “Iar jab jel̦ã kajjien armej ro jet ilo kweilo̦k eo, ijello̦kun wõt baam̦le eo aõ im ro m̦õtta. Ak ke iar jipañ karreo ilo kweilo̦k eo, iar iioon ri tõmak ro jet. Im elukkuun kar limo im kam̦õn̦õn̦õ!” Kwõn kal̦apl̦o̦k am jel̦ã kajjien ro jet ilo am̦ jipañ kõn jerbal ko ilo kweilo̦k eo. Kwõnaaj lo lañlõñ ilo am̦ kõm̦m̦ane men in. (2 Ko. 6:12, 13) El̦aññe kwõjañin kar jipañ ilo kweilo̦k ko rel̦l̦ap, kwõn kajjitõk ippãn em̦m̦aan ro rej lale eklejia eo ewi wãween bwe kwõn maroñ jipañ ilo iien kein.
8. Ewi wãween jenaaj kũrtok armej ro ñan kweilo̦k eo el̦ap?
8 Kũrtok Armej ro ñan Roñjake Katak ko Rem̦ool: Ãinwõt ad kõn kõm̦m̦ane ilo iiõ ko l̦o̦k, jenaaj jino leto letak peba in kũr eo jilu wiik m̦okta jãn kweilo̦k eo el̦ap. Em̦m̦an bwe eklejia ko ren kate er ñan kũrtok aolep armej ro ilo bukwõn ko kar karõk bwe ren kwal̦o̦k naan ie. (Lale bo̦o̦k eo “Ewi Wãween Jenaaj Leto Letak Peba in Kũr Eo?”) El̦aññe enaaj wõr bwe in peba in kũr ippãd, jen bõkl̦o̦k ñan kweilo̦k eo el̦ap. Ilo wãween in, jemaroñ bar kũrtok armej ro ñe jej iioon er ilo iien eo ej wal̦o̦k kweilo̦k eo el̦ap.
9. Kwal̦o̦k jet waanjoñak ko me rej kam̦ool bwe ewõr tõprak ko rem̦m̦an jej loi jen ad leto letak peba in kũr eo ñan kweilo̦k ko rel̦l̦ap.
9 Armej ro rej ke itok ñe jej kũr er ñan kweilo̦k eo el̦ap? Ilo juon kweilo̦k el̦ap, juon iaan ro rej lale kajem ear jipañ ruo ri pãlele im kappok l̦o̦k jikin aer jijet. Rar ba ñane bwe juon ear lel̦o̦k aerro peba in kũr im rar lo bwe ekaitoktoklimo. Innem erro ar kattõr ium̦win 200 m̦ail̦ ñan pãd ilo kweilo̦k eo! Bareinwõt, juon jeid im jatid kõrã ear em̦ ñan em̦ im iioon juon em̦m̦an im ear lel̦o̦k juon an peba in kũr ñan kweilo̦k eo el̦ap. L̦ein ear wõr an kajjitõk kõn kweilo̦k eo. Innem kõrã in ear bõk iien im kõmel̦el̦eiki kõn peba in kũr eo. Jet raan tokãlik ilo iien kweilo̦k eo el̦ap, kõrã in ear loe em̦m̦aan eo im bar juon m̦õttan ilo jikin kweilo̦k eo im rej jibwe juon iaan bok ko rekããl jãn kweilo̦k eo el̦ap!
10. Etke eaorõk bwe jen kobal̦o̦k ilo iien kweilo̦k ko rel̦l̦ap kajjojo iiõ?
10 Iien kwõjkwõj ko rel̦l̦ap an Ri Israel ro kajjojo iiõ rekar jet menin letok jãn Jeova ñan jipañ Ri Israel ro bwe ren maroñ “karejar ñan E ilo jim̦we im m̦ool.” (Jos. 24:14) Ãindeinl̦o̦k wõt, ñe jej etal ñan kweilo̦k ko rel̦l̦ap kajjojo iiõ, men in enaaj jipañ kõj ñan “etetal ilo m̦ool.” Ej bareinwõt m̦õttan men ko raorõk jej kõm̦m̦ani ilo ad kabuñ ñan Jeova. (3 Jon 3) Jeova enaaj kajeraam̦m̦an aolep ro rej kate er bwe ren kobatok ilo iien kweilo̦k kein rel̦l̦ap im bõk tokjãn ko rem̦m̦an!
[Naan ko ilo peij 4]
Wãween m̦wilid im ad nuknuk rej juon wãween jej kalikkar m̦ool eo
[Naan ko ilo peij 5]
Jenaaj jino leto letak peba in kũr eo jilu wiik m̦okta jãn kweilo̦k eo el̦ap
[Bo̦o̦k eo ilo peij 3-6]
Naan In Kakeememej Ko Kõn Kweilo̦k Eo El̦ap An 2012
◼ Awa in Kweilo̦k: Bũrookraam̦ eo enaaj jino ilo 9:20 jibboñ ilo aolep raan in kweilo̦k ko. Ñe chairman eo ej kõjjel̦ã bwe enaaj jino al in kõjañjañ eo, kõj aolep jej aikuj etal ñan jea ko ad im jijet. Ilo wãween in jej kwal̦o̦k ad kautiej im enaaj em̦m̦an an jino bũrookraam̦ eo ad.
◼ Jikin Jijet: Ñe jej kappok jikin ad jijet, jen kappok wõt jea ko ñan baam̦le eo ad im rej kiki m̦weo im̦õd ak ro rar itok ippãd tok ak ro im jej katak Baibõl̦ ippãer.—1 Ko. 13:5.
◼ Cell-phone: Ñe ej jino bũrookraam̦ eo, jej rõjañ aolep bwe ren kune cell phone ko aer, ñe ejjab kadikl̦o̦k ainikier bwe ren jab ko̦kkure an ro jet lukkuun roñjake katak ko ilo kweilo̦k eo ad.
◼ M̦õñã in Raelep: Jouj im bõktok m̦õñã in raelep ko kijõmi bwe kom̦win jab aikuj ro̦o̦l ñan m̦weo ak jikin ko jet im m̦õñã in raelep ie. Em̦m̦an ñe kom̦ij bõktok nien m̦õñã ko redik bwe kom̦win maroñ likũti ium̦win jea ko. Jouj im jab bõktok cooler ko rekilep im nien m̦õñã ko kõm̦m̦an jãn kilaj ñan loan im̦õn kweilo̦k eo.
◼ Jabawõt: Jemaroñ kwal̦o̦k ad kam̦m̦oolol kõn jerbal ko kar kõm̦m̦ani ñan kõpooj kweilo̦k eo el̦ap, ilo ad lel̦o̦k jabawõt ko ilo jikin ko jej kweilo̦k el̦ap ie. Jabawõt ko renaaj jipañ im rejetak jerbal in kwal̦o̦k naan eo ipel̦aakin lal̦ in. El̦aññe jej je jããk ko im jabawõt kaki, je ñan “Watch Tower.”
◼ Jorrããn im Nañinmej ilo Jidimkij: El̦aññe juon euwe an nañinmej ilo jikin kweilo̦k eo, jouj im kepaak ro rej lale kõjãm bwe ren kõjjel̦ãik kumi eo ej lale ri nañinmej ro. Rein remaroñ lale ta nañinmej eo an im jipañ e. El̦aññe rej lo bwe ekauwõtata nañinmej eo an, renaaj call e 911 ak waan aujpitõl̦. Men in enaaj bõbrae an elõñ armej ro call e l̦o̦k waan aujpitõl̦.
◼ Uno: El̦aññe ewõr ami nañinmej im kom̦ij idaak uno, jouj im bõktok uno ko limõmi kõnke enaaj ejjel̦o̦k kain uno rot in ilo jikin kweilo̦k eo el̦ap. Ñan ro me ewõr aer nañinmej in tõñal, jouj im jab jo̦kpeji wã ko ilo nien jo̦kpej ko ilo jikin kweilo̦k eo kõnke rekauwõtata.
◼ Peba eo kõn Ro Rej Itoklimo: Ewõr juon peba n̦aetan Please Follow Up (S-43) im kom̦ maroñ je kõn ro kom̦ar kwal̦o̦k naan ippãer jabdewõt jikin ilo iien kweilo̦k eo el̦ap im rej itoklimo in katak. Jej aikuj bõktok juon ak ruo peba rot in ñan iien kweilo̦k eo el̦ap. El̦aññe eddedel̦o̦k ami kanne peba in, kom̦ maroñ lel̦o̦k ñan em̦m̦aan ro rej lale jikin bok ko. Ñe jab, kom̦ maroñ kakon̦e im ñe em̦õj kweilo̦k eo el̦ap, kom̦ maroñ lel̦o̦k ñan secretary eo an eklejia eo ami.—Lale Ad Jerbal Ñan Aelõñ Eo an Nobõm̦ba 2009, peij 4.
◼ Restaurant Ko: Kom̦win bõktok nõbar ñan ãt eo etan Anij kõn kõm̦m̦an ko ami. Ñe kom̦ij kõl̦l̦ãik m̦õñã ko kijemi, kom̦win likũt jidik jããn ak tip ko ilo restaurant eo ekkar ñan joñan bõjjããn eo an jikin eo.
◼ Jipañ ilo Jerbal Ko: Jabdewõt eo ej m̦õn̦õn̦õ in jipañ en etal ñan ippãn Kumi eo Ej Lolorjake Jerbal ko ilo kweilo̦k eo el̦ap. Ajri ro im 16 aer iiõ im lal̦ l̦o̦k remaroñ bareinwõt jipañ. Bõtab, rein ren jerbal ippãn jineer im jemãer ak rũtto ro rej lale er.
[Bo̦o̦k eo ilo peij 6]
Ewi Wãween Jenaaj Leto Letak Peba in Kũr Eo?
Bwe en tõprak ad leto letak peba in kũr eo ilo aolep bukwõn ko jej kwal̦o̦k naan ie, emaroñ aikuj kadu ad kõnono ippãn armej ro. Jemaroñ ba: “Yokwe. Kõmij leto letak peba in kũr in ñan aolep armej. Eñin peba in kũr eo am̦. Kwõnaaj loe mel̦el̦e ko rel̦l̦apl̦o̦k ilowaan peba in.” En kaitoktoklimo am̦ kõnnaan. Ñe kwõj kwal̦o̦k naan im kũr armej ro ilo Jãdede im Jabõt, kwõn bar lel̦o̦k bok eo Naan in Keeañ ñan er, ñe em̦m̦an im ekkar.