Juõn Jitõbõn Lelok E Make ej Bõktok Jerammõn Ko
1. Ewi wãwen an kar David im Nehemiah kwalok juõn jitõbõn lelok ir make?
1 Ke Goliath ear kajirere kin jar in tarinae eo an Israel, jabdewõt ian ri tarinae ro remaroñ kar bõk eddo eo ñan jumaik e. Ak kar ri lale sheep eo, eo me ear jab jelã kilen tarinae ear mõnõnõ in lelok e make. (1 Sam. 17:32) Ke Ri Jew ro rar jeblak ñan Jerusalem rar likjap ilo air kar jab jino kalek worwor ko, kar ri ititõk eo an king eo an Persia eo ear mõnõnõ in bõk eddo eo ñan to jen jerbal eo an eutiej ilo mweo imõn king eo ñan an etal ñan Jerusalem bwe en maroñ jino jerbal in ekkal eo. (Nih. 2:5) Jehovah ear kajerammõn lõmarein jimor, David im Nehemiah, kin jitõb in emõn rar kwalok.—1 Sam. 17:45, 50; Nih. 6:15, 16.
2. Etke Christian ro rej aikwij kwalok juõn jitõbõn lelok ir make?
2 Rainin, jitõbõn lelok kij make ejakolok ilo lal in. Ilo “ran ko eliktata,” elap an armij ro boub, im elõñ renaj “anij lo burueir.” (2 Tim. 3:1, 2) Elukkun bidodo an juõn armij mad kin men ko an make im kõmman bwe en jab kile jerammõn ko ñan lelok jibañ ko an ñe ej wõr aikwij ñan jibañ ro jet. Bõtab, einwõt Christian ro, jej mõnõnõ in anõk joñok eo an Jesus, eo me ear mõnõnõ in bõk eddo eo ñan jibañ ro jet. (Jon 5:5-9; 13:12-15; 1 Pit. 2:21) Ewi wãwen ad maroñ kwalok jitõbõn lelok kij make, im ta jerammõn ko jenaj bõki?
3. Ewi wãwen jitõbõn lelok kij make ej wõr kunan ñan kwelok ko an congregation?
3 Kin ro Jeid im Jatid: Jemaroñ lelok juõn “men in yokwe an Jitõb” ñan ro jet ilo ad mõnõnõ in bõk kunad ilo uak ñe katak ko ilo kwelok eo rej kir ri kwalok ro ñan bõk kunair. (Rom. 1:11) Ilo ad uak ej bõktok nebar ñan Jehovah, kõmman bwe mol eo en binlok wõt ilo lemnak im buruõd, im kõmman bwe kwelok ko ren men in kalañliñ kij. (Sam. 26:12) Jemaroñ bareinwõt mõnõnõ in bõk eddo eo ñan kwalok juõn katak ilo School in Kwalok Nan eo an Christian ñe eo ej aikwij in kwalok katak eo ejjab maroñ. Men in enaj jibañ kij ñan kõmanmanlok kabel eo ad kin wãwen katakin.
4. Bar ta jet ian wãwen ko me jemaroñ kwalok jitõbõn lelok kij make?
4 Lõmaro jeid im jatid remaroñ kwalok jitõbõn lelok ir make ilo air bõk kunair ñan lale eddo ko ilo congregation eo. (Ais. 32:2; 1 Tim. 3:1) Aolep remaroñ jibañ ñan kõmman bwe assembly im convention ko ren wõnmanlok im kõmman ilo juõn wãwen emõn ilo air mõnõnõ in lelok ir make ñan jerbal ilo kajjojo jikin ko rej aikwij jibañ ie. Ñe jej mõnõnõ in lelok kij make ñan jerbal ibben overseer eo ej ito-itak ilo jerbal in kwalok nan ak ñan najidik e, menin ej kõmman bwe, “jen jimor jibañ dron.” (Rom. 1:12) Ñe jej mõnõnõ in lelok jibañ ñan ro atajinimjin, kõrã ro ejako eo beleir, ro renañinmij im mõjno, ro jinen me ro nejiir rej dik wõt, im ro jet ilo congregation eo, jej lo mõnõnõ im joij eo an Jehovah.—Ken. 19:17; Jerb. 20:35.
5. Ta men ko rej kitibuji Kingdom Hall eo rej aikwiji ro rej mõnõnõ in lelok ir make?
5 Bar juõn wãwen jej mõnõnõ in lelok ien im kate ko ad ej ilo ad jibañ ñan karreoik im kejbãrok Kingdom Hall eo ad. Bareinwõt, kinke elõñ armij ro rej deloñtok ilo mol eo, ewõr juõn aikwij elap kin Kingdom Hall ko rekãl im bareinwõt ro me rej mõnõnõ in jibañ ñan kaleki. Ruo ri belele rar mõnõnõ in lelok ir make ñan jibañ Regional Building Committee eo meñe ear jab wõr air iminene kin jerbal in ekkal. Ejjabto tokelik, ri belele rein rar katak kilen ekkal im kiõ rej jibañ kin jerbal in karõki brick ko. Lio ear ba: “Jerbal ibben don ear kõmman bwe kimin ejaak juõn kõtan ebak ñan don. Ilo jemlokin ran eo, kim lukkun mõk ak ilo jitõb kim emmourur.”
6. Etke jerbal in kwalok nan ej jerbal eo eaorõk tata jemaroñ kõmmane?
6 Ilo Ad Kwalok Nan: Jerbal eo eaorõk tata me jemaroñ kõmmane rainin ej jerbal in kwalok nan kin Ailiñ eo. Ilo ad jibañ armij ro ñan melele im jerbale nan in kakabilek ko ilo Bible eo, rej bõk juõn unin kin mour im kajur ñan anjo ion manit ko renana. Rej katak kin kejatdikdik eo ekalañliñ kin ilju im jeklaj. Ilo ad katakin kin Bible eo, jej mõnõnõ in kõmmane jerbal in eaorõk me ej lelok ñan ro jet tokjen ko etto air bed. (Jon 17:3; 1 Tim. 4:16) Bõlen wãwen ko ibbed remaroñ kõtlok kij bwe jen kalaplok ad bõk kunad ilo jerbal in ikijen ad auxiliary ak regular pioneer, ilo ad emmakit ñan ijoko elaplok aikwij ie, ak ilo ad katak bar juõn kajin.
7. Etke mõnõnõ in lelok kij make ej jerbal eo eaorõk tata rainin?
7 King David ear kanan bwe ilo ien eo Messiah eo enaj jino ien iroij eo an, armij ro an Anij renaj “lewoj ir mõke.” (Sam. 110:3, ftn.) Kin an Jehovah bikbikiri jerbal in madmõd eo ilo jitõb ilo ien kein eliktata, elukkun lap jerbal ñan ad bõk kunad. (Ais. 60:22) Kwonañin ke kar ba: “Ña e! Kwon jilkinlok iõ”? (Ais. 6:8) Emol, ilo ad kwalok jitõbõn mõnõnõ in lelok kij make, jej kamõnõnõik Jehovah im madmõde jerammõn eo.