“Komin Kõmõn Men In ilo Ememej Iõ”
Naj Kememe Mij eo an Jesus ilo April 2
1. Etke April 2, 2007, ej juõn ran elap an aorõk?
1 Ilo April 2, 2007, elõñ million armij ro ibelakin lal renaj koba ibben don ñan kememe katok in mij eo an Jesus. Jesus ear mij einwõt juõn eo ej jurake wãwen iroij eo an Jemen, im ilo wãwen in letok kamol ko bwe Satan Devil eo ear riap im ba bwe armij ro rej karejar ñan Anij kin juõn un ekibbon. (Job 2:1-5) Kwojkwoj in Kejota eo an Iroij ej bareinwõt kakememej kij bwe ikijen mij eo an einwõt juõn armij ewãppen, ejelok jerawiwi ibben, Jesus ear ‘lelok an einwõt juõn binmour ñan elõñ.’ (Mat. 20:28) Kin menin, Jesus ear jiroñ ri kalor ro an: “Komin kõmõn men in ilo ememej Iõ.” (Luk 22:19) Kamolol kin men in letok in eaorõk an Anij ear kamakit yuk ke ñan am jino kebojak ñan kememe kõmman in kin yokwe elap an emõn?—Jon 3:16.
2. Ewi wãwen ad maroñ keboj buruõd ñan ien Kwojkwoj in Kememej eo?
2 Keboj Buruõm: Ilo ad etale ta ko rar walok ilo ran ko kajjojo eliktata in an Jesus mour einwõt juõn armij, jemaroñ keboj buruõd ñan Kwojkwoj in Kememej eo. (Ezra 7:10) Ñan jibañ kij kõmmane menin, ewõr juõn lajrak ejej uan kin konono Bible eo jemaroñ loe ilo Examining the Scriptures—2007 (Etale Jeje Ko ilo Bible Ran Otemjej—2007) im ilo 2007 Calendar eo. Lajrak in konono in ejejjet ñan ran ko me men ko ikijen mij eo an Jesus rar walok ekkar ñan calendar eo jej kajerbale rainin. Ran ko im ien ko kar kwalok kaki ilo bwebwenato ko ilo Bible eo rej bedbed ion calendar eo an Ri Jew ro, me rej bwine ran ko jen tulok in al ilo juõn ran ñan tulok in al ilo ran eo juõn. Kar lemnak kin oktak in im ej alikar ilo lajrak in konono Bible kin Kwojkwoj in Kememej eo. Eliji kamelele ko im ilo jar kalmenlokjen kin mũlalin yokwe eo an Anij enaj jibañ kij ñan bõk tokjen jen ien Kwojkwoj in Kememej in.
3. Ewi wãwen ad maroñ jibañ ro rar kwalok air itoklimo im ro rej inactive ñan air bõk tokjen jen ien Kwojkwoj in Kememej eo?
3 Kirtok Ro Jet ñan Air Itok: Peij eo iloa ilo February Ad Jerbal Ñan Ailiñ Eo ear kejelã kin juõn jerbal ejej uan ñan kirtok armij ro ñan ien in eaorõk. Emwij ke am kõmman karõk ko ñan am bõk kunam ilo jerbal in ejej uan? Emwij ke am kõmman juõn lajrak in etan aolep ro kwonaj kirtok ir, im emwij ke am jino konono ibbeir? Kõmman karõk ko ñan am mõkajtok ilo joten in Kwojkwoj in Kememej eo ñan am karuwaineneik ro kwar kirtok ir im bareinwõt ro jet rar kwalok air itoklimo. Kwomaroñ aikwij jijet ituriir, im kõmman bwe en wõr juõn air Bible im book in al. Kwalok kajjiir ñan ro jet ilo congregation eo. Elikin program eo bõk am ien ibbeir im uaki kajitõk ko air. Kirtok ir ñan special talk eo enaj walok ilo April 15. Elaptata elder ro enaj lap air itoklimo in lale bwe ro me rekin kobatok ibben congregation eo ak rar oktak im inactive (emwij an bõjrak jen an jerbal in kwalok nan 6 alliñ ko ak elõñlok im jakkeini in kwelok) en wõr air peba in kir ñan ien Kwojkwoj in Kememej eo im special talk eo.
4. Ewi wãwen ad maroñ jibañ armij ro ñan air wõnmanlok wõt im kõmman wõnmanlok ko ilo jitõb elikin Kwojkwoj in Kememej eo?
4 Jibañ Ro Rekãl me Rej Itoklimo im Ro Rej Inactive ñan Wõnmanlok ilo Jitõb: Ri konono eo ñan ien Kwojkwoj in Kememej eo enaj kamelele ilo tu kadu kin karõk ko kin kõmman katak ko kin Bible im rejañ ro rekãl me rej itoklimo ñan air wõnmanlok im katak kin Jehovah. Kwomaroñ kajerbal nan ko an einwõt juõn bedbed ñan lelok jibañ ilo jitõb ñan ro kwar kirtok ir. Elañe rejañin jino katak Bible eo, karõk bwe kwon lolok ir ilo mõkaj elikin wõt ien Kwojkwoj in Kememej eo im kwalok kilen kõmman katak kin Bible eo me ejelok wõnãn. Ñan air maroñ kõmman wõnmanlok ko ilo jitõb, rej aikwij bed ilo kwelok ko an congregation. (Hib. 10:24, 25) Ñan kõtõbrak menin, rejañ ir ñan air jino keini in bed ilo kwelok ko. Elder ro rej aikwij kõmman karõk ñan air lolok Christian ro rej inactive me rar bed ilo Kwojkwoj in Kememej eo im jibañ ir ñan kalaplok air lemnak kin melele ko rar walok ilo katak eo. Menin enaj rejañ ir ñan air bar jino bõk kunair ilo makitkit ko ilo congregation eo.
5. Ilo wãwen et Kwojkwoj in Kememej eo enaj jelet kij?
5 Ien Kwojkwoj in Kememej eo ej letok juõn ien emõn ñan ad lukkun kalmenlokjen kin ta eo Jehovah im Jesus rar kõmmane ñan tokjen eo ad. Kalmenlokjen rot in ej kamũlallok yokwe eo ad kin ir im ej jelet wãwen mwilid. (2 Kor. 5:14, 15; 1 Jon 4:11) Kiõ ej ien ñan ad keboj kij make im ro rej itoklimo ñan ien in eaorõk me jej ‘kwalok kin mij eo an Iroij ñõn ien eo Ej itok.’—1 Kor. 11:26.