“Kom̦win Kõm̦m̦an Men In”
Naaj Kõm̦m̦ane Kwõjkwõj in Keememej Mej eo an Jijej ilo Eprõl̦ 5
1. Etke eaorõk ñan keememej raan in mej eo an Jijej?
1 “Kom̦win kõm̦m̦an men in ilo ememej Eõ.” (Luk 22:19) Ilo eoon in, Jijej ear kakien rũkal̦oor ro an ñan keememej raan in mej eo an. Kõn aolep tokjãn ko rar wal̦o̦ktok jãn katok in mej eo an Jijej, ejjel̦o̦k bar juon raan eaorõkl̦o̦k ippãn Kũrjin ro jãn raan in mej eo an Jijej im ej wal̦o̦k kajjojo iiõ. Ilo iiõ in, jenaaj kõm̦m̦ane Kwõjkwõj in Mej eo an Jijej ilo Eprõl̦ 5 raan. Ak ilo an epaaktok iien in, ewi wãween jemaroñ kwal̦o̦k ad kam̦m̦oolol ñan Jeova?—Kol. 3:15.
2. Ewi wãween jemaroñ kwal̦o̦k ad kam̦m̦oolol kõn Kwõjkwõj in Keememej Mej eo an Jijej?
2 Pojak: Ekkã wõt ad pojak ñan iien ko me jej watõki bwe raorõk. Ãinwõt juon baam̦le, jemaroñ kõpooj bũruod ñan Kwõjkwõj in Keememej Mej eo an Jijej ilo ad katak ippãn doon kõn men ko rar wal̦o̦k ilo raan ko ãliktata in an Jijej mour ioon lal̦ im kõl̦mãnl̦o̦kjen̦ kake men kein. (Ezra 7:10) Jet eoon ko kõn men ko rar wal̦o̦k ilo mour eo an Jijej rej pãd ilo bok eo Liñõri Baibõl̦ eo Raan Otemjej.
3. Jej kwal̦o̦k ad kam̦m̦oolol kõn mej eo an Jijej ilo ad kal̦apl̦o̦k ijo kun̦aad ilo kwal̦o̦k naan. Ewi wãween jemaroñ kõm̦m̦ane men in?
3 Kwal̦o̦k Naan: Jemaroñ bar kwal̦o̦k ad kam̦m̦oolol kõn mej eo an Jijej ilo ad kal̦apl̦o̦k ijo kun̦aad ilo jerbal in kwal̦o̦k naan. (Luk 6:45, UBS) Jino jãn Jãdede, M̦aaj 17 raan, enaaj ijjino jerbal in leto letak peba in kũr eo ipel̦aakin lal̦ ñan kũrtok armej ro ñan Kwõjkwõj in Keememej Mej eo an Jijej. Kwõmaroñ ke kõm̦m̦an oktak ilo m̦akũtkũt ko kwõj kõm̦m̦ani ñan kal̦apl̦o̦k ijo kun̦aam̦ ilo kwal̦o̦k naan, bõlen ilo am̦ auxiliary pioneer? Ãinwõt juon baam̦le, etke kom̦ij jab bwebwenato kõn men in ilo Iien Kabuñ an Baam̦le eo ami?
4. Ta tokjãn ko rem̦m̦an renaaj wal̦o̦k ñan kõj el̦aññe jej kobal̦o̦k ilo Kwõjkwõj in Keememej Mej eo an Jijej?
4 El̦ap wõt ad bõk tokjãn ñe jej kobal̦o̦k ilo Kwõjkwõj in Keememej Mej eo an Jijej kajjojo iiõ! Ñe jej kõl̦mãnl̦o̦kjen̦ kõn jouj eo an Jeova kõn an kar letok Nejin eo ej make wõt bwe en mej im kõl̦l̦ã on̦ean jerawiwi ko ad, men in ej kal̦apl̦o̦k ad lañlõñ im yokwe Anij. (Jon 3:16; 1 Jon 4:9, 10) Bareinwõt men in ej kõm̦akũt kõj ñan jab bar mour ñan kõj make. (2 Kor. 5:14, 15) Im ej lujur kõj ñan kwal̦o̦k kõn Jeova ñan armej otemjej im nõbare. (Sam 102:19-21) Aet, ãinwõt ri karejar ro an Jeova im el̦ap aer kam̦m̦oolol, jej kijooror im reim̦aanl̦o̦k ñan iien in me jenaaj keememej raan in mej eo an Jijej ilo Eprõl̦ 5 raan, juon iien em̦m̦an ñan ‘kwal̦o̦k kõn mej eo an Irooj.’—1 Kor. 11:26.