Jen Kwal̦o̦k Ad Kam̦m̦oolole Jeova
Naaj Keememej Raan in Mej eo an Jijej ilo Eprõl̦ 17
1. Ãinwõt kar ri jeje sam, ta eo jej aikuj kwal̦o̦ke ilo an epaaktok Iien Keememej Mej eo An Jijej?
1 Jeova el̦ap an tũriam̦o im ej jipañ armej ro doon. Kõn an kam̦m̦oolol kõn wãween kein, juon ri jeje sam ear ba: “Ta eo inaaj lel̦o̦k ñan Jeova kõn men ko otemjej Ear letok ñan eõ?” (Sam 116:12) Armej ro doon Anij rainin el̦apl̦o̦k unin aer aikuj kam̦m̦oolole Jeova. Elõñ iiõ ko ãlikin an kar ri jeje Sam je naan kein, Jeova ear lel̦o̦k ñan armej ro juon men elukkuun aorõk. Ta men in eaorõk? Ear lel̦o̦k nejin bwe en mej im kõl̦l̦ãik on̦ean jerawiwi ko an Adam bwe en pel̦l̦o̦k juon ial̦ ñan an aolep armej maroñ erom ro jeran Anij. Ilo ad kepoj kõj make ñan keememej raan in mej eo an Kũraij ilo Eprõl̦ 17, ewõr un ko rem̦m̦an ñan ad kwal̦o̦k ad kam̦m̦oolole Jeova.—Kol. 3:15.
2. Ta jet iaan jeraam̦m̦an ko im rar itok jãn mej eo an Jijej me ear kõl̦l̦ãik on̦ean jerawiwi ko ad?
2 Jeraam̦m̦an Ko: Kõnke mej eo an Jijej ear kõl̦l̦ã on̦ean jerawiwi ko ad, men in ‘ear kanemkwoj kõj im jol̦o̦k bõd ko ad.’ (Kol. 1:13, 14, UBS) Kõn men in, jemaroñ kabuñ ñan Jeova ilo juon wãween ekkar im erreo. (Hi. 9:13, 14) Jemaroñ kepaake Jeova jabdewõt iien im kõnono ippãn ilo jar. (Hi. 4:14-16) Ro otemjej rej kwal̦o̦k aer kam̦m̦oolol kõn men in Jijej ear kõm̦m̦ane, ewõr aer kõjatdikdik ñan bõk mour indeeo!—Jon 3:16.
3. Ewi wãween jemaroñ kwal̦o̦k ad kam̦m̦oolole Jeova?
3 Ewi Wãween Jemaroñ Kwal̦o̦k Ad Kam̦m̦oolol?: Ilo raan ko m̦okta jãn raan in Kwõjkwõj eo, ewõr eoon ko im em̦õj aer kajenoloki bwe jen riiti. Juon wãween jemaroñ kwal̦o̦k ad kam̦m̦oolol ej ilo ad riit im kõl̦mãnl̦o̦kjen̦ kaki eoon kein kajjojo raan. Jemaroñ jar ñan Jeova im kwal̦o̦k ad kam̦m̦oolole kõn an kar letok nejin bwe en kõl̦l̦ã on̦ean jerawiwi ko ad ikijen mej eo an. (1 Te. 5:17, 18) Jen pãd ilo iien Kwõjkwõj in bwe jen kwal̦o̦k ad kam̦m̦oolol, im pokake naan in jiroñ eo an Jijej ñan keememeje raan in mej eo an. (1 Ko. 11:24, 25) Bareinwõt, jemaroñ kajeoñwe yokwe eo el̦ap an Jeova ilo ad kũrtok armej ro joñan wõt ad maroñ ñan pãd ilo iien in.—Ais. 55:1-3.
4. Ta eo jej aikuj jek ilo bũruod bwe jen kõm̦m̦ane?
4 Armej ro doon Jeova ren jab likũt iien Kwõjkwõj eo bwe ej baj iien kweilo̦k bajjek wõt. Raan in Kwõjkwõj eo ej raan eo eaorõktata ilo kajjojo iiõ! Ke ej epaaktok raan in Kwõjkwõj eo, jen jek ilo bũruod bwe jen anõk ri jeje Sam, eo ear ba: “Kwõn nõbar Jeova O aõ, im jab mel̦o̦kl̦o̦k kõn men in kajeraam̦m̦an ko An otemjej.”—Sam 103:2.