Kememeje Binmour eo Ilo Kamolol
1, 2. Ta un ko unin ad aikwij kememeje binmour eo ilo kamolol?
1 Ilo bokake nan in kakien eo an Jesus, Ri Christian ro ibelakin lal in renaj koba ibben don elikin tulok in al ilo Saturday, March 22, 2008, ñan kememe mij eo an Jesus Christ. (Luk 22:19; 1 Kor. 11:23-26) Jej emmakit ñan kõmmane men in ilo kamolol kin aolepen men ko ear kõtõbraki ilo 1,975 yiõ ko remotlok. Ilo an debij wõt an tiljek im mij ion alal in eñtan eo, Jesus ear kokwojarjar ãt eo etan Jemen, ilo an uake nan in kinaak ko an Satan.—Job 1:11; Ken. 27:11.
2 Bõtõktõkin Jesus eo ear torlok ear kowãppen juõn bujen ekãl, im ear kamaroñ armij ro rejjab wãppen ñan erom lõmaro nejin Anij kin kejatdikdik eo ñan iroij ibben Christ ilo Ailiñ eo an ilañ. (Jerm. 31:31-34; Mark 14:24) Bareinwõt, yokwe eo emũlal an Anij ñan armij ear lukkun alikar ke ear katok kin Nejin eo elukkun yokwe, einwõt an kar Jesus make kameleleik men in ñan Nicodemus.—Jon 3:16.
3. Ewi wãwen ro rej bed ilo Kwojkwoj in Kememej eo renaj bõk tokjen jene?
3 Kirtok Ro Jet: Ad Jerbal Ñan Ailiñ Eo ilo January ear kamelele ñan kõmman juõn lajrak in etan armij ro me jaar iion ir im kirtok ir kajjojo. Emwij ke am jino kirtok ro me etair rej bed ilo lajrak eo am? Kwoj ke kõmman karõk ko ñan lukkun bõk kunam ilo jerbal in me enaj jino ilo March 1 ñan kir armij ro ñan Kwojkwoj in Kememej in? Ro rej bed ilo kwelok in renaj roñjake kamelele ko jen Bible eo me remaroñ kalaplok air tõmak ilo binmour eo, me ej tellok ñan mour indio.—Rom. 10:17.
4. Etke jej aikwij mõkajtok ñan Kwojkwoj in Kememej eo?
4 Aolep ro me ewõr air maroñ rej aikwij mõkajtok ñan karuwaineneik ro rar mõnõnõ in bõk nan in kir in eaorõk. Kinke elõñ armij rej bed ilo Kwojkwoj in, elukkun aorõk bwe jen lale wõn ro rekãl im bareinwõt ro jet me rej bed ilo kwelok ko jen ien ñan ien.
5. Ewi wãwen kwomaroñ keboj buruõm ñan ien in eaorõk?
5 Keboje Buruõm: Examining the Scriptures Daily—2008 (Etale Jeje Ko ilo Bible Ran Otemjej—2008) im 2008 Calendar (Calendar eo an 2008) rej kwalok kin lajrak in read Bible kin ien Kwojkwoj eo jino ilo March 17. Lemnak kin ien ko raorõk me rar walok ilo ran ko eliktata in mour eo an Jesus ion lal enaj jibañ yuk ñan keboj buruõm ñan ien Kwojkwoj in Kememej eo. (Ezra 7:10) Jar im kalmenlokjen kin bwebwenato kein ilo Bible enaj kamũlallok kamolol eo am kin yokwe eo an Jehovah im Nejin kin binmour eo.—Sam 143:5.
6. Ewi wãwen kalaplok kamolol eo ad kin binmour eo enaj jelet kij?
6 Ñe ebaktok ien Kwojkwoj in Kememej eo, jen keboj kij make im jibañ ro jet ñan kebojak ñan ien in eaorõk. Ñe jej kememeje binmour eo ilo kamolol enaj kabin kõtan eo ad ibben Jehovah im Nejin. (2 Kor. 5:14, 15) Enaj bareinwõt kamakit kij ñan anõk Jehovah im Jesus ilo ad kwalok yokwe eo emol ñan ro jet.—1 Jon 4:11.