Kwalok Kamolol kin Menin Letok eo Elaptata an Anij
1. Ewi un eo elap unin ar kamolol Jeova?
1 Ian ‘menin letok ko remõn’ an Jeova, binmour eo an Nejin ejitenburu iben me ear letoke ej e eo elaptata. (Jem. 1:17) Ej bõktok elõñ jerammõn ko, ekoba jeorlok bwir ko ar. (Ep. 1:7) Kin men in jej kamolol aolep ien. Ilo ien Kwojkwoj in Kememej eo, elaplok ar kõmõn ien ñõn kalomõnlokjen kin menin letok in eaurõk.
2. Ewi wãwen ar maroñ kalek kamolol kin binmour eo ilo baamle eo ar im kij mõke?
2 Kalek Ar Kamolol: Ñõn kalek kamolol eo an baamle eo am, ilo wik ko moktalok jen Kwojkwoj in Kememej eo ilo Maaj 30, etke kwojjab kajerbal Ien Kabuñ an Baamle ilo jota ñõn etale melele ko kin binmour eo? Bareinwõt baamle eo am en riiti eon ko emwij karõki ñõn kajjojo ran ilo ien Kwojkwoj in Kememej eo. Kwon kalomõnlokjen kin tokjen binmour eo ñõn yuk, wãwen ear jelet lemnok eo am kin Jeova, kin kwe mõke, ro jet im ilju eo am. Enaj emõn bareinwõt ñõn am kamelmel kin al ko ruo, al 40 im 44 me jenaj al kake ilo Kwojkwoj in Kememej eo.—Sam 77:12.
3. Ewi wãwen jemaroñ kwalok ar kamolol?
3 Nan in Kamolol Ko: Kamolol eo ar kin binmour eo ej kamakõt kij ñõn kennanek ro jet kin Jeova im yokwe eo an elap ilo an kar jilkintok Nejin. (Sam 145:2-7) Ilo Maaj, Eprõl, im Mei, jet baamle ko rej kwalok air kamolol ilo air karõke bwe juõn iair en auxiliary pioneer. Elañe kwojjab maroñ, kwomaroñ ke “wiaik ien” ñõn kalaplok ijo kwonam ilo jerbal in kwalok nan? (Epesõs 5:16) Ar kamolol enaj bareinwõt kamakõt kij ñõn jibõñ ro jet ñõn kwelok iber ilo ien Kwojkwoj eo. (Rev. 22:17) Kwon jino jei etan ro kwoj jeblak ibeir, dri katak Baibel ro am, ro nukõm, dri jerbal ro mõtõm, im ro dri turõm, inem kalaplok ijo kwonam ilo jerbal eo ejej uan ñõn kir armij ñõn Kwojkwoj in.
4. Ewi wãwen ar maroñ kajerbal ien Kwojkwoj in Kememej eo ilo meletlet?
4 Ien Kwojkwoj in Kememej eo ej letok ien ko rekãl ñõn kamol ñõn Jeova ewi joñõn ar kamolol kin menin letok eo an ñõn dri lõl. Jen kajerbal ien in ñõn kalek im kwalok ar kamolol kin binmour eo im aolep “mweiuk ko an Kraist, ko je ban bukot im loi.”—Ep. 3:8.