Kwõnaaj Ke Kortokjãn Iien in Em̦m̦an?
Iien Kwõjkwõj in Keememej eo Ej Juon Iien Epel̦l̦o̦k ñan Kwal̦o̦k Ad Kam̦m̦oolol
1. Iien Kwõjkwõj in Keememej eo ej juon iien em̦m̦an ñan ta?
1 Iien Kwõjkwõj in Keememej eo ilo Eprõl̦ 14 raan ej juon iien em̦m̦an ñan kwal̦o̦k ad kam̦m̦oolol Jeova jãn bũruod kõn men ko rem̦m̦an ej kõm̦m̦ani. Bwebwenato eo ilo bok in Luk 17:11-18 ej kwal̦o̦k bwe el̦ap an aorõk ippãn Jeova im Jijej ñe armej ro rej kwal̦o̦k kam̦m̦oolol. Ekabũrom̦õjm̦õj bwe juon wõt iaan armej ro joñoul me rar mour jãn nañinmej in lõba ear kwal̦o̦k an kam̦m̦oolol. Ilo raan ko repãd im̦aan, elõñ jeraam̦m̦an ko renaaj wal̦o̦k jãn menin letok eo an Jeova kõn an kar Jijej aje mour eo an. Ñan waanjoñak, enaaj ejjel̦o̦k bar nañinmej, im jenaaj mour ñan indeeo! Ejjel̦o̦k pere bwe jenaaj kam̦m̦oolol Jeova raan otemjej kõn jeraam̦m̦an kein. Ak ewi wãween ad maroñ kwal̦o̦k ad kam̦m̦oolol ilo wiik ko m̦okta jãn Kwõjkwõj eo?
2. Ta eo emaroñ jipañ kõj ñan kal̦apl̦o̦k ad kam̦m̦oolol kõn an kar Jijej aje mour eo an kõn kõj?
2 Kam̦m̦oolol jãn Bũruod: El̦ap ad kam̦m̦oolol jãn bũruod el̦aññe em̦m̦an men ko jej l̦õmn̦aki. Ta eo emaroñ jipañ kõj ñan kal̦apl̦o̦k ad kam̦m̦oolol kõn an kar Jijej aje mour eo an kõn kõj? Ej ilo ad riiti eoon ko kõn men ko me rar wal̦o̦k ñan Jijej m̦okta im ãlikin an kar mej. Jemaroñ loe laajrak in eoon kein ilo elõñ jikin ko. Ñan waanjoñak, jemaroñ loe ilo bok eo etan Liñõri Baibõl̦ Raan Otemjej, im ilo Kõl̦õn̦ta eo an 2014. Em̦m̦an ñe kwe im baam̦le n̦e am̦ kom̦ij etali men kein ippãn doon. Ilo ad kõm̦m̦ane men in, enaaj l̦apl̦o̦k ad kam̦m̦oolol kõn an kar Jijej aje mour eo an. Innem, ñe el̦apl̦o̦k ad kam̦m̦oolol, enaaj em̦m̦an kõm̦m̦an ko ad.—2 Ko. 5:14, 15, UBS; 1 Jon 4:11.
3. Ta ko jemaroñ kõm̦m̦ani ñan kwal̦o̦k ad kam̦m̦oolol ilo M̦aaj, Eprõl̦ im Mãe?
3 Kwal̦o̦k Ad Kam̦m̦oolol: Kõm̦m̦an ko ad rej kaalikkar bwe el̦ap ad kam̦m̦oolol. (Kol. 3:15) Ke Jijej ear kõmour 10 em̦m̦aan ro jãn nañinmej in lõba, juon wõt iaaer ear kwal̦o̦k an kam̦m̦oolol. Kõn an kar l̦ap an kam̦m̦oolol kõn men eo Jijej ear kõm̦m̦ane ñane, ear pukotl̦o̦k Jijej im kam̦m̦oolole. Ejjel̦o̦k pere bwe em̦m̦aan in ear bar kwal̦o̦k an kam̦m̦oolol ilo an kõnnaan ñan ro jet kõn an kar Jijej kõmouri jãn nañinmej eo an. (Lk. 6:45, UBS) El̦ap ad kam̦m̦oolol kõn an kar Jijej aje mour eo an kõn kõj. Men in enaaj ke kõm̦akũt kõj ñan niknik ilo ad leto letak peba in kũr ko ñan armej ro bwe ren itok ñan Iien Kwõjkwõj eo? Bar juon men jemaroñ kõm̦m̦ane ñan kwal̦o̦k ad kam̦m̦oolol ej ilo ad auxiliary pioneer ak kal̦apl̦o̦k ijo kun̦aad ilo jerbal in kwal̦o̦k naan ilo allõñ in M̦aaj, Eprõl̦, im Mãe. Ilo boñõn Kwõjkwõj eo, jemaroñ kwal̦o̦k ad kam̦m̦oolol ilo ad karwaineneik ro me renaaj kobatok im pojak in uwaaki kajjitõk ko aer.
4. Ta eo jemaroñ kõm̦m̦ane bwe jen jab ajl̦o̦k ãlikin Iien Kwõjkwõj eo?
4 Eñin ke Iien Kwõjkwõj eo ad ãliktata? (1 Ko. 11:26) Jejaje. Bõtab, jejel̦ã bwe Iien Kwõjkwõj eo ej juon iien ejej uwaan im epel̦l̦o̦k ñan ad kwal̦o̦k ad kam̦m̦oolol. Kwõnaaj ke kortokjãn iien in em̦m̦an? Jen kwal̦o̦k ad kam̦m̦oolol Jeova ilo naan ko ad im ilo ad kõl̦mãnl̦o̦kjen̦ kõn an kar kõm̦m̦ane karõk in bwe Jijej en aje mour eo an kõn kõj. Jeova enaaj m̦õn̦õn̦õ ñe jej kõm̦m̦ane men in.—Sam 19:14, UBS.