Kabuñ ñan Jehovah einwõt juõn Family
1 Ilo ien ko an Bible, ro uan family eo rar kõmman elõñ men ko ibben don. Ekkã air kar kõmman jerbal ko jen ran ñan ran, im men eo eaorõktata ej bwe rar kabuñ ñan Jehovah einwõt juõn family. (Liv. 10:12-14; Dut. 31:12) Rainin, ilo elõñ jikin ko, eiet men ko ro uan family eo rej kõmmani ibben don. Bõtab, Ri Christian ro rej kile aorõkin air bõk kunair ilo jerbal ko einwõt juõn family, elaptata ñe ej jelet air kabuñ. Ejelok bere bwe men in ej kabuñburuen eo ej Unjen mour in family kin an lo bwe family ko rej kabuñ ñan e ilo juõn wõt buru!
2 Kwalok Nan Ibben Don: Jerbal ibben don ñan kwalok kin news eo emõn ej kakajur kõtan eo an juõn family. Kin men in, ijellokin an jerbal ibben ro jet ilo congregation eo ilo jerbal in kwalok nan, juõn elder enaj bareinwõt keini an jerbal ibben lio belen im ajiri ro nejin. (1 Tim. 3:4, 5) Meñe relukkun boub ilo jerbal eo air, overseer ro rej itoitak rej bareinwõt karõk ien ñan air jerbal ibben ro beleir ilo jerbal in kwalok nan.
3 Ro jemen im jinen me rej kwalok nan ibben ajiri ro nejiir rar maroñ jibañ ir ñan kõmman wõnmanlok einwõt ri evanjel ro. Ajiri ro renaj kile lañliñ im juburu eo an ro jemeir im jineir ilo jerbal in kwalok nan im bareinwõt yokwe eo air ñan Jehovah im ro ri turiir. (Dut. 6:5-7) Aorõkin air kwalok nan ibben ro nejiir ejjab diklok ke ajiri ro rej rittolok. Ruo ri belele ro me ewõr jilu nejiir likao rej bed ikõtan 15 im 21 yiõ dettair rar wõnmanlok im keini air jerbal ibbeir ilo jerbal in kwalok nan. Jemeir ear ba: “Jej katakin ir juõn men eaorõk kajjojo ien. Im jej kõmman bwe en juõn ien emõn im kakajuror.”
4 Kebojak Ibben Don: Family ko rar kile bwe ewõr tokjen ko remõn ñan air kebojak ibben don ilo jerbal in kwalok nan. Ekkã an ajiri ro kõnan kamelmel ibben ro uan family eo air im rej kajjojo air kwalok kilen kõmman ennan ak jutak einwõt juõn ri mweo. Jet rej kajerbal jejjo minute ko elikin an family eo katak ibben don ñan kamelmel kin men in.
5 Mõnõnõ eo ad ej laplok ñe jej bõk kunad ilo jerbal ko raorõk im kajuburu ibben ro jej yokwe. Ej juõn men ekamõnõnõ ñan ro uan family eo ñan air jerbal ibben don ilo jerbal in kwalok nan jen em ñan em im bareinwõt kõmman bar jeblak ko im katakin armij ro jet kin Bible! Ilo am kabuñ ñan Jehovah ibben family eo am, kwomaroñ lañliñ im ba: “Kin ña im ro nuku, kim naj jerbal ñõn Jeova.”—Josh. 24:15.