Kããlõt ñan Rejetake Aelõñ eo an Anij Kiiõ!
Pijaikl̦o̦k m̦õk an juon ko̦to el̦ap im ekauwõtata ej kaiokl̦o̦k ijo kwõj jokwe ie. Ri-jerbal ro an kien rej kõm̦m̦an kõjjel̦ã ilo aer kakkõl armej ro im ba: “KOM̦WIN KO! KAPPOK JIKIN KONE KIIÕ!” Ta men eo emãlõtlõt kwõn kar kõm̦m̦ane? Ejjel̦o̦k pere kwõnaaj kappok juon jikin enaaj kõjparok eok jãn jorrããn.
Ilo bar juon wãween, kõj aolep jej pãd ilo ijo me enaaj wõr juon “l̦añ” me el̦apl̦o̦k an kauwõtata, me Jesus ear n̦aetan “iien eñtaan el̦ap.” (Matu 24:21) Jejjab maroñ ko jãn iien eñtaan eo el̦ap. Bõtab jemaroñ kõm̦m̦ane juon ñan kõjparok kõj make. Ta in?
Ilo Katak eo an ioon Tol̦ eo, Jesus Christ ear lel̦o̦k naanin tõl in im ba: “Kom̦win wõnm̦aanl̦o̦k wõt im pukot m̦okta Aelõñ eo im men ko rejim̦we im̦aan mejãn Anij.” (Matu 6:33) Ewi wãween ad kõm̦m̦ane men in?
Pukot m̦okta Aelõñ eo an Anij. Mel̦el̦ein men in bwe jej aikuj watõk bwe Aelõñ eo an Anij ej men eo aorõktata jãn jabdewõt men. (Matu 6:25, 32, 33) Etke jej aikuj bõk l̦õmn̦ak rot in? Kõnke armej ro rejjab maroñ kõm̦adm̦õdi apañ ko aer. Aelõñ eo wõt an Anij emaroñ kõm̦adm̦õdi apañ kein repen.
Pukot men ko rejim̦we im̦aan mejãn. Jej aikuj lukkuun kate kõj ñan mour ekkar ñan kien ko an Anij im naanin kakapilõk ko an. Etke? Kõnke ñe jej kõm̦m̦an ad make pepe kõn ta eo em̦m̦an im ta eo enana, men ko renana renaaj wal̦o̦k tokãlik. (Jabõn Kõnnaan 16:25) Ak ñe jej mour ekkar ñan kien ko an Anij, jejjab kabuñbũruon wõt Anij ak jej bar bõk tokjãn ñan kõj make.—Aiseia 48:17, 18.
Wõnm̦aanl̦o̦k wõt im pukot m̦okta Aelõñ eo an Anij im men ko rejim̦we im̦aan mejãn. Jesus ear kakkõl im ba bwe jet renaaj m̦ad im l̦õmn̦ak bwe remaroñ lo aer jokwane ilo aer kate er joñan wõt aer maroñ bwe en lukkuun lõñ aer jããn. Ro jet remaroñ kõtl̦o̦k bwe ren m̦ad im poub kõn inepata ko an mour in, joñan, ejjel̦o̦k aer iien ñan pukot m̦okta Aelõñ eo an Anij.—Matu 6:19-21, 25-32.
Bõtab Jesus ear kallim̦ur bwe ro rej rejetake Aelõñ eo an Anij enaaj wõr ippãer men ko rej aikuji kiiõ im m̦õn̦õn̦õ kõn jeraam̦m̦an ko ñan indeeo ilo ilju im jekl̦aj.—Matu 6:33.
Meñe ri-kal̦oor ro an Jesus rar pukot m̦okta Aelõñ eo an Anij ilo tõre ko aer im kõm̦m̦ani men ko rejim̦we im̦aan mejãn, ak rar jab lo jem̦l̦o̦kin aolep apañ im inepata ko ilo tõre ko rar mour. Bõtab kar kõjparok er. Ewi wãween?
Rar mour ekkar ñan kien ko rejim̦we an Anij, im men in ear kõjparok er jãn apañ ko reppen me ro jet rej eñtaan kaki kõn aer kar jab roñjake men ko Anij ear ba. An kajoor tõmak eo aer bwe Aelõñ eo enaaj itok, ear jipañ er ñan kijenmej meñe rej iioon apañ ko rel̦l̦aptata ilo mour. Im Anij ear lel̦o̦k ñan er “kajoor eo . . . el̦ap jãn joñan” bwe ren maroñ kijenmej.—2 Korint 4:7-9.
KWÕNAAJ KE PUKOT M̦OKTA AELÕÑ EO?
Kũrjin ro ilo tõre ko an rijjilõk ro rar pokake kien eo an Jesus ñan pukot m̦okta Aelõñ eo. Rar kwal̦o̦k kõn ennaan eo em̦m̦an ilo ijoko otemjej rej pãd ie ilo lal̦ in. (Kolosse 1:23) Ewõr ke jabdewõt ej kõm̦m̦ane men in raan kein?
Aet! Ri-Kõnnaan ro an Jeova rej kile bwe m̦õttan wõt jidik Aelõñ eo an Anij enaaj bõktok jem̦l̦o̦kin jukjukun pãd in. Kõn men in, rej lukkuun kate er ñan mour ekkar ñan naan ko an Jesus, ej ba: “Naaj kwal̦o̦k ennaan eo em̦m̦an kõn Aelõñ eo ipel̦aakin lal̦ in bwe aolep armej ren roñ, innem ej kab naaj itok jem̦l̦o̦kin.”—Matu 24:14.
Enaaj ewi wãween am̦ em̦m̦akũt kõn ennaan eo em̦m̦an? Kõmij lukkuun rõjañ eok bwe kwõn anõke armej ro ilo tõre ko an rijjilõk ro me rar jokwe ilo juon bukwõn ilo Masedonia etan Beria. Ke rar roñ ennaan eo em̦m̦an kõn Aelõñ eo jãn rijjilõk Paul, rar “lukkuun m̦õn̦õn̦õ” in roñjake ennaan eo an. Innem rar “kanooj etale Jeje ko” ñan kam̦ool men ko rar roñ innem rar jerbali men ko rar katak.—Jerbal 17:11, 12.
Kwõmaroñ kõm̦m̦ane ejja wãween in wõt. Ej ilo am̦ pukot m̦okta Aelõñ eo im men ko rejim̦we im̦aan mejãn Anij, kwõnaaj lo am̦ jikin kone im bõk kõjparok kiiõ im kwõnaaj m̦õn̦õn̦õ im lo aenõm̦m̦an im jokwane ñan indeeo ilju im jekl̦aj.