Wãween Kõjerbal Bok eo Etan “Pãd Wõt ilo Yokwe eo an Anij”
1. Ewi wãween an bok eo etan “Pãd Wõt ilo Yokwe eo an Anij” jipañ kõj?
1 Jelukkuun kar m̦õn̦õn̦õ ke jaar bõk bok eo ekããl etan “Pãd Wõt ilo Yokwe eo an Anij”! Bok in eoktak jãn bok in katak ko jet. Etke? Kõnke bok in katak ko jet rej jipañ armej ro ñan jel̦ã kõn katak ko jej tõmaki me rej itok jãn Baibõl̦. Bõtab, bok in ekããl ej jipañ kõj ñan jel̦ã ta ko jemaroñ kõm̦m̦ani bwe Jeova en buñbũruon ippãd im jen erreo wõt im̦aan mejãn. Eñin unin, jeban leto letak bok in ñe jej kwal̦o̦k naan jãn em̦ ñan em̦.
2. Ewi wãween ad kõjerbal bok in ekããl im jej katak kake ippãn wõn?
2 Jej kõjerbal bok in ekããl ñan katak ippãn rũkkatak ro ad ãlikin wõt aer kadedel̦o̦k bok eo etan Katak ko Rem̦ool. Wãween ad katak kake bok in ej ãinl̦o̦k wõt wãween ad katak kake bok eo Katak ko Rem̦ool. Ñan waanjoñak, ñe jej katak kõn bok kein ippãn rũkkatak ro ad, ej ad make pepe ñe jekõn̦aan etale ippãer kõmel̦el̦e ko jet ilo peij ko ãliktata in bok kein. Keememej bwe rũkkatak ro ad reoktak jãn doon. Jet em̦õkaj aer jel̦ã im l̦oori men ko rej katak kaki. Ak ro jet emaroñ rum̦wij aer jel̦ã im l̦oori men ko rej katak. Kõn men in, ñe kwõj katak ippãn rũkkatak ro am̦, kwõn keememej joñan maroñ ko aer. Men eo eaorõk ej bwe ren lukkuun mel̦el̦e men ko rej katak kaki. Ak ta kõn armej ro me rar katak m̦okta im kam̦õj elõñ iaan bok ko ad bõtab rejjab kweilo̦k im rejjab kõm̦m̦an oktak ko ilo mour ko aer? Eokwe, jejjab bar jino katak ippãn armej rein kõn bok in.
3. Ta eo jej aikuj kõm̦m̦ane ñe juon iaan rũkkatak ro ad ej peptaij m̦okta jãn an kadedel̦o̦k bok ko ruo etaer Katak ko Rem̦ool im “Pãd Wõt ilo Yokwe eo an Anij”?
3 Ta ñe juon iaan rũkkatak ro am̦ ej peptaij m̦okta jãn an kadedel̦o̦k bok ko ruo etaer Katak ko Rem̦ool im “Pãd Wõt ilo Yokwe eo an Anij”? Eokwe, kwõj aikuj wõnm̦aanl̦o̦k wõt im katak ippãn m̦ae iien ededel̦o̦k aolep bok kein ruo. Meñe em̦õj an rũkkatak in am̦ peptaij, ak kwõmaroñ bwine awa ko kwõj katak ippãn. Kwõmaroñ bareinwõt bwine jete alen am̦ jepl̦aak im katak ippãn, im likũti ãinwõt juon rũkkatak ilo ripoot eo am̦ kajjojo allõñ. Ri kwal̦o̦k naan ro me rej iwõj ippam̦ ilo iien ko kwõj katak ippãn rũkkatak in am̦ remaroñ bar bwini awa ko aer.
4. Ewi wãween ad kõjerbal bok eo “Pãd Wõt ilo Yokwe eo an Anij” ñan katak ippãn juon eo me ejjab kwal̦o̦k naan elõñl̦o̦k jãn 6 allõñ?
4 Jet iien, kumi in em̦m̦aan ro me rej kõm̦m̦ani jet pepe ko ilo eklejia eo rej kajjitõk ippãn juon iaan ri kwal̦o̦k ro bwe en katak ippãn juon eo me ejjab kwal̦o̦k naan elõñl̦o̦k jãn 6 allõñ. Ñe em̦m̦aan rein rej kajjitõk bwe kwõn katak ippãn armej eo, remaroñ bar kwal̦o̦k waj katak ta ko kwõmaroñ etali ippãn ilo bok eo “Pãd Wõt ilo Yokwe eo an Anij”. Meñe kwõnaaj katak ippãn armej in, ak eban aetok kitien am̦ katak ippãn. Ej juon jeraam̦m̦an bwe ewõr bok in ekããl ippãd. Bok in enaaj jipañ kõj aolep ñan “pãd wõt ilo yokwe eo an Anij”!—Jud 21, UBS.