Kajerbal Buk ko Ar ilo Jime
1. Ewi wãwen ar maroñ anõke joñok eo an Jisõs kin an kamolol kin menin letok ko an Jeova?
1 Elikin an kar Jisõs najirik juõn jarlepju in armij ilo kabwilõñlõñ, ear jiroñ ir bwe ren kejbãrok bween mõña ko. (Matu 14:19-21) Kamolol rot in kin menin letok ko an Jeova ej juõn joñok emõn ñõn kij bwe jen ‘kwalok ar kamolol’ ilo ar kajerbal aolep menin letok ko an ikijen dri korijer eo etiljek.—Kol. 3:15; Matu 24:45-47; Luk 12:42.
2. Ta eo jemaroñ kõmõne bwe en jab lõñlok buk ko etto air ber?
2 Buk Ko: Ebiruru an ejoujik buk kein Imõniaroñroñ im Ruj! (ejelok ilo kajin Majõl) elañe jejjab lelok ñõn armij. Elañe ekkã an or bween buk kein iber, jen kadriklok joñõn eo jej bõke. Jenaj it kin buk ko etto air ber? Aurõkin buk kein ejjab driklok kinke emotlok aliñ ko air. Elañe elõñ buk kein iber, bwelen service overseer eo ak bar juõn elder emaroñ jibõñ kij ñõn kortokjeir.
3, 4. Ta men ko jen kememeji ñe jej bõk buk ko ilo Kingdom Hall?
3 Buk ko Jet: Ñe eoktõk buk in lelok eo, kwon lale mokta elañe eor buk in imweo imõm mokta jen am bar bõk buk ko jen Kingdom Hall eo. Kwon lale bwe kwon bõk joñõn eo wõt kwoj aikwiji ilo wik eo, im bar bõk buk ko ñe remaat.
4 Kin buk ko kwonaj mõke kajerbali, kwon kajitõk kin joñõn eo wõt kwoj aikwiji. Je etam im ijo kwoj jokwe ie ilo lain eo emwij karõke iloan buk eo. Am eindrein enaj kõmõn bwe en biruru air karolwõj buk eo elañe kwoj luji. Elañe kwoj kajerbale Library an Imõniaroñroñ eo ilo CD-ROM (ejelok ilo kajin Majõl) im kwar kejbãrok buk ko am mõke, kwomaroñ jab aikwij bõk Imõniaroñroñ im Ruj! an juõn yiõ eyu me rar kakobaiki ñõn erom juõn buk. (ejelok ilo kajin Majõl)
5. Ta ko jen kememeji ñe jej likit buk ko ar iben armij ro?
5 Lelok Buk Ko: Jekõnan lelok buk ko ñõn ro wõt im emol air kwalok air itoklimo. Kememej bwe ej kwonad ñõn bõk erron wõnan buk kein raurõk ilo ar jerbal in kwalok nan. Ñe jej likit juõn buk iben ro im eor air itoklimo, jab ãliklik in kejelaik ir bwe mõnõnõ in lelok jibõñ kin jerbal eo ibelakin lõl ebellok ñõn ir ikijen jabawõt ko air.
6. Etke elap ar kaurõk buk ko ar, inem en kar ewi wãwen ar kajerbali?
6 Ikijen menin bwilõñ ko, Jisõs ear najirik elõñ armij kin ekan ko ilo kõniek, ak ear laplok an najirik ir kin ekan ko ilo jitõb. Jisõs ear ba: “Armij e jamin mour kin bred wõt, a kin nan otemjej rej waloktok jen loñin Anij.” (Matu 4:4) Buk ko ar rej kwalok mol ko jen Baibel, ko raurõk ñõn bõk mour in drio. (Jon 17:3) Joñõn air aurõk, jejjab kõnan jerwani!