Nan in Jiroñ ko ñõn Ro Rej Kwalok Katak ko ilo Kwelok in Ar Jerbal ñõn Ailiñ Eo
Jino jen Ar Jerbal Ñõn Ailiñ in, emwij ukot lajrõk in katak ko ilo kwelok in. Naj kalikarlok nan in jiroñ ko im kakememej ko kar kwalok kaki ilo katak eo etan “Wãwen Kapojõk ñõn Kwelok in Ar Jerbal ñõn Ailiñ Eo” ilo kar Ar Jerbal Ñõn Ailiñ Eo an Mei 2009.
◼ Katak: Men in ej jitõñlok ñõn juõn katak im ej berber ion melele ko kar karõk ñõn kwalok katak in jeni im dri roñjake ro rejjab bõk kwonair ie. Dri konono eo ej aikwij lemnok kin ta eo emaroñ lukkun jibõñ congregation eo.
◼ Kajitõk im Uak: Ejja einlok wõt Katak in Imõniaroñroñ eo, katak in eor nan in jino im kajemlok ko rekaru, im eor kajitõk ko ñõn pãrokõrããp ko kajjojo. Eo ej tel katak eo en bõprae an kwalok kemelele ko ilo aitok. Elañe eor ien, armij ro remaroñ riiti eon ko raurõk. Jab riiti pãrokõrããp ko elañe ejelok nan in jiroñ ko ñõn kõmõne men in.
◼ Bwebwenato: Eor jidrik kwonan dri kwelok ro ilo katak in. Ejjab baj juõn katak wõt, im ejjab walok wõt ilo kajitõk im uak.
◼ Wanjoñok im Kajitõk ko ñõn Dri Kwalok Ro: Nan in jiroñ ko kin wanjoñok ej melelen bwe brother eo ej tel katak eo ej aikwij karõk iben dri kwalok ro ñõn kwalok juõn wanjoñok. Ro ej kãlet ir ñõn jibõñ e rej aikwij ro rekabel im emõn joñok ko air, im ej aikwij kõmõn karõk ibeir lok iman. Meñe kwokõnan lelok kwonair, ak emõnlok kwon jab kajerbal dri kwalok ro rekãl im ejelok air iminene ñõn kwalok kilen kõmõne jerbal in kwalok nan, bõtab kwomaroñ kajerbal ir einwõt dri mweo. Dri kwalok nan ro im rej kwalok wanjoñok eo rej aikwij jellok ñõn dri kwelok ro. Ro rej kajerbal ir ñõn kwalok kajitõk ko ñõn ir rej aikwij kwalok bwebwenato ko air ijo iman ijellokin air kwaloki jen ijo rej jijõt ie. Ej menin aikwij ñõn kamelmel iben dron kin wanjoñok ko im kajitõk ko ñõn dri kwalok ro. Elañe emotlok auõ im juõn brother ej aikwij kakarulok katak eo an, ej aikwij bõprae bwe en jab jolok wanjoñok ko im kajitõk ko ñõn dri kwalok ro. Ministerial servant ro rej aikwij lale iben elder eo ej karõk jerbal ko an kumi in elder ro ak bar juõn elder mokta jen an kãlet ro renaj bõk kwonair.
Elañe eor nan in jiroñ ko kin juõn katak ekanuij aurõk im ejejuan, ej menin aikwij ñõn lukkun lore nan in jiroñ kein. Ilo an brother ro kwalok katak ko ilo Kwelok in Ar Jerbal ñõn Ailiñ Eo im lore lajrõk eo emwij kwalok kake ilõñ, renaj bõk kwonair ñõn kõmõn bwe men otemjej ilo Kwelok in Ar Jerbal ñõn Ailiñ eo ren walok ilo “ekar im ilo lajrõk.”—1 Kor. 14:40.