Wãwen Kapojõk ñõn Kwelok in Ar Jerbal ñõn Ailiñ Eo
1. Ta unleplep eo kin Kwelok in Ar Jerbal ñõn Ailiñ Eo, im ewi wãwen jemaroñ bõk elap tokjen jene?
1 Kwelok in Ar Jerbal ñõn Ailiñ Eo emwij karõke bwe jen lo tõbrõk ilo ar kwalok nan. Unleplep eo ej ñõn kwalok kin Ailiñ in Anij, kõmõn dri kaloran Jisõs, im kejelaik aolep kin ekajet eo ekwojarjar eo ej itok wõt. (Matu 28:20; Mark 13:10; 2 Pit. 3:7) Elap ar bõk tokjen kwelok in ñe emol ar kapojõk im mõnõnõ in bõk kwonad.
2. Ewi wãwen jemaroñ kapojõk ñõn roñjake juõn katak?
2 Katak: Enañin aolep ien, berber in katak eo ealikar ilo nan in jiroñ ko ñõn eo ej konono. Kwomaroñ eliji katak kein, kobaik eon ko rej walok ak ejjab walok kobbair, im mõke lemnok kin wãwen melele kein remaroñ jibõñ yuk ilo am jerbal in kwalok nan.
3. Ta eo jemaroñ kõmõne bwe jen pojõk kin katak ko ikijen kajitõk im uak?
3 Kajitõk im Uak: Katak in naj kwaloke ilo wãwen lok wõt Katak eo kin Imõniaroñroñ eo, im en karu nan in kebellok im kajemlok ko. Kakõleiki melele ko relap ilo kajjojo pãrokõrããp ko, im pojõk in uak ilo melak im jab aitok.
4. Ewi wãwen jemaroñ kapojõk kin katak ko im eor kwonan dri kwelok ro ie?
4 Katak ko im Eor Kwonan dri Kwelok ro Ie: Katak in enaj walok einwõt juõn katak in kemelele, ak dri konono eo enaj kir ro uan dri kwelok ro bwe ren bõk kwonair ie. Elañe kwoj kakõleiki melele ko relap im mõke etale eon ko emwij jeje, kwonaj maroñ uak kajitõk ko ñe dri konono eo ej kajitõk kaki. Eo jeer im jãter im ej bõk erron katak in enaj kõnan kõtlok bwe dri kwelok ro ren bõk kwonair im uak.
5. Ta eo enaj jibõñ kij ñõn lukkun bõk tokjen jen joñok ko kin kilen kwalok?
5 Kilen Kwalok Ko: Enaj or kilen kwalok ko rekkar ñõn kwalok wãwen jemaroñ kajerbale katak eo ilo jikin eo jej kwalok nan ie. Naj kajitõk iben elder ro ak dri kwalok ro im eor air iminene ak pioneer ro bwe ren bõk kwonair. Kwonam ilo ien kein emaroñ kitibuj am lemnok kin ewi wãwen air naj kwalok joñok in. Ñe rej kwalok juõn joñok ilo Ar Jerbal Ñõn Ailiñ Eo, kwon lemnok kin wãwen am naj kajerbale im karõke ekkar ñõn kajjojo dri mweo. Lale bwe buk eo ak magazine eo naj kajerbale ilo ien kwelok eo en ber ibõm. Joten eo komij kõmõn ami Ien Kabuñ an Baamle emaroñ ien eo emõn ñõn ami kamelmel kin jet ian joñok kein.
6. Ta jet ian un ko bwe jen kapojõk ñõn Kwelok in Ar Jerbal ñõn Ailiñ Eo?
6 Elaplok ar naj mõnõnõ kin Kwelok in Ar Jerbal ñõn Ailiñ Eo elañe jej mõke kapojõk im reimanlok ñõn katak ko remõn im renaj walok. Ar eindrein enaj kalaplok ar maroñ kõkãtõk dron. (Rom. 1:11, 12) Elañe emõn ar kapojõk kin Kwelok in Ar Jerbal ñõn Ailiñ Eo, enaj emõnlok ar pojõk ñõn kajejit jerbal in kwalok nan eo ar.—2 Tim. 3:17.