Jeova Ej Katakin Kõj ñan Jerbal In
1. Ta eo Jeova ej bar kõm̦m̦ane ñe ej lel̦o̦k jerbal ñan juon armej?
1 Ñe Jeova ej lel̦o̦k jerbal ñan armej ro ej bareinwõt lel̦o̦k jipañ bwe ren maroñ in kõm̦m̦ane jerbal eo. Ñan waanjoñak, Jeova ear ba ñan Noa bwe en kalõk wa eo, juon men me Noa ejañin kar kõm̦m̦ane m̦oktal̦o̦k. Ak ñan jipañ Noa, Jeova ear bar kwal̦o̦k ñan e kilen kõm̦m̦ane wa eo. (Jen. 6:14-16, UBS) Jeova ear jiroñ Moses bwe en kõnnaan ippãn alab ro an Israel im Pero. Bõtab Jeova ear bareinwõt kallim̦ure im ba: “Inaaj ilo lo̦ñiim̦, im naaj katakin eok ta eo kwõnaaj ba.” (Ex. 4:12) Ejjel̦o̦k oktak ilo raan kein ad. Jeova ej bar letok jipañ im katakin kõj kilen kõm̦m̦ane jerbal in kwal̦o̦k naan. Ewi wãween ej katakin kõj? Ej ikijjeen Jikuul̦ in Kwal̦o̦k Naan im Kweilo̦k in Ad Jerbal ñan Aelõñ Eo. Ta ko jemaroñ kõm̦m̦ani bwe en l̦apl̦o̦k ad bõk tokjãn ko rem̦m̦an jãn kweilo̦k kein?
2. Ta ko jemaroñ kõm̦m̦ani bwe jen bõk tokjãn jãn Jikuul̦ in Kwal̦o̦k Naan?
2 Jikuul̦ in Kwal̦o̦k Naan: Kapojakl̦o̦k im̦aan aolep katak ko me renaaj wal̦o̦k ilo kweilo̦k in Jikuul̦ in Kwal̦o̦k Naan. Innem ñe kwõj lo wãween an ri jikuul̦ ro kõm̦m̦ane katak ko aer, enaaj kal̦apl̦o̦k am̦ jel̦ã kilen katakin ro jet. (JK. 27:17, UBS) Bõtab wãween eo em̦m̦antata bwe kwõn bõk tokjãn jãn jikuul̦ in ej bwe kwõn bõk kun̦aam̦ ilo jikuul̦ eo. Em̦õj ke am̦ kadel̦o̦ñ etam̦ ilo jikuul̦ eo? Ñe ewõr am̦ katak, kanooj kapoje m̦oktal̦o̦k im jerbale naan in rõjañ ko jãn eo im ej tõl jikuul̦ eo. Im ilo iien eo kwõj kwal̦o̦k naan, jerbale men ko kwaar katak jãn jikuul̦ eo.
3. Ta ko jemaroñ kõm̦m̦ani bwe jen bõk tokjãn jãn Kweilo̦k in Ad Jerbal ñan Aelõñ Eo?
3 Kweilo̦k in Ad Jerbal ñan Aelõñ Eo: El̦aññe jej riiti katak ko im kapoji uwaak ko ad m̦okta jãn kweilo̦k eo, enaaj pidodol̦o̦k ad keememej naan in rõjañ ko me rej kwal̦o̦k ilo iien kweilo̦k in. Enaaj lõñl̦o̦k ro rej uwaak ñe enaaj kadu uwaak ko ad kajjojo. Ñe ewõr waanjoñak ko kõn kilen kwal̦o̦k naan, lukkuun roñjake wãween aer kõm̦m̦ane. Ilo iien eo kwõj kwal̦o̦k naan kajjioñ in jerbale wãween kein. Men in enaaj kal̦apl̦o̦k am̦ kapeel ilo jerbal in kwal̦o̦k naan. Jouj im kakon̦e Ad Jerbal ñan Aelõñ Eo an kajjojo allõñ bwe kwõmaroñ bar kõjerbale ilo raan ko im̦aan.
4. Etke jej aikuj kortokjãn aolep kein jipañ ko Jeova ej litoki ñan katakin kõj?
4 Jerbal in kwal̦o̦k naan eo ad rainin ejjab pidodo ãinwõt kar jerbal ko an Noa im Moses. (Matu 24:14) Bõtab jemaroñ lo tõprak el̦aññe jenaaj lõke Jeova im kõjerbale aolep kein jipañ ko ej litoki ñan katakin kõj kilen kwal̦o̦k naan.—Ais. 30:20, UBS.