Bõk Tokjen Jen 1999 Program in Theocratic Ministry School
1 Jesus kar Ri Kaki eo Elap. Armij rar “bwilõñ kin An nan in katak.” (Mark 1:22) Meñe ejelok juõn iad jemaroñ konono im katakin ilo joñan emõnin einwõt kar Jesus, jemaroñ kate kij ñan kajeoñe e. (Jerbal 4:13) Ñan kõtõbrak men in, ad bõk kunad ilo program in Theocratic Ministry School naj jibañ kij ñan kakõmõnmõnlok maroñ ko ad ñan konono im katakin.
2 Ilo 1999, Katak No. 1 naj wawa ion katak ko jen 1997 Watchtower im Awake! magazine ko. Melele eo ad kin men ko lor jitõb naj laplok elañe jej read lok iman kin kamelele in inem roñjake ilo program in school eo. Ro kar karõk ir ñan kwalok katak in ren jerbale ilo juõn wãwen ekeie, im kwaloke ilo juõn wãwen ekaitoktoklimo im emourur. Katak No. 3 naj wawa ion Family Happiness book eo, im Katak No. 4 naj wawa ion juõn armij ilo Bible eo, meñe unjen katak eo emaroñ ukoktak ilo katak kein. Eo ej tel school eo en lukkun lale katak eo mokta jen ej karõke ñan armij. Aolep ro rej kwalok kamelele ko jen Family Happiness book eo en juõn joñok emõn ilo mour in family eo an make.
3 Jerbale Nan in Kakabilek, im Kebojak ilo Emõn: Aolep remaroñ kakõmõnmõnlok maroñ eo air ñan konono im katakin. (1 Tim. 4:13) Kin men in, jej aikwij mõnõnõ in bõk nan in kakabilek im jab watõke einwõt juõn men jekõnan bõprae. (Jabõn Kennan 12:15; 19:20) Kwalok mol eo ilo bolemen ilo kwelok ko im ilo jerbal in kwalok nan ej aikwij elaplok jen ad baj kwalok mol ko ak ñan konono eon ko. Jej aikwij tõbar buruen armij im kamakit ro rej roñjake. Jemaroñ kõmman men in ilo ad konono kake mol eo ilo juõn wãwen ekareelel jen buruõd. (Keidi Jerbal 2:37.) Nan in kakabilek eo jej bõke jen school eo enaj jibañ kij ñan kõtõbrak men in.
4 Ilo ien eo wõt kwoj bõk katak eo, lemnak kin kadkad in wãwen konono eo kwoj aikwij jerbali einwõt kar kamelele kake ilo School Guidebook eo. Lemnak kin ta eo kwoj aikwij kõmmane ñan jerbale kakabilek eo kwar bõke mokta. Kalmenlokjen kake unin tel in katak eo am, setting eo kwonaj kajerbale elañe ej juõn men in aikwij, im ewi wãwen kwonaj jerbale eon ko rej walok ilo katak eo am. Lemnak kin wãwen eo emõntata ñan kajerbal kamelele eo ñan katakin im ñan kamakit ro jet.—1 Tim. 4:15, 16.
5 Elañe kwoj mijak in kadeloñ etõm ilo school eo, jar kake im konono ibben eo ej lale school eo kin eñjake ko am. Aolep remaroñ bõk tokjen jen program eo me enaj walok ilo Theocratic Ministry School eo ilo 1999.