Men eo Eaorõktata im Ej Aikuj Wõr Ippãn eo Ej Katakin Armej kõn Baibõl̦
1. Ta men eo eaorõktata im ej aikuj wõr ippãn juon eo em̦m̦an an katakin ro jet kõn Baibõl̦ eo?
1 Ta eo ej kõm̦m̦an bwe juon armej en juon eo ejel̦ã katakin ro jet kõn Baibõl̦ eo? Jet armej el̦ap aer kapeel kõnke rar etal ñan jikuul̦ ko. Bar jet eto aer pãd ilo m̦ool eo. Ro jet rar baj jel̦ã wõt kilen kõnnaan im epidodo aer katak ippãn armej ro. Eñin ke men ko raorõktata im ej aikuj wõr ippãn juon ri katakin? Ejjab. Wãween in eaorõk ej ejja men eo wõt me Kien Moses ear kakien armej ro bwe ren kwal̦o̦ke. Bareinwõt eñin ej men eo im ej kakõl̦l̦en rũkal̦oor ro an Jijej. Im men in ej wãween eo el̦aptata me Jeova ej kwal̦o̦ke. (Jon 13:35; Gal. 5:14; 1 Jon 4:8) Ta in? Ej yokwe. Ro em̦m̦an aer katakin ro jet kõn Baibõl̦ eo rej kwal̦o̦k yokwe.
2. Etke eaorõk bwe jen yokwe armej ro?
2 Yokwe Armej Ro: Jijej, Ri Kaki eo El̦ap, ear kwal̦o̦k yokwe ñan armej ro. Men in ear lujur armej ro bwe ren kõn̦aan roñjake katak ko an. (Luk 5:12,13; Jon 13:1; 15:13) El̦aññe jej yokwe armej ro, jenaaj kwal̦o̦k naan ippãer aolep iien ko me jemaroñ. Meñe jemaroñ iioon ijjiped ko ak bõlen armej ro rejjab kõn̦aan roñjake, jeban kõtl̦o̦k bwe men kein ren kabõjrak kõj jãn ad kwal̦o̦k naan. Yokwe in ej kõm̦m̦an bwe jen kwal̦o̦k ad itoklimo ñan armej ro me jej kwal̦o̦k naan ippãer. Jenaaj kõm̦m̦an oktak ko ilo men ko jej kõnnaan ippãer kaki ekkar ñan aikuj ko aer. Bareinwõt, jenaaj m̦õn̦õn̦õ in kõjerbal iien ko ad ñan katak ippãn armej im kõpooje bok im katak ko ad m̦okta jãn ad ilo̦k im katak ippãer.
3. Ñe jej yokwe im kaorõki katak ko rem̦ool jãn Baibõl̦ eo, ewi wãween men in ej jipañ kõj ilo kwal̦o̦k naan?
3 Yokwe im Kaorõki Katak ko Rem̦ool jãn Baibõl̦ Eo: Jijej ear yokwe im kaorõki katak ko rem̦ool im ear watõki ãinwõt m̦weiuk ko raorõk. (Matu 13:52, UBS) El̦aññe jej kaorõki katak ko jãn Baibõl̦ eo, jenaaj lukkuun kwal̦o̦k ad m̦õn̦õn̦õ ñe jej kwal̦o̦k naan ñan ro jet. Men in enaaj kõm̦m̦an bwe ro jet ren kõn̦aan roñjake kõj. Yokwe ej lujur kõj bwe jãn l̦õmn̦ak wõt kõn ennaan eo jej bõkl̦o̦k ñan armej im jab l̦õmn̦ak bwe jejaje kilen kõnnaan. Men in enaaj jipañ kõj bwe en dikl̦o̦k ad mijak ñe jej kwal̦o̦k naan.
4. Ewi wãween jemaroñ kal̦apl̦o̦k yokwe eo ad ñan armej ro?
4 Kal̦apl̦o̦k Yokwe eo Ad ñan Armej: Ewi wãween jemaroñ kal̦apl̦o̦k yokwe eo ad ñan armej ro? Ilo ad kõl̦mãnl̦o̦kjen̦ kõn yokwe eo me Jeova im Nejin rar kwal̦o̦ke. Bareinwõt, jej aikuj keememej bwe armej ro rej aikuj jel̦ã kõn m̦ool eo. (Mark 6:34; 1 Jon 4:10, 11, UBS) Ñe jej kaorõk katak ko ilo Baibõl̦ eo, men in enaaj kõm̦m̦an bwe jãn niknik im katak ippãd make im kõl̦mãnl̦o̦kjen̦ kaki. Kajoor eo an Anij ej jipañ kõj bwe jen kwal̦o̦k yokwe. (Gal. 5:22) Kõn men in, jemaroñ kajjitõk ippãn Jeova bwe en letok kajoor eo an bwe jen kal̦apl̦o̦k yokwe eo ad ñan armej ro. (Luk 11:13; 1 Jon 5:14) Jekdo̦o̦n ewi joñan jel̦ãl̦o̦kjen̦ eo ippãd, ewi toõn ad pãd ilo m̦ool eo, ak joñan ad jel̦ã kilen kõnono, kõj aolep jemaroñ erom ri katakin ro rem̦m̦an el̦aññe jej kwal̦o̦k yokwe.