Tõprak ko Rar Wal̦o̦k Ke kar Leto Letak Peba in Kũr Eo
Jenaaj leto letak peba in kũr eo kõn kweilo̦k eo el̦ap jilu wiik ko m̦okta jãn kweilo̦k in ãinwõt jaar kõm̦m̦ane ilo iiõ ko remootl̦o̦k. Ewõr tokjãn ad kũr armej ro ñan kweilo̦k eo el̦ap. Ta tokjãn ko? Eokwe, ekkã an armej ro bwilõñ ñe rej kobatok ippãd im roñjaki katak ko me rej itok jãn Baibõl̦. Bareinwõt rej bwilõñ ke rej lo wãween ad jipañ doon bwe en kon̦ aolep jerbal ko. Rej bar bwilõñ kõn m̦wilid im ad bõrokuk ippãn doon. (Sam 110:3 UBS; 133:1; Ais. 65:13, 14) Ak ta kõn ro me ettol̦o̦k m̦oko im̦weer jãn jikin kweilo̦k eo el̦ap? Ewõr ke tokjãn ad leto letak peba in kũr eo ñan armej rein?
Ãlikin kweilo̦k eo el̦ap ilo kar iiõ eo 2011, juon kõrã ear jejel̦o̦k juon lõta ñan juon iaan ra ko ad. Kõrã in ear lo juon peba in kũr iturin kõjãm in m̦weo im̦õn. Ekkã an kõrã in kar kũttiliek ke Ri Kõnnaan ro an Jeova rar etal ñan m̦weo im̦õn. Ak kõrã in ear jeje im ba: “Meñe el̦ap im em̦m̦an m̦weo im̦õ, l̦eo pãleeõ ejouj im ewõr ippa elõñ men ko me remaroñ kõm̦m̦an aõ m̦õn̦õn̦õ, ak ear jab po bũruõ kõn aolep men kein im iar jab lukkuun m̦õn̦õn̦õ. Eñin unin iar etal ñan kweilo̦k eo el̦ap ilo Jãdede meñe ekar 200 m̦ail̦ ettol̦o̦k jãn m̦weo im̦õ.” Ear kanooj em̦m̦an ippãn kõrã in katak ko me rar wal̦o̦k. Joñan, ear calle l̦eo ippãn im ba bwe ekõn̦aan pãdwõt im kiki ijo bwe en maroñ in bar kweilo̦k Jabõt eo. Kõrã in ear wõnm̦aanl̦o̦k im ba: “Iar roñjake aolep katak ko im elõñ Ri Kõnnaan ro an Jeova rar kwal̦o̦k kajjier ñan ña. Joñan an kar em̦m̦an ippa, iar jab kõn̦aan bwe en jem̦l̦o̦k.” Ãlikin an kar kõrã in ro̦o̦l, juon armej ear jino katak Baibõl̦ ippãn im 4 allõñ tokãlik ear erom juon ri kwal̦o̦k naan ejjañin peptaij. Ej ba: “Ilukkuun m̦õn̦õn̦õ bwe iar lo peba in kũr eo iturin kõjãm in m̦weo im̦õ kõnke kiiõ epo bũruõ kõn wãween aõ mour!”
Jet iaan armej ro me rej bõk aer peba in kũr renaaj kobatok ippãd ilo kweilo̦k el̦ap eo. Kõn men in, jen kijejeto in leto letak peba in kũr ko kõn kweilo̦k eo el̦ap. El̦aññe ewõr bween peba in kũr ko, eokwe jouj im bũktok ñan jikin kweilo̦k el̦ap eo bwe kwõn kortokjãer ñan kũr armej ro ilo iien ko rem̦m̦an tok.
[Bo̦o̦k eo ilo peij 5]
Ta ko Jemaroñ Ba Ñe Jej Leto Letak Peba Eo?
Bwe en maroñ wõr an aolep armej ro ilo bukwõn ko jej kwal̦o̦k naan ie peba in kũr, em̦m̦an bwe en jab l̦ap ad kõnnaan ñe jej lel̦o̦k peba eo. Bõlen jemaroñ ba: “Yokwe eok. Kõmij leto letak peba in kũr in ñan aolep armej ro. Eñin ej peba eo am̦. Kwõmaroñ riiti kõmel̦el̦e ko jet kõn iien in ilo peba in.” En kaitoktoklimo am̦ kõnnaan ippãn armej ro. Ñe jej kwal̦o̦k naan ilo Jãdede im Jabõt, jen lel̦o̦k peba in kũr eo kab aer bok, Naan in Keeañ el̦aññe rej itoklimo.