Peba in Kũr ñan Kweilo̦k El̦ap

1. Ñããt eo jenaaj kũr armej ro ñan kweilo̦k eo el̦ap?

¹ El̦aññe kwaar kõpooj juon iien m̦õñã l̦apl̦ap ñan ro m̦õttam̦ im baam̦le eo am̦, kwõnaaj kar kijooror in kũr er ñan iien in. El̦aptata ñe kwaar lukkuun kate eok ñan kõpooji m̦õñã ko im l̦ap am̦ kar jol̦o̦k jããn ñan iien in. Eokwe ejjel̦o̦k oktak jãn juon iien m̦õñã eo ilo kõkkar me em̦õj bar kõpooje ñan kõj. Iien in ej ilo iien kweilo̦k el̦ap eo ad im ej pojak in wal̦o̦k, im em̦õj kõpooj elõñ katak ko ñan kõj. Im em̦õj an Jeova letok jeraam̦m̦an eo ñan kõj bwe jen leto letak peba in kũr eo ñan iien in. Men in enaaj jino jilu wiik m̦okta jãn kweilo̦k el̦ap eo. Ta eo enaaj jipañ kõj bwe jen kijooror in kũr aolep?

2. Ta eo enaaj kõm̦m̦an bwe jen bõk kun̦aad ilo iien leto letak peba in kũr eo?

² Jenaaj m̦õn̦õn̦õ in bõk kun̦aad ñan leto letak peba in kũr in el̦aññe enaaj l̦ap ad kam̦m̦oolol kõn ad bõk tokjãn jãn tõl eo an Jeova ilo iien kweilo̦k ko rel̦l̦ap. (Ais. 65:13, 14, UBS) Jej aikuj bar keememej bwe aolep iiõ in ad leto letak peba in kũr eo, ej lõñ tõprak ko jej loi. (Lale bo̦o̦k eo “Ewõr Tõprak Ko.”) Ewõr jet jej kũr er renaaj pãd ak ewõr jet reban. Meñe elõñ ak eiiet ro renaaj pãd ak ad kate kõj ilo iien leto letak peba in kũr in, enaaj bõktok nõbar ñan Jeova im kaalikkar an jouj im kõn̦aan jipañ armej.—Sam 145:3, 7; Rev. 22:17.

3. Kõl rot ko jemaroñ kõm̦m̦ani ñan leto letak peba in kũr eo?

³ Kumi in em̦m̦aan ro rej lale kajjojo eklejia rej aikuj lale wãween an eklejia eo maroñ leto letak elõñ peba in kũr ko. Ren bareinwõt lale ñe rukwal̦o̦k ro rej aikuj likũti peba in kũr ko ilo m̦õko ejjel̦o̦k armej ie ke ak lito litak ilo jikin ko ebwijin armej ie. Ren kõm̦m̦ane men in ilo teretore (territory) ko aer. Ñe em̦m̦an, ilo raanin Jãdede im Jabõt rukwal̦o̦k ro remaroñ bar kobaik peba in kũr eo ñe rej kwal̦o̦k naan kõn Naan in Keeañ eo. Ñe ejem̦l̦o̦k jerbalin lel̦o̦k peba in kũr eo jenaaj lukkuun m̦õn̦õn̦õ kõnke jaar bõk kun̦aad. Bareinwõt, jenaaj m̦õn̦õn̦õ kõnke elõñ rar kobatok ilo iien in Jeova ear kõpooje kõn elõñ katak ko rem̦m̦an!

Ewõr Tõprak Ko

Jejjo iiõ ko remootl̦o̦k ke juon jeid im jatid kõrã ear leto letak peba in kũr eo, ear l̦õmn̦ak ippãn make el̦aññe ewõr tokjãn an kõm̦m̦ane jerbal in. Ear l̦õmn̦ak ippãn make im ba, ‘Armej ro renaaj ke roñjake im itok ñan iien kweilo̦k el̦ap en̦?’ Ilo kar jibboñõn Jãdede eo ilo iien kweilo̦k el̦ap eo, ear reilo̦k im loe juon em̦m̦aan me ej kabuñ in Sikh. Kabuñ in ej jãn aelõñin India im rej tõmak bwe ewõr juon wõt Anij. Kõrã eo jeid im jatid ear etal im kwal̦o̦k kajjien ñan em̦m̦aan in im jel̦ã tokãlik bwe l̦ein ear itok ñan iien kweilo̦k el̦ap in kõnke ear wõr juon an peba in kũr. Ear lõñ an em̦m̦aan in kajjitõk ñan kõrã in jeid im jatid im kõrã in ear maroñ uwaaki. Em̦m̦aan in ear kwal̦o̦k kõn an em̦m̦an ippãn katak ko rar wal̦o̦k. Im ear kwal̦o̦k an bwilõñ kõn an em̦m̦an m̦wilin ro jeid im jatid me rar itok jãn aelõñ ko jet im an em̦m̦an im karbõb nuknuk ko aer. Ilo raelepenl̦o̦k raan eo kõrã in jeid im jatid ear bar bwebwenato ippãn ruo rippãlele me rar jijet turin. Kar bar lel̦o̦k aerro peba in kũr, innem erro ar itok ilo baj (bus) tok ñan kweilo̦k el̦ap in. Ear em̦m̦an kweilo̦k eo ippãerro im erro ar pepe in bar etal Jabõt eo. Kiiõ kõrã in jeid im jatid ear kile aorõkin jerbal in leto letak peba in kũr eo aolep iiõ.
Ilo juon iaan kweilo̦k ko rel̦l̦ap me rej kab jem̦l̦o̦kl̦o̦k, juon em̦m̦aan kab kõrã eo pãleen me rej bainier rar kwal̦o̦k kajjierro ñan ruo rũtto. Rũtto rein rar ba bwe ej kab kein kajuon in aerro pãd ilo iien ad kweilo̦k el̦ap. Ke bainier ro rar kajjitõk wõn ar kũrtok erro, rar uwaak im ba: “Juon raan ke kom̦ro ar ro̦o̦l ñan m̦weo kom̦ro ar loe juon am̦ro peba in kũr me kar pãinil̦o̦k ium̦win kõjãm eo.” Rũtto rein rar riiti peba in kũr eo im bar kanne ijo tulikin me ej kajjitõk ñe rej kõn̦aan bwe juon en ilo̦k im katak Baibõl̦ ippãer. Jet iaan ro jeid im jatid me rar itok jãn aelõñ ko jet rar lel̦o̦k kijen rũtto rein m̦õñã in raelep. Joñan an kar em̦m̦an katak ko ippãerro, erro ar bar pepe in ro̦o̦ll̦o̦k raan eo juon. Innem kar kõm̦m̦an karõk bwe juon en lol̦o̦k erro im lale ñe erro ej itoklimo wõt in wõnm̦aanl̦o̦k im katak.