Iien Leto Letak Peba in Kũr eo Enaaj Ijjino ilo Eprõl̦ 2 Raan
1. Ñããt eo jenaaj leto letak peba in kũr eo kõn iien Keememej mej eo an Jijej? Ta tokjãn ad leto letak peba in kũr eo kajjojo iiõ?
1 Jino jãn Eprõl̦ 2 raan m̦aanl̦o̦k ñan 17 raan jenaaj leto letak peba in kũr eo kõn iien Keememej mej eo an Jijej Kũraij. Iien in el̦aptata an aorõk im ej wal̦o̦k juon wõt alen kajjojo iiõ. Ilo iiõ ko remootl̦o̦k elõñ armej ro rar kobatok ñan iien in kõnke kar lel̦o̦k peba in kũr eo ñan er. Ñan waanjoñak, juon kõrã ear talboonl̦o̦k ñan ra eo ilo raan in keememej mej eo an Jijej im ba: “Ij kab roltok ñan m̦weo im̦õ im lo peba in kũr in ium̦win kõjãm eo aõ. Ikõn̦aan iwõj bõtab ijaje awa eo enaaj jinoe.” Eo jeid im jatid ear kõmel̦el̦eike kõn ia eo emaroñ lo ennaan kein ilo peba in kũr eo an. Kõrã in ear kallim̦ur im ba, “Inaaj iwõj buñniin!”
2. Ta eo jemaroñ ba ñe jej lel̦o̦k peba in kũr eo?
2 Kilen Kõm̦m̦ane: Em̦m̦an bwe en kadu ennaan eo ad kõnke jejjo wõt raan ko jenaaj leto letak peba in. Jemaroñ ba: “Yokwe. Kõmij m̦õn̦õn̦õ in kũr kwe im baam̦le eo am̦ ñan kobatok ñan iien keememej mej eo an Jijej. Iien in enaaj ilo Jabõt, Eprõl̦ 17 raan. Eñin peba in kũr eo am̦. [Lel̦o̦k peba eo ñan armej eo.] Enaaj wal̦o̦k juon katak im enaaj kõmel̦el̦e kõn ta ko jej aikuj kõm̦m̦ani bwe jen maroñ bõk jeraam̦m̦an ko kõn an kar Jijej mej kõn kõj. Ejjel̦o̦k on̦ean del̦o̦ñ. Peba in ej ba kajjien jikin eo im awa eo.”
3. Ta eo jemaroñ kõm̦m̦ane bwe jen jab likjab in kũr jabdewõt armej?
3 Elder ro remaroñ jiroñ kom̦ ñan likũt peba in kũr eo ium̦win kõjãm ko el̦aññe ejjel̦o̦k armej ro ilo m̦weo. Renaaj kõm̦m̦ane men in el̦aññe elõñ m̦oko congregation eo am̦ ej kwal̦o̦k naan ie. Jab mel̦o̦kl̦o̦k in kũr ro im kwaar kwal̦o̦k naan ñan er m̦okta, ro nukum̦, ro im kwõj jerbal ippãer, ro im kwõj jikuul̦ ippãer, im jabdewõt armej kwõjel̦ã kajjier. Ñe jej leto letak peba in kũr eo ilo Jãdede im Jabõt jemaroñ bareinwõt lel̦o̦k Imõniaroñroñ eo ñan er. Kwõmaroñ ke auxiliary pioneer ilo Eprõl̦ im kal̦apl̦o̦k ijo kun̦aam̦ ñan kũr armej ro?
4. Etke jekõn̦aan bwe armej ro em̦ool bũrueer ren kobatok ippãd ilo iien Keememej mej eo an Jijej?
4 Ro im rej itok ñan iien Keememej mej eo an Jijej renaaj katak kõn elõñ men ko rem̦m̦an im rem̦ool! Renaaj kile joñan an Jeova yokwe kõj kõn an kar kõtl̦o̦k an nejin mej kõn kõj bwe en kõl̦l̦ãik jerawiwi ko ad. (Jon 3:16) Renaaj katak kõn Aelõñ eo an Anij im wãween an naaj kajeraam̦m̦an armej ro. (Ais. 65:21-23) Bareinwõt, eo me ej kõm̦m̦ane katak eo enaaj rõjañ er bwe ren kepaake ro im rej lale jea ko im ba ñan er bwe rekõn̦aan katak Baibõl̦ eo ippãn Ri Kõnnaan ro an Jeova. Kõmij jar im kõjatdikdik bwe ro em̦ool bũrueer renaaj kobatok ippãd ñan iien Keememej raan in mej eo an Jijej!