Iien Leto Letak Peba in Kũr eo ñan Iien Keememej Mej eo an Jijej Enaaj Jinoe ilo M̦aaj 17
1. Ta jerbal eo jenaaj jinoe ilo M̦aaj 17?
1 Iien Kwõjkwõj eo kajjojo iiõ ej iien ñan ad keeañ kõn mej eo an Jijej. (1 Ko. 11:26) Kõn men in, jekõn̦aan bwe ro jet ren kobatok ippãd bwe ren roñ kõn juon men eaorõk im Jeova ear letoke ilo yokwe. Menin letok in ej kõn katok eo an kar Jijej. (Jon 3:16) Ilo iiõ in, jenaaj jino leto letak peba in kũr eo ñan iien Keememej Mej eo an Kũraij jinoe jãn Jãdede, M̦aaj 17. Kwõj ke kijooror in kal̦apl̦o̦k ijo kun̦aam̦?
2. Ta eo jemaroñ ba ñe jej lel̦o̦k peba in kũr eo?
2 Ta ko Jemaroñ Ba: Em̦m̦anl̦o̦k ñe jej bwebwenato ilo tukadu ippãn armej ro. Jemaroñ ba: “Yokwe. Iar itok bwe in maroñ lewõj juon an baam̦le n̦e am̦ peba in kũr ñan juon raan el̦ap me enaaj wal̦o̦k ipel̦aakin lal̦ in ilo Eprõl̦ 5. Enaaj wal̦o̦k juon katak jãn Baibõl̦ eo im ej kwal̦o̦k ewi wãween mej eo an Jijej ej jipañ armej ro im ta jerbal ko Jijej ej kõm̦m̦ani kiiõ. Peba in ej kwal̦o̦k ia eo im jikin eo renaaj kõm̦m̦ane men in iturin bukwõn eo am̦.” Ñe jej leto letak peba in kũr in ilo Jãdede im Jabõt, jemaroñ bar lel̦o̦k bok ko jet ãinwõt Naan in Keeañ ñan armej ro el̦aññe ewõr aer itoklimo im ekkar.
3. Ewi wãween jemaroñ kate kõj bwe jen kũrtok elõñ armej ro joñan wõt ad maroñ?
3 Kate Kõj Joñan Wõt Ad Maroñ: Mejãnkajjik eo ad ej bwe jen kũrtok elõñ armej ro joñan wõt ad maroñ. Jouj im keememej in kũrtok ri katak Baibõl̦ ro am̦, ro kwõj bar jepl̦aak ippãer, ro nukũm̦, ri jerbal ro m̦õttam̦, ri jikuul̦ ro m̦õttam̦, ro ri turum̦, im bar ro jet. Em̦m̦aan ro rej lale eklejia eo renaaj kwal̦o̦k laajrak ko kõn wãween kom̦ maroñ tõpar armej ro ilo bukwõn ko an eklejia eo. El̦ap tõprak ko rej wal̦o̦k jãn jerbal in leto letak in ad. Ñan waanjoñak, ke juon kõrã ear del̦o̦ñel̦o̦k juon jikin kwõjkwõj iiõ eo l̦o̦k, juon iaan ro rej lale kõjãm ear ba ñan kõrã in el̦aññe ekõn̦aan bwe en pukotl̦o̦k ri kwal̦o̦k naan eo me ear kũrtok ñan iien in. Bõtab, kõrã in ear ba bwe ejaje kajjien armej ro ijo ak unin an itok ej kõnke juon ri kwal̦o̦k ear lel̦o̦k an peba ilo kwal̦o̦k naan jãn em̦ ñan em̦ ilo kar jibboñin eo.
4. Etke jej aikuj kate kõj ilo ad leto letak peba in kũr eo?
4 Bõlen juon armej ear iwõj ñan Iien Kwõjkwõj eo ami kõnke kwaar lel̦o̦k juon an peba. Meñe elõñ rar iwõj ak ejjel̦o̦k, armej ro renaaj kile joñan am̦ kate eok. Aolep peba ko me kwaar likũti ippãn armej ro renaaj kwal̦o̦k bwe Jijej ej juon Kiiñ im ri tõl ekajoor kiiõ. Ilo am̦ kate eok, men in enaaj kwal̦o̦k ñan armej ro, ri kwal̦o̦k naan ro m̦õttam̦ im el̦aptata Jeova bwe el̦ap am̦ kam̦m̦oolol im kaorõke menin letok eo an Jeova ñan kõj.—Kol. 3:15.