Iien Leto Letak Peba in Kũr ñan Iien Kwõjkwõj eo Enaaj Jino ilo M̦aaj 1 Raan
1. (1) Ñããt eo jenaaj jino leto letak peba in kũr eo ñan iien Kwõjkwõj eo? (2) Etke enaaj aitokl̦o̦k jidik iien ad leto letak peba in kũr eo?
1 Jenaaj jino leto letak peba in kũr ñan iien Kwõjkwõj eo ilo Bõl̦aide, M̦aaj 1 raan. Iien Kwõjkwõj eo enaaj kõm̦m̦an ilo M̦aaj 26 raan. Mel̦el̦ein men in bwe ilo iiõ in, enaaj aitokl̦o̦k jidik iien ad leto letak peba in kũr eo jãn kar iiõ ko l̦o̦k. Men in enaaj letok iien ñan ad kũr elõñl̦o̦k armej ro ilo territory ko jej jerbal ie, el̦aptata ñe rej jokwe ilo jikin ko me rej m̦õttan territory ko rel̦l̦ap.
2. Ta karõk ko kõn wãween jemaroñ kadedel̦o̦k ad leto letak peba in kũr eo ilo territory ko ad im ñan ebbõk peba in kũr ko?
2 Karõk Ko: Em̦m̦aan ro rej lale eklejia eo renaaj kwal̦o̦k karõk ko kõn ewi wãween jemaroñ kadedel̦o̦k ad leto letak peba in kũr eo ilo territory ko ad. Renaaj bar kwal̦o̦k el̦aññe jej aikuj likũt peba in kũr ko ñan m̦oko me ejjel̦o̦k armej ie. El̦aññe ededel̦o̦k ad em̦ ñan em̦ ilo aolep territory ko ad, im ej lõñ wõt bwein peba in kũr ko, jemaroñ lito litak ijoko me elõñ armej ie. Em̦m̦aan eo ej loloorjake jerbal in kwal̦o̦k naan enaaj likũt peba in kũr ko ñan ioon jikin ebbõk bok eo. Em̦m̦aan in eban likũt aolepen peba in kũr ko ijo ilo iien eo wõt. Ñe jej ebbõk ad peba in kũr, jen bõk ekkar ñan joñan eo me jenaaj kõjerbale ilowaan juon wiik.
3. Ta eo jej aikuj keememej ñe jej leto letak peba in kũr ko?
3 Ta eo Jenaaj Ba? Bwe jen maroñ tõpar elõñl̦o̦k armej, ej aikuj kadu ad kõnnaan. Ilo peij 4, ewõr juon naan in ijjino me jemaroñ kõjerbale im jemaroñ kõm̦m̦an oktak ko ie ekkar ñan ijoko jej kwal̦o̦k naan ie. Jejjab aikuj ekkaiurir el̦aññe jej loe bwe armej ro rejouj ak ewõr aer kajjitõk. Ñe jej leto letak peba in kũr eo ilo Jãdede im Jabõt, jej aikuj bar leto letak Naan in Keeañ ko ñe jej loe bwe ekkar. Ilo Jãdede, M̦aaj 2 raan, ijello̦kun ad kajjioñ in jino katak Baibõl̦ ippãn armej ro, jenaaj kate kõj ñan leto letak peba in kũr ko.
4. Etke jej aikuj kijejeto in leto letak peba in kũr eo?
4 Jej kõjatdikdik bwe elõñ renaaj kobatok ilo iien Kwõjkwõj eo. Katak eo ilo iien in enaaj kõmel̦el̦e kõn wõn Jijej. (1 Ko. 11:26) Enaaj bar kwal̦o̦k kõn ewi wãween mej eo an Jijej emaroñ jipañ kõj. (Rom 6:23) Bareinwõt enaaj kwal̦o̦k kõn etke eaorõk bwe jen keememej e. (Jon 17:3) Jen kwal̦o̦k ad kijejeto ilo ad leto letak peba in kũr eo!